Malaysia gamsung ah Syria Refugee te honglutta

Malaysia gamsung ah Syria Refugee te honglutta

Malaysia in Syria gampan gambel cimawh Syrian Refugee mi 3000 lakding geelna aneisa uh hi a, kum 3 sungin hong tungtungding uh hita hi. Tua 3000 lakding lakpan in pawlkhatzong Malaysia gamsung hong tungkhinta cih Local Media tungtawn in ki zakhinta hi.

Syria gamtawh akiveng aom Istanbul, Turkey panin innkuan 2 (mimal 4) te Wednesday ni in Kuala Lumpur International Airport hongtung khinta uhhi. Zomi te Malaysia gamsung guklut banglo a, a biakna kibatpih uh amipih te Malaysia gamsung ah Refugee in alut taktak ciangin Malaysia’s deputy home minister Nur Jazlan Mohamed nangawn in vangleng tualpi ah vadawnliang hi. Tuabek thamlo hih mite pen Malaysia khuasung avak kawikawitheih nading in Temporary Visiting Pass zong piading uh cih kiza hi.

Tuaban in Temporary Visiting Pass apiaktheih nading in Jordan leh Turkish aom Malaysian Embassy tetawh sitcianna Screening Process bawlkhin uh cihi.

Syria gamsung ah 2011 kum akipan tualgal hongpian ciangin Syria Refugee mi 4 Million bang hong om a, tuate pen agamveng muntuamtuam ah ki thehthanggawp uhhi. Tuaban in hih Syria gammi te cimawh dongtuak in hong om uhciang in Malaysian prime minister Najib Razak inzong Syria Refugee mi 3000 lakding United Nations General Assembly ah na genkhiata hi.

Biakna kibatpih te cimawh dongtuak in hong om taktak ciangin huhlo in omtuanlo uhhi. Adang biakna te’nzong abiakna kibatpih te honghuh hongdondiak zawdeuh leh cihnop huai dektak hi. Ahi zongin Christian minpua NGO honkhat in Christian te sangin biakna dangdang tepeuh donzaw theimawk uhhi. ZD Sawltak #zomidaily