Lobang tulpihding lawmngaih zonzia ~ Job Cinpi
Lo bang tulpih ding lawmngaih / koppih bangci zon ding? – Lawmngaih cih pen khuak tawh a kizong hi lo a, lungtang in a zon mite tawh a kituakte a kingai ahih manin pawlkhatte in ngaihsutna khuak tawh lawmngaih zong mawk leng itna kihel nawn mawk diam ci thei uh hi. Tua zong ahihna ciang khat om veve hi.
Ahi zongin lawmngaih na neih khit taktak ciangin tua na lawmngaih tawh hong kizomsak suak ding thu a tam zawte pen lungtang tungah tam kinga nawn lo hi. Nupa zong tua bang mah hi pah hi. Tua kizopna a kip suak theih nadingin mimal hihna in mun tampi hong la ta hi. Mimal hihna ka cih ciangin mi khat ama hihna / a nuntak a kalsuanzia a gen nuam ka hi hi.
Nupa pawlkhatte a sih dong mah kikhen loin tul suak uh a, ahi zongin nupa kaal sung nopsakna a ciam kha lo tampi om thei uh hi. Tua ahih manin tu-a ka gen ding lo bang tulpih ding lawmngaih zonzia pen lo bang tul kawm cih ciang bek zong hi loin khat le khat ki-it kikhualna tak tawh lo bang tul kawm ding cih deihsakna tawh a gelh ka hi hi.
A nung le ama a kikhel lo mi
A nung le ama kikhel lo mi cih ciangin na kingaih ma, ngaih sinthu hong lel lai ci mai ni. A phi na piak ma hong thusimzia hong khualzia le a phi na piak zawh a hong thusim hong khualzia kilamdanna a om hiam cih na theih ding kisam hi. Na ngaih kik ma-in ni khat hong mu kei leh a si ding bang phial napi na ngaih lam hong theih tak ciang kaal khat sung bang na kimuh loh uh hangin bukkhuh bang a vei lo ding, a nap zong a tui lo ding mi pawlkhat om uh hi. Tua bang mite tawh na kiten khak leh khasum piak loh anvak tawh innteng nasem dingin a kipumpiak na suak kha ding hi.
Amah tawh na kithuah hun ciang bucing kisa
Amah tawh na om khop hun ciangin bucing kisa cih ciangin bang mah awlmawh lo, Lunggulh dang bang mah nei lo cih lam hi lo hi. Kamsiam tawh mi a mawk phatphat theite tawh om khawm leng zong hun khat sung bang mah dang kilunggulh lo thei hi. Ka gen nop bucinna cih pen na nuntakna sungah amah na zat nading le ama hong sepsak ding bang mah om lo hi napi na nuntakna sungah amah kisam ngiat, amah lo tawh na mailam nuntak kalsuana hi thei lo ding cih zah dongin amah kisam cih a gen nuam ka hi hi.
Amah sumhau mi khat ahih manin na nuntakna sungah amah kisam cihte hi lo hi. Nanuntakna sungah amah na zat nading om kilkel lo napi amah lo tawh nuntak ding ngaihsun zo lo, amah om kei leh bucing kisa zo kilkel lo cih a gen nuam ka hi hi. Ama tungah na kisap khat om ahih manin tua na kisap hong piak theih manin bucing a kisa na hih leh tua na kisap pen a kisap loh hun ciang amah pen nang ading mi dongkholh khat suak thei hi.
Ama lungsim thuakna theihpih
Ama thu theih nop manin kan cihte hi lo hi. A lungsim thuakna hong gen ahih manin thei cihte hi lo hi. Lungsim kipum khat cih lim lahna ahi hi. A haksatna hong gen lo napi haksatna thuak hi cih khat lungsim tawng pan theihpih, hong gen nop loh dahna le lunggimna khat om hi cih lungsim tawng pan theihpih cihte a gen nuam ka hi hi. Tua pen lungsim a kipum khat mahmahte lo buang tuaci thei lo uh hi.
Lungsim puakzia a huampi kibang
Lungsim puakzia cih pen mihing khat le khat kibat ding baih lo hi. Ahi zongin lungsim puakzia kibat ding pen deih kibat ding zanin haksa lo hi. Ka gen nop lungsim puakzia a huampi a kibang cih ciangin nupa ahi a, lawm kingai ahi zongin a ngaihsut uh a tam zaw a kibang, a thugen uh a tam zaw a kituak mi tampi om uh hi. Khat le khat ki-aana man hi lo a, kizahtak man zong hi khin loin a ngaihsutna uh a kituak ngiat, a kop ding mahin a kilawm mi pawlkhat om uh hi.
Van le nate tungah deih kibat lohna pen kam tawh kigen thei a, kikum thei hi. Ahi zongin lungsim kibang kei leh thu kikum thei cih om nawn lo hi. thu a kidong nuam tuak nupate bek mah khat le khat kizahtak thei uh a, amau thu bek mah thu a sa tuak nupate ahih uh leh khat le khat a sim a thamin kinehpik lel ding uh hi.
Kamciam bangci zui
Numei ahi a pasal ahi zong kamciam a thupisak lote peuhmah in nupa hoih innkuan nuam lam zo lo ding uh hi. Nupa khat innkuan khat cih pen khat le khat ki-itna le kimuanna tungah a kilam innpi ahi hi. Kamciam a tangtun mite tha kipia nuam a, kipanpih nuam hi. Kamciam a tangtun den mi khat pen ama gamtatna khempeuh panpih ding lunggulhna tawh kiencik nuam den hi.
A kamciam tangtut zawh loh nading thusia lasia khatpeuh om hi mah leh zong tua bang mite in a innkuan sung a nupa kaal sung ah mawhsakna tang kha lo uh hi. Ama hanciamna kimuhsak ahih manin a tangtut zawh nadingin kipanpih nuam zaw lai.
Nupa kiten ma, lawm kingaih ma kamciam piak a baih ngaihsut mite pen thankhik banga kikhel ziauziau thei mi hi zaw thei uh hi. Tua bang mite adingin Pasian le mite mai ah kiciamna tawh kitenna pen thu haksa hi lo ding hi. Kamciam tangtut ding a hamciam taktak mi a tam zawte in kiciamna tam zat lo uh hi. Ahang pen tua bang mite in a kician lo thute kamciam pia pak ngam lo uh hi.
Hih a tunga thute pen pel lo a kitul ding cihna hi lo hi. Ahi zongin teek dong huai khat le khat itna le kikhualna a kitulpih a nungta khawm nupate pen a tunga thute tawh a kipelh om lo uh hi. Nupa a kitul khempeuh itna le kikhualna tawh a kitul hi khin lo hi cih phawk ding kisam hi. Job Cinpi (Zomi Laisim nuamte)
Comment piaknop aomleh...