Malaysia-ah UN Masuan ~ Pu Zokhai

Zomi Association of Malaysia (ZAM) Kum 10 Cinna Lungdambawl Siimna

Zomi Ngaih Sanggamte,
Anungta Pasian leh ZAM Makaai Upate’ thusiamna-tawh ZAM Kum 10 Cinna Lungdambawl nuamtak kibawl-in Zinmaang-in ka-kihel thei-a, naakpi-in hunzat nuam-in, upateng leh lawmlehgual ulehnau teng-tawh holungkum cim manlo-in AU- Melbourne cidam-in ka-tungkiik thei-hi. Malaysia Zomi khempeuh tung-ah Pasian-in Ama’ thupha bucing hong piaksak tahen!

UNHCR Masuan Kithuzaaktuahna

UNHCR Malaysia-ah innteekpi dinmun lam-ah panmun ana-nei Dr Susheela leh Marvin Michael Kho te-tawh holungkumna pan-in anuai-a bangteng kithuzaaktuahna (information) nengcik mipihte’ theihding kilawm hong puakkhia-ing.

UNHCR Malaysia-pen 2010-a kipan Malaysian Govt-tawh contract system bulphuh-a akalsuanna-uh aphiatsiang hi-a, UN-in Malaysia leitang leh innmun logam-pen amau’ gamtat nading-a kisaap ngeina bang-a asaap-uh hi-in, “kum ?? om laaiding.,” cihbang om nawnlo-in hunlemual zil-a akhawl theiziau dinmun hita cihthu UN Uliante’ kiangpan-a akip thuzaakna ahihi.

Malaysia UNHCR-in UN Convention: Geneva pan-a thupiakna, lawmhsum sehna leh lamlahna bek-tawh akalsuan ahihman-in Malay-a mapang uliante’ deihsakna leh deihsaklohna tung-ah bangmah kingah lo-in phualpi’ thupai bangbang-a aseem-uh ahihi. Phualpi-in “mi 100 nana vaan un” acihleh aseem mimal’ deihsakna-tawh “mi 120” vaan thei tuanlo uhhi. Hihpen kipawlna paizia maantak hi-a, ahiding-mah ahihi.

Akip thuzaakna-ah, Malaysia UNHCR masuan-pen phualpi pan-in thupiak thuahna a-om keileh kum-nih kiim khawngbek kalsuan laaiding lamet om ci-hi. Aziak-pen, UN-in mun tuamtuam-ah thukanna ciantak nei-in huhding kisam mipawl khatna, nihna, thumna cihbang-a asehna sung-ah Kawlgam Chin State-a mite’ dinmun-pen khatna-ah om nawnlo-in 5-6na kiim-ah koihta uhhi.

Chin State-a mite banghang-in donpahding 6na pawl-ah kikoih-hiam cihleh Chin State-ah UN palaai Richard hongpai laai-in Hung Ngai-in, “Ko Kawl Gamukte-tawh buaina nei vetkei-ung” ci ahihman-in Chin State peemta mite “economic migrant (sumzon olzuan peemta)”-in hong ciamteh uhhi. Sumzon olzuan peemtate-pen thauvuui thautang lak, gaalmaai samaai-a taai, innlehlo nusia-a dongtuak peemtate’ sang-in naakpi-a kicitheizaw, kimangtheizaw ahihziak-in I’ dinmun alauhuai mun hinawnlo aci-uh ahihi.

Malaysia-ah tulian-in ZAM Social Service Department-ah minsaanna pawlmi bekbek 8,000 vaal a-om hi-a, tua-zong UN Card ngahsa pawlkhat hih minsaanna azom nawnlo omlaai ahihman-in 10,000 vaal omding upmawh ahihi. ACR’ department khat-a apang ZRC-ahzong ahoihkhom khat omding ahihman-in Malaysia-ah Zomi tam mahmah laai-a, ataangpi gam thumna (in refugee context) alunggulh tamzaw-hi.

Hih Zomi zatamte’ maailam dingpen atamzaw adiak-in gam thumna vaai process akipan naailo-a alamen veve te’ ading-in kician sinsen khollo dinmun ahihi. Hihthu-tawh kisai, UN Convention-Geneva leh adiak-in Australian High Comm leh Homeland Security-ah Petition kician mahmah gelhding Dr Susheela’ kiang-ah ka-gen ciang-in, “gelh mahve, 2003 pek pan-a na-sepsep hiven, kaamphatleh attention ngahding” hongci-hi. Hihpen maai nipi kaalsung ka’ assignment ding-a kaseh ahihman-in support letter kipiakding athupi ahihlam athei-ngei kipawlna Zomi sung-ah a-omleh hongki muak-hi.

Malaysia Zomite’ Ading Thupuak

Hihbang dinmun-ah, Malaysia-a Zomite adiak-in UN Card hong laakkiik sakding-a sapna angahte hitaleh gamteel ding-a hong sapte hitaleh, gam khatpeuh ngen-a uaina angahte hitaleh UN Naseemte-in, “Na’ gam-uh kikheel tahi, kiciah thei tahi” hong ciding uh-a, “Ciah un” hong cihpahloh hang-in ciah ding-a hong sawlsawl-uh ahihi. Tuabang hun ciang-in kamciim tak-a dawnding naakpi-in kisam-a, Pasian-in lampi ahon naakleh lamet om theilaai ahihman-in ciahding akizo mite-in UN theihsak kuul selo-a ciah ziauding ahihi.

Gam thumna alunggulh khempeuh-in UN Card hong laaksak kiik nop-uh ciang-in, “Matpongtin neilo kahih man-in kiciah thei peuhmah lo-hi. Passport neilo-in Malaysia thuneite-in hong mancip ding-a, Kawl Gamukte-in matpongtin lo-tawh Kawlgam ciah saklo-uh ahihman-in camp-ah ciangtan omlo-a khumna thuakding hongdeih na-hi uhhiam?” ci-in nana dawng ciatciat un. Hih-pen ka’ Petition muiituumpi ahihi. KLIA Camp-ah matpongtin neilo-a akikhumcip Kawlgammi honkhat om takpi ahihman-in evidence kician mahmah khat ahihi.

“Suu Kyi Free cihkhat ommah” hong cihleh, tuabang masuan neihtuak mahhi, ahizong-in camp-ah kum nih/thum a-om khinsa mite’ lak pan-in hualkhatteh mi 3 ta-bek la uh-a, adangte’ ading next turn cikciang hiding cihzong akithei hilo-hi. Tua angaak ding-in “camp-ah haksatna lianpi thuak ding, maailam ei’ hun cikciang cih kitelcianna omlopi-mah apum-ngaak ding-in hong koihnuam na-hi uhhiam?” ci-in ciimtak-a dawnding ahihi.

Hibang-a nana’ dawnsiamna uhleh thungetna-tawh UN Convention-a ngetna-tawh thuahding eima’ mawhpuak hilel-a, aseem mite’ lungsim aheiding ahihleh Pasian ahihi. Tua ahihman-in lametbei-a omding hilo-hi, banghanghiam cihleh Hebrews mibup thahding aki-kipsak khinsa nangawn Kumpinu Esther’ vaaihawmna kimang diamdiam-a
ngetna thuukpi aneih man-uh’n thukawng kihei-in Hebrews te athahmaai sawm Harman-in Mordecai khailup nading-a abawlsa singkuam tung-ah thahna thuak-in Hebrews mite’n suahtaakna ngah-hi. Tua thukawng ahei Pasian I-nei uhhi.

Thuleengsawn Upkhialhna

Malaysia-ah “Australia pan-in NGO khat hongpai ding-a, Australia apai-nuam khempeuh sazian lading, bus saapding RM 20-ta hongpia laaiding” cih thuging-pen sanggamnu Lia Lian-in ataangko hi-a, “Australia pai-nuamte paisakding” ci-in kiliinglawng latlat-hi. Tuabang hilo-hi. Tua NGO te-in research abawl-uh hi-a, maaikum-ah grant angah-kiik nading-in research hongbawl ding-uh hilel-in, tua-a sazianpiate Australia-ah paithei tuan peuhmah lodinghi. Refugee te’ haksatna hongdong-in interview hongbawl ding-a, tuateng amau’ department website-ah koihding, AU Gamukte’ tung-ah grant ngen kiikding cih hilel-hi. Lawp huhu nading hilo-a, ahizong-in atung-a “UN Uliante’ dot/gente dawn nading-a konggelh tengmah-tawh nana dawng le-uhcin I’ Petition-in muibunh zawkaan laaiding-hi. Aman/hunngahte nana pai unla AU uutna’ sang-in Malaysia-a haksatna nana limgen lel un, leitung’ hong theihding I-lunggulh ahihi.

Refugee-pihte Lungneu Kei Un

Refugee ci-a hong neumuh, hong neu-et Zomi mihaiite’ kampau ziak-in lungneu peuhmah kei un. “Refugee te kumpi zuak, gam zuak, mawhna suut kuul,..” peuhci-a ahaii ciakciakte’ kampau ziak-in lunghimawh peuhmah kei un. Gamdang-ah teensuak theih nading ngetna abawl khempeuh biakna vaai-a apai hitaleh, conference siimte hitaleh, siamsin ding-a pai hitaleh teensuak theihna angen limlim refugee case-tawh akidanglo “Ka’ gam-ah ciahleng thusia ……. hongtung dinghi” ci-a ngetna lo-tawh koimah gam-ah kuamah teengsuak theilo-hi. Business-tawh apai mite-in investment nasia mahmah tua gam-ah koih-in, “hihteng nusia theikeng, ka’ gam-ah bangmah munkip neikeng,” cilaai uhhi. Tua ahihman-in gamdang-a atung khinsa mite khempeuh refugee case-tawh akibang: kuamah aliantuam, athupi-tuam omlo-hi.

Refugee-tawh kisailo ci-a hong neumuh a-om hang-in amau’ sang-in thumaan genzaw nahi uhhi. Nang teekteek-in mat leh heen na-tuakkei zong-in, nangma’ sanggamnu teekteek-in buanna athuakkei zong-in, nang teekteek-in porter na-pai ngeikei zong-in, vuakna saatna na-thuak ngeikei zong-in, na’ sinsanpih Zomi tampi mat leh heen, buanna, vakna saatna, thongkhiatna leh thong sung-a sihna, aphual-a vuaklupna athuak tampi omhi. Refugee te “mawh/khial” hongsa mite amau mizuau hizaw-a, aki-hisak, Kawl Gamukte’ maaipha azong hizaw kaanlaai uh-a, mithatte, sumsutte, tualthatte, numei buante-tawh akibang, akipawl hizaw-uh ahihlam thei-in thu ngetsak zawding hihang, hehpihhuai lua uh-a, eite I-hihleh I’ sisanpihte’ thuaknate apulaak I-hihman-in thumaan mite I-hizaw dinghi.

Sisanpihte’ thuakna pulaakna-pen zuaugenna hilo-in itna hizaw khalaai dinghi. Pasian’ thugen kinei-a refugee tekhawng aneumuhte’ kampaute Pasian pan-a hongpai hilo zawtham ding-a, mite-in amau apiimuh, thupi asak nading-a zuau phuakphuakte Pasian’ Gaalpa’ silate hizaw ahihman-in lungduai-in thunget sakding hihang. Khaici atuhpa theilo-in agah a-at mite-in khangtawn-in at zolo uhhi. Refugee hihna-tawh hongki simmawhleh Pasian phat un. Abraham-zong Babylonia Gam, Ur khua pan-in Canaan-ah refugee-a apai masa ahihi. Eite mahbang-in tuahsia-hi. A’zii nangawn Egypt Kumpipa-in luppih liang-hi (akimawh loh nading Pasian-in theihngawhsakna pia hikeileh….). Vaantung Kumpipa ZEISU-zong Egypt mah-ah refugee-in taai-hi. Ei-zong tuabangmah I-hihi. Ei hong neubawl mite-in ei hongnei Pasian aneubawl ahihi. Lunglau kei un, Topa-in hong mu-hi.

Haanthotna:

UNHCR-in kum-nih sungbek-mah hongzom takpi-in, gam thumna lampi hong kikhaak lehzong “eite’ khualzinna beina hikei-ei” ci-in Kawlgam ciah-a masuan khat kipan zawding-maw, ahihkeileh Malaysia-a omtheih hunsung meetbawl siam-a, sumnu sumpa zong-in kipanpha dingmaw cih-a kipan lampi tampi om ahihman-in lungkiat thaneem nading peuhmah-a ngaihsut lohding ahihi. Gam thumna atung khempeuh nuamsa, haupah, lungkhamna beipah cihbang hi peuhmah lohi. Koikoi-ah hongnei Pasian akihtalo mite vaangpha tuanlo-a, maaizunhuai baangkua thubuai-tawh, sumlehpaai buai-tawh buaina cihpen mun khempeuh-ah akim ahihi. I’ omomna-ah Pasian’ thumaan thutak tung-ah I-kingak naakleh Paradise hithei den-hi. Deihgawhtheihthu hileh Kawlgam khawng-ah kumpite-lah maai-et selo-a, innkuan behlehphung-tawh phungluun-a ankhing akham lihliahte Paradise taktak hi zawsop laai-hi. Tua ahihman-in Pasian’ thumaan thutak paaibang pom-in, pupa’ muanhuaina tembang kuah-a, anbang itna-tawh khaubang akikhih mite’ ading-in koikoi-ah ateeng zong-in Paradise ahihi.

Phawksakna

Gam thumna khatpeuh paulam-in, “sum ???? -tawh AU or US kipai thei,……” cihdaan-a agen a-omleh Company khatpeuh-in working visa-tawh ataangko ahihkei ngaalleh mizuau ahihlam theih pahding ahihi. Lahpakding: AU luut nading 200, 201, 202, 203, 204,… cihte-pen sum-tawh tuabang-a leitheih hi ngeilo-hi. “Refugee Office-ah naseem-ing, hong tuaci le-uhcin, sumpia lehang manlaang tuam…..???…..” ci-a min hongla a-omleh kei’ theihna ciang-ah:

Australia Gambup-ah Refugee Council (www.refugeecouncil.org.au) ahizong-in,
Migration Australia (www.immigrationlaw.com.au) ahizong-in,
Offshore Humanitarian Processing Centre (www.border.gov.au/Trav) ahizong-in Zomi khatbeek-in panmun neilo, cleaning-zong aseem omlo-hi. Sumlehpaai pia-a aki process-zong UNHCR-in refugee-a aciapteh khitsa, unau sanggam laaigui kizomte vaanleengsaap eileh-ei kisik-a paina cihloh IOM zangh-a UNHCR atawnkha limlim refugee peuhmah-in adang sum (DNA check nading cihdaante ahihkei naakleh) piakding kumpi-in ngenlo-hi.

Kam leengsawn tepawl um-a, lamet hong batloh takteh khakuun-a I-om khaakding daalkholhna-tawh kahong pulaak hi-a, ka’ information khial loding-hi. Master of Social Work-ah ataangpi dongtuak mite, genthei mite, refugee leh migrant thute naakpi-a akisin hi-a, Offshore (Malaysia daan-a gamdang khat-ah UN Assessment akibawl khinsa refugee te laakna) hitaleh Onshore (gamdang pan-a vaanlam, tuilam khatpeuh-tawh aguuk-a hongluut: lpd – guunkuang-tawh hong honpai mite vaaisaina) cihte-ah “sum omleh manlaang tuam” cihte kumpi’ tung-ah akhia omleh amawhna lian mahmah khadinghi. Tuabang honggente mizuau hi-a, na’ sum-uh adeih ahihman-in nana um kei un.

Gam thumna tung khinsa Zomite inzong gam nihna lamkaal-a mipihte mawk khemkhem kei-ni. “Hongtung khaleh ei’ pawlpi hongsuak nading” ciang lametna-tawh khem bawlbawl kei-ni. Akicianlo sepna leh genna-tawh mipihte lamen sak mawkmawk lo-in sumlehpaai-tawh cimawh dongtuakte panpih zaw-ni. Malaysia-ah ahihleh neeklehdawn ciangciang-tawh abuai, mangbang kuamah omlo ahihteei hang-in lungsim lamsang dammawhna leh khamtheih, kitahkimawlna (game)-in hong suksiatsak amoii ahaam om kawmkawm-hi. AU-khawng US khawng-a pawlpi mi-peuh kituhtuh-a, na-ki elel-uh sang-in tuate’ ading amun-amual pha-in na’ itna khitui va-lak zaw un. Kawlgam pan-a apaite-in ahihleh koikoi-ah amau adonzo ahi zawdeuhte bek-tawh kithuah ahihman-in tuabang lungzaan mite mu ngeilo uhhi. Biakinn atungden mite bek-tawh kimu uh-a, tuate bek-in citpiak tampipi piazo-uh ahihman-in lungkham sintawl mite mu-kha ngeilo uhhi.

Neeklehdawn leh zatui zaha mahmah-tawh haksatna ahihleh Thai gamgii-ah om mahmah-a, UN resettlement-zong lamet om phalo, ciahding hilehlah innlehlo neilo, pumpi vaciah mawk-a kuamah-in resettlement vaaihawm sak loding cih dinmun-tawh sum thalawh nading munlehmuallah hilo-in lungkham mangbang-in om uhhi.

Zomite-in paizia khat kheel-a, citpiak sumlehpaai bekbek leh pawlpi-mi bekbek en lo-in, Pasian’ deih zialehtong lam-ah kiheii kiik-a, citpiak alianzaw lunggulhna peuhtawh “no’ love-gift deihkeng” cihcihleh saansaan thuah, sial bang-a siiksiikleh neekneek thuah nawnlo-in, ataktak Pasian’ Thu kigen henla, ataktak mission kikhah henla, ataktak itna kivawh khia tahen! Gamdang-ah I-om man-in I’ pilna khangpah vanvan saamlo-a, gamdang-ah I-om man-in I’ minam itna abei akiam hipah saamlo-hi. Gamdang-ah Pasian’ thugente hongpai man-a Pasian’ thu asaang phiingphiingte I-hi saamkei-a, gamdang-ah I-om man-in Zogam-a mite’ sang-a ahizaw gawp-zong kihi saamlo-hi.

Hihteng kitelcian-in kinuntaakpihleh Zomite kithuhual loh nading om khollo ding-in lamen-ing. Lungsim acidam loh-in kihualna om ngeilo-a, angsung duhhopna masuan-a Pasian’ Min apaulam mite akiam mateng Pasian biakna siangtho om ngeilo dinghi. Pasian biakna siangtho a-om loh-in lungsim cidam cihbang omlo ding-a, lungsim cidam lo-in thu amaan leh akhial, ahi leh ahilo cihte kikhensiam nawnlo-in “hong kithun khinsa thu” bekmah mittaw sialmei let tentan-in akilangh sitset nangawn kitel nawnlo thei-hi.

Thukhupna:

Malaysia pansan-a gamdang alunggulh mipih khempeuh-in hih UNHCR te’ geelna: kum-nih kiim khawngbek office hong laaiding cihthu tungtawn-a petition puakding vaai thungetna-ah nana helciat unla, kipawlna leh biakna pawltuam tuamtuam hihna-tawh guh kalsuan lualo-in, ZAM-ah tuibang kigawm-in thulehla kiza, kihawmsawn, cihbang-in mapan khop diamdiamding naakpi-in thupi-hi. UNHCR-in I-ngetna hong thudon keiphial lehzong minam kipawlna adiak-in ZAM – Social Service Department-ah kipawl hamtang-a, cihmawh dongtuakna khempeuh puakhawm ding-in kahong haanthawn-hi.

Pasian-in na’ lunggulhna khempeuh-uh hongthei-in thupha-tawh hong phungvuh tahen!

Zomi Pasian’ Thupha!

Zokhai
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560