Malaysia gambeel Zomi khat theih le neih ding te

Malaysia gambeel Zomi khat theih le neih ding te

1. Khua khempeuh phialin khua kipawlna, khua innpi neiciat dingin um ing. Mi’gam mi’lei ah, khua 80 val kigawm a, tam i kisaphial zongin namdang te’kawmkal ah Zomi innkuan khat zahmah i hilel hi. Innkuan cih kammal pen thuk in zai hi.Innsung mite innkuanpih te hi a, innkuanpih a kici kammal pen behte cihbek hilo hi.I pawlte cih maimai zong hilo a, i khua pihte cihbek zong himawklo hi. Inn/mun khat ah teengkhawm a,lim taleh, al taleh, khum ta leh, kha taleh, thuk taleh, hau’ taleh nekhawm dawnkhawm in, avot asa thuakkhawm a, dahleh kapkhawm, nuam leh nuikhawm, hehhuai te hehkhawm, dohuai te dokhawm, lung damhuai te lungdamkhawm, pahtawihuai te pahtawikhawm cih pen innsung innkuan mimal khat ii theih le neihloh aphamawhte hi.

2. Tulian laitak i din’mun pen,UN te’thupi khualna hang a,Malaysia kumpi te hehpihna kiukio nuai a, a naaknaak lel i hihlam theitel phot dih ni.Hi thute kitheisak mahmah napi,a tello te pen, Zomi te’ Saisung khawngah kitom thei zeel uh hi.. Kawl te’ Sai ah bel kuamah kitom ngei hetlo bilbel uh kici.

3. Tua hi a, UN card nanei a nanei kei zongin i community (ZAM, ZRC….etc) card te hingsak dending hihangh. UNHCR zumpi te in community tungtawn bek in nasem zaw uh hi. Gtn: Kimat, kihen, damloh cihkhat tuak lehang,i community te zasak ding hangh a, amau ei hongvan in UN zumpi ah report hong piaksak cih, hipan hi.Tuaciang atawntungin i card nambat te leh ei’ hongvan theiding mikhat peuhpeuh ii fon nambat te lotngah sawm hamtang ni.

4. Tuaban ah den/zing/thai ciangding thu theikhollo i hihmanin Zomi genvai kipawlna te ahi ZSM or CDK (i muan’zawkzawk) card bawl tangtangh ni. Pawlpi tuamtuam pan leh khua kipawlna tek pan zong Rm. 10 bek tawh card kila thei a, Zomi zumpi (ZAM) ah zong 7eleven hunin kingah den thei ci uh hi.Rm.10/- na piakkhiat na tawh na mailam hunding a kikhual kholthei na hi a,nang’ nazat khakkei lezong khasiat na in ngaisun kei in. Rm10 tawh siluang atuam’ nahi hi.

5. Tua teh, i ZAM card te hingsak denni, ZSM sum khia hamtang ni i kicihcih pen, i khua i tui a om hilo, mi’gam beel a om i hihna hang hi. UN zumpi te’n community zum te tawh na asep bangmah un, i community te’n zong khua kipawlna leh pawlpi tawh kizom in nasem ta uh ahih manin i khua kipawlna te ah lut hamtang ni. Kikhop na pawlpi khat peuhmah zong zom/lut hamtang ni maw guai.

6. Khua khempeuh in khua kipawlna sum neiciat dingin lamen ing.Khua kipawlna atamzaw te ah, kipawlna sum akhia pen, khua mimal phazah ii alang (1/2),seh thum ah sehkhat (1/3), sehli ah sehkhat (1/4) khawng bek in sumkhia khalel ding hi, cih pen nak up pha mahmah ing. Tua sumkhia lo tepawl pen paupih lehang, agen asak uh tam zawlai hi.Banglo khat hongtuak le uh lah,ki koihkhong thei tuan samlo hi.Tua pen Amah i it i khual’man hinawn peuhmah lo a,i khuamin i khualna,i khua i tui min adai ding ki deihlo lua ahih man a akidon,aki sem hi liang tazen hi.I khuamin kikeem nuam ciat hi.Tuaciang…,kumkhat sungin khua sumpi khiat 3 vei (Zomi nam pawi,Khuado pawi, Zomi Cup) om hamtang hi.

Mimal 200 val apha khuate pen atawm pen Rm. 200/- hipah hi. Mimal 200 val apha khua ahih hangin, mi 50 khawng bek in kipawlna sum khia hita lezong tua  khua in Rm. 200/- mah khia veve hi. Hih pen khuamin kepna hi. Tukum bangpenaana (byforce) ahihloh hangin piakkhiat nopna tek tawh Zomi cencus (914) vai tawh sumpi 4 vei kikhia hi. Tua ahihmanin akua maciatin theitel siam a i khua kipawlna sum te itsiiklo tak a, a khia/pia ciat dingin hong lamen mahmah ing.

7. Tua hi a,ginneih loh kal in a hilo,banglo khat tuakmawk lehang….,i khuapih (……) te leh, i mipih (Zomi) te mah hong buai masa pen ding hi. I khua min leh i Zomi nam min, i mindai’sak ngamloh hang bekbek a…,kei le nang hong kidon,hong ki keem, hong ki buaipih ahih liangloh nading in, i cidam lai,i thahat lai, i hunhoih lai in…..(,tua ni takciang mi’ buaipih thanop dingin) tu a kipan in nuntak sawm ni.

I sihkhit khawng teh i KHUA ki theipan, i sih khit teh i luanghawm ZOMI na hi pan phiing cih tepawl, Zomi a i pian’ leh Zomi i hihna pen i sihciang NGAK se lo in tuni tuhun tu mahmah in i HIH na ahi, ZOMI bangin NUNGTA ta ni. (Ki-ap na hongsam nuam phial ing e…hhhhha!)

Theih/pilman hilo,veiina le deihsakna bek masuan in,
Pa. Cin Za Hu Pau @ Munkhai’pa
23 – 11- 09, Taman Miharja
Off Jalan Cheras’
55200 Cheras,Kualla Lumpur
Malaysia.
Mob. +6017 272 5574.