Malaysia ah papi khatin atanu lupna tungah buan gawp

Malaysia ah papi khatin atanu lupna tungah buan gawp

Nungaknu pen mailam nuntak khuasakzia alemtaang zawding “Brighter Future” ngaihsutna tawh khuapi sungah pilna sinbehding in innpan hongzinkhia hi. Midang theihngeiloh kiangah zintungding hisamlo a, apa zong tua azinnading khuapi sungah nasem in aomkhin ahih manin nungaknu pen zintun muangmahmah lel khading hi. Ahi zongin azinpa ahi apa in ama lametna tawh ki lehbulh in navaidawn a, zawhthawhthu tawh lupnatung ah nabuan gawpmawk hi.

Hih nungaknu pen kum 16 bek hipan a, Malaysia Borneo Island tung aom Sarawak State pan ahihi. Hih nungaknu ii apa pen kum 38 phakhinta a, amahzong sumlepaai hamsatna tawh Sarawak ah zi leh tate nusia in Kuala Lumpur khuasung Chow Kit veng aom Lorong Haji Taib ah inndei khat saap in nasem in aom ahihi. Anasep ahihleh biakna laibu tuamtuam azuak ahihi.

Nungaknu pen lametna tampi tawh August 26 ni in Kuala Lumpur khuapisung hongtung a, apa innsaapna ah tungsuakpah hi. Atunzawh asawt hetlo, nai 8 khitciang in apa in Rape kipanpah cimawk hi. Atunni azan 12:05am hun in atanu luppihding in hongki thawipah a, atanu zong na utsamlo ahih manin asuahtaktheih nading in ki tomngawp hi. Ahi zongin thagum zawhthawhthu tawh apa in lupna tungah na ompih teitei a, atanu pen akam nangawn tawh azahmawh tawpsak cimawk hi.

Nungaknu pen Kuala Lumpur khuasung ah pilna sinbehding, nasephoih ngahding cih lametna tampi tawh hongzinkhia hi a, ahi zongin Kuala Lumpur khuasung atunzawh nai 8 khit ciangin a lametna te hong lungkiat huai mahmah hi. Apa in hihbang in agamtat pen midangte tungah agenloh nading in temta tawh vougawp cihi.

August 26 atunzawh akipan kalthumsung bang zawhthawhthu tawh atanu luppih a, September kalthumna ciangin Police te panpihna tawh hong suaktatheipan hi. Athu theician te genna ah apa in sektawhzong akhuk khetsak a, benggawp, suigawp banah temta tawh agawl ah ngaksa in midangkiang agenvetlohding apa in vougawp cihi.

Apa innsaapna geipen Chow Kit Police Station tawh kinai mahmah a, ahi zongin apa ii vouna hangin nungaknu in kuama kiangah genkhia ngamlo in imcip hi. Ahi zongin akamphatna tawh cidinghiam a innveng te’n nungaknu akahzel awging khawng nagalzak uh ahih manin Sarawak aom anu nazasak uh a, September 08 ni in anu’nzong lunghimawh in Police Report nabawlpah hi.

September kalthumna Thursday ni ciangin Police te’n hihte pata omna inndawl pen akiuhkiuh hangin kongkhak kihonlo ahih manin, anunung ah Police te’n kongkhak sukham in alut uhciangin asungah apa leh atanu na om hi.

Atanu in palik te amuhciang in nuamlua in taiphei a, palik numeikhat kawiphei, pomphei in kapgawp cihi. Police te apa mansuak uh a, thubawlding cih Malay Mail Online pan kiza hi.

Hihbangthu ihsuahsak ciangin ihkiim ihpam ki phawkthak nading lunggulhna ahihi. Hihbangdan bawlsiatna athuakkha khinkhian innkuansung pawlkhat ah omthei hi. Natheihkhak aomleh amanlang in kumpi thunei te tungah zasak lecin micimawh ahonkhia nahiding hi. ZD Sawltak #zomidaily