Malaysia Airlines te vanlenghawl khat vankham Drug zang ahih manin kiman

Malaysia Airlines te vanlenghawl khat vankham Drug zang ahih manin kiman

Malaysia gammi vanlenghawl Pilot khat Indonesia gamsung ah aomsung in guihtheih khamtheih vankham zang cih kimukhia ahih manin, kiman cih theStar pan kiza hi. Tua Pilot pa ii azatui Drug zatpen Methamphetamines kici te hi a, abeisa Saturday ni in akiman ahihi.

Indonesia’s National Narcotics Agency (BNN) kici guihtheih khamtheih akankhia te’n Batam’s Hang Nadim International Airport sungah kuama upmawhloh laitak dingin misitna “Inspection” nei uhhi.

Tuabang in thusitna aneihna sungah vanlenghawl Pilot khatzong muanmawh in ommawk ahih manin, Test akibawl ciangin Methamphetamines vankham zang cih kimukhia mawk hi.

Tua vanlenghawlpa pen BNN Riau Islands office ah kikem hi ci’n National Narcotics Agency makai asemlaitak ahi Richard Nainggolan in genkhia hi.

Tua vanlenghawl Pilot pa ii neihsa leh avanzat hiding in aki ummawh vankham Methamphetamines akigawm in 1.9 grams, atepna Meth Pipe khat, zazialna Aluminium Foil cihtezong ki mankhia hi.

Hihvai tawh kisai in Sunday ni in Reporter te’n Malaysia Airlines thuneite tungah dotna nei uh a, Malaysia Airlines thunei te’nzong ka Pilot khat uhpen vankham Drug tawh kiman mahhi ci’n genkhia uhhi.

Ka Pilot khat uh Batam ah Drug vaitawh kiman ahih manin, athu hoihtak aki kanciansan laitak hi ci’n thunei Spokesperson khatin genkhia hi.

Tuaban ah Malaysia Airlines sungah nasemte pen Drug azang aomleh ki mawkkoih hetloding a, khauhtak in thu kibawlding hi. Drug zanghi cih kiciantak in aki muhkhiatleh nasep kikhawlsak pahlian dinghi, tuaban ah thunei te tungah ki appah dinghi ci’n Spokesperson in genkhia hi.

More: Malaysia gamsung ah gamdangmi vankhamzuak mi 9 kiman

Tuabek thamlo Malaysia Airlines sungah nasemte pen guihtheih khamtheih azangkha aomhiam cih theihcian nadingin Drug Test pen ahunhun in kibawl zelzelding hi. Vanlenghawl Pilot te bekthamlo, vanlengsung ah nasem Cabin Crew khempeuhzong Drug Test kibawlding a, Airlines sungah nasemding in kituak hiam cih sitcianna kinei zelzeldinghi ci’n Spokesperson in genbeh hi. Sawltak #zomidaily