Malaysia ah Nu leh Pa Pawi nopcitak kibawl
Abeisa Sunday 26 July 2015 ni in Malaysia gamsung aom Zomi Catholic Community Malaysia (ZCCM) in Sentul aom St. Joseph biakinn ah Nu leh Pa Pawi nopcitak in kibawl theihi.
Zingsang 10:45am in nautuisawp tawh kipan a, inntek Topa Rev. Fr. George Packiasamy in ih naungek mi 5 te hong tuisawpsak hi. Inntek Topa in ei Zomi te hong tuisawpsak cilna zong hipah hi.
Tuisawp amankhit ciangin 11:30am in Missa biakpiakna kipansuak a, Rev. Fr. George Packiasamy mahin Parents’ Day Mass hong bawlsak hi. Biakinn anuaidawl pen mi dimlet ahih manin adawl nihna dong kizangto a, mipi 1200 val bang nopcitak in biakpiakna ki neikhawmthei hi.
Missa biakpiakna amankhitphet in biakinn tualzang ah annekna tawh kizomsuak a, annek khitphet 1:30pm hun akipan Community Hall ah Nu leh Pa Pawi (Parents’ Day Celebration) kizomsuak leuleu hi. Mipi nekding in itna tawh an hong piakhia Pa Phillip Mawngpi (Taungzalat) te innkuan tungah lungdam mahmah hi.
Amasa in Pasian thusinna pan akhatna, anihna, athumna ngahte Rev. Fr. George Packiasamy in pahtawina hongpiaksak hi. Tuakhit ciangin ZCCM in Rev. Fr. George Packiasamy zong lungdam kohna in Zongeina Puanlaisan khat kisilhsak a, amanzong hanthotna tomno khat hong neisuak hi.
Hun kipatkhit ciangin kum 60 aval khin ih Pi ih Pu te amailam ah hongtut nading un kisam a, kum 60 val mi 10 bang hongki helthei ahih manin lungdamhuai mahmah hi. Hih kum 60 avalkhin ih Pu ih Pi te inzong mipi thuphapiakna hongnei uh a, mipi ki khukdin zihziah in lungkimtak in thupha kidawh ngeingai hi. Tuaban ah Pa Phillip Mawngpi (Taungzalat) te innkuan mahin hih ih Pi ih Pu te pahtawina nik leh puanten khattek hong piaksak uh a, ZCCM inzong Puanlaisan leh Puandum ngawng awh khattek tawh ki pahtawi hi.
Khangno te’nzong Nu leh Pa itna la hoihnono dawng tampitak hongsa sialsial uh a, Kawlgam pan hongzin lasiam Sia Muanpi inzong la hongsathei ahih manin ki lungdam mahmah hi.
Hun amankuan ciangin Nu leh Pa te pahtawina in Puanlaisan leh Puandum ngawng awh abanban in ki oksak zihziah a, Stage tungah Group Photo lakna ki neisuak hi. Hunkhempeuh nitak 4pm in kimansiang thei a, huntawpdong Nupi Papi 200 valbang hongtusuak uh ahih manin tukum Nu leh Pa Pawi pen lawhcing bekthamlo, lungkimhuai mahmah hi.
Hih Parents’ Day ah hongkihel mipi khempeuh, nek leh dawn, letsong tuamtuam hongpiakhia te leh agim atawl abuai khangno te, makai te khatciat tungah lungdam mahmah hi. ZCCM
Comment piaknop aomleh...