Malaysia Airport Terminal sungah Passenger lobuang lutsak nawnloding

Malaysia Airport Terminal sungah Passenger lobuang lutsak nawnloding

Malaysia gamsung aom Airport Terminal sungte ah Passengers te lobuang adangte lutsak nawnlohding geelna om cih tuni Friday ni in Deputy Prime Minister Ahmad Zahid Hamidi in genkhia hi. Hihpen Security alungmuanhuai zawding in ageelna uh ahihi.

Hihvai tawh kisai nung Wednesday ni inzong kumpi thunei ulian te Cabinet Meeting nei uh a, tuasung ah hihvai kinakkup mahmah uhhi. Tuni ciangciang vanleng tawh alengkhiading aom ciangin innpan vaikhate in Check-in Counters dongdong zuipheithei uh a, ahi zongin hipen lungmuan huailo, ngongtatna khatpeuh omkhathei cih ngaihsutna tawh innpan vaikha te Airport Terminal Building sungah lutsak nawnloding cih geelna anei uh ahihi.

Hihvai tawh kisai akisambang in avaihawm, asemding in Cabinet Meeting panin Transport Minister Liow Tiong Lai mawhpuak kipiakhin hi. Amah in Malaysia Airports Holdings Berhad tetawh kamkupna hongneiding uh a, akisam bangbang in hongsemtoding uhhi.

Vai akha Terminal sungah alut mite bekthamlo, mawtaw leh Taxi cihte zong Airport Terminal Building tawh akinailua in koihsak nawnlohding cihzong kikupna nei uhhi. Tusungteng leitung gamtuamtuam ah migilo te ngongtatna tuamtuam kiza kawikawi a, Airport khawngzong mitsuan in neipianpian uh ahih manin, Malaysia kumpi thunei tezong gamsung Security aom theihtheih nading in ahanciam mahmah uh ahihi.

Tuabek thamlo Malaysia gamsung ah ih thuaklah mahmah ahi palik tezong ulian te’n tawm salualai uh a, palik leh galkap khanbehding cihzong kiza hi.

Abeisa inzong Kawlgam mite phadiak azin khiading ahih keileh vaitungding khat omleh vanlengtual ah kizui ngekngak, Terminal sungah midang tetawh gamtat luhekzia kibanglo phadeuh omthei ahih manin, thusit atuak zeuhzeuhzong omtheizel hi. Mailam ah tuate hong lemtangnawnlo khading hi. ZD Sawltak #zomidaily