Malaysia gamsung akikhak laibung sungah gulpi khat kimu

Malaysia gamsung akikhak laibung sungah gulpi khat kimu

Malaysia gamsung ah Post Office panin akikhakkhia lai ip sung khatah gul golpi khat ki mukhia cih NST pan kiza hi. Tua gul pen thaam akici Python gulpi te hi a, Poslayu Package sung panin akimukhia ahihi.

Hihvai tawh kisai in Pos Malaysia Bhd panin thunei te’n agenkhiatna ah hihbangin anungtalai gul golpi ipsung ah koihin kikhak pen gitloh gamtatsiat mahmahna khat hi ci’n genkhia uhhi.

Tuaban ah hihbangin Python golpi package sungah koihin kikhak pen Pos Malaysia sungah nasemte ading inzong lauhuai mahmah hi ci’n Spokesman khatin genkhia hi.

Tuaban ah mipi te theihding inzong Post Office panin ganhing tuamtuam ahi Insects, Eggs, Larva, Birds, Tusk cihte kikhak theilo, aki khamcip hi. Tuabang in Post Office panin akhakkhiat tepen thukhenzum ah kitun in thu kibawlding hi ci’n Spokesman khatin pulakkhia hi.

Khuasung mipi lakah atheilo aomleh vankhatpeuh akhakkhiatma in bangteng ki khaktheihiam cih Pos Laju Branch te kiangah kidongthei hi. Tuabang in vankham khatpeuh akikhak akitheihleh kimanin thu kibawlding cihi.

Tua Python golpi akikoih Poslaju Package ii phone pen Social Media ah ki thehzak in lamdang kisa mahmah hi. Tua golpi akikoihna Box pen atungah khedap hi ci’n “Shoe Box” cih label kithuah a, Universiti Sains Malaysia aom sangnaupang te omna Hostel Block khatah atungding in akikhakkhia ahihi.

More: Mexico vanleng tung khatah gul ahinglai kimu ~ ZD

Post Office sungah tua Parcel akikoih laitak in agamtang, aling kimu ahih manin, aki honkhiat ciangin asungah gul golpikhat aki mukhia ahihi. Tua parcel pen Bayan Lepas tungkhinta a, ahi zongin Selangor, Sungai Buluh ah ki khakkik cih kiza hi. Sawltak #zomidaily