Malaysia ah IS migilo tetawh akizom mi 3 kimatbeh leuleu, khatpa Kawlgam paisawm

Malaysia ah IS migilo tetawh akizom mi 3 kimatbeh leuleu, khatpa Kawlgam paisawm

Malaysia gamsung ah abeisa kalsung in IS migilo mi 3 kimankhia cih theStar pan kiza hi. Tua akiman IS migilo tepen Malaysian gammi vive hi uh a, Abu Sayyaf and Al-Qaeda kici migilo tetawhzong akizom uh cihi.

Bukit Aman Special Branch Counter Terrorism Division te makaihna tawh abeisa September 08 panin September 10 kikal sungteng Malaysia gamsung State 3 sungah akimankhia ahihi. Aki matkhiatna State 3 tepen Perak, Selangor, Melaka cihteng ahihi.

Inspector-General of Police Tan Sri Mohamad Fuzi Harun in agenkhiatna ah amasa pen amatkhiat uhpen September 08 ni hi a, Perak State sung aom Bagan Serai khuasung pan amatkhiat uh cihi. Tua amatkhiatpa uhpen kum 21 aphakhin pasal khat ahihi.

Tukum kipatcil hunpawl akipan IS migilo tetawh kizom hiding ci uhhi. ISIS te bekthamlo, Al-Qaeda leh Abu Sayyaf Group (ASG) kici migilo kipawlna tetawhzong kizopna nei cihi.

Tuaban ah Bomb bawl asiam mahmah in akigen Dr Mahmud Ahmad leh Saudi Arabian bomb expert khatpa tungpan inzong Improvised Explosive Devices (IED) kici apuakkhamthei vanbawldan sinna nei cihi.

Hihpa in abeisa in thumvei bang Bomb bawlding in kipan ngeikhin cihi. Tuaban ah Syria gamsung aom Malaysian IS galkap khatpa tungpan in sawlna ngah a, Pistol, M-16, AK-47 Rifle cihte banah Hand Grenade te leisak cihi. Tuate tawh Malaysia gamsung aom Muslim ahilo, adang biakna te ii biakpiakna ah asukhamding in akithawi cimawk hi. Aki matkhiatna a innsung ahzong Bomb bawlnading in akizang Chemical honkhat kimukhia cihi.

Adang akiman khatpa pen September 10 ni in akiman ahihi. Hihpa pen Cendol Seller khat hilel a, kukm 38 aphakhin khat ahihi. Hihpa nasep ahihleh IS Flag dialkhai te hawmkhia in, IS migilo te nasepna teng apulak, midangte alawpsak khat ahihi.

Hihpa pen Philippines leh Myanmar, Rakhine State sung aom IS te kiangah paiding asawmsawmkhat cimawk hi.

Athumna akimanpa pen September 10 ni in Petaling Jaya sungpan akiman ahihi. Hihpa pen tukumbei kuanpawl ah Syria gamsung aom IS tekiang apaisawm ci a, amahpen Malaysia gamsung ah Bus Driver asem hi in, kum 41 aphakhinkhat cihi.

Related: Myanmar, Rakhine State sungah gamdangmi 28 gunkuang tawh kiman

Hih mi 3 tepen “Security Offences Act (Special Measures) 2012 (Sosma)” thukhun tawh kizui in kiman uh a, thu kibawlding cih kiza hi. Myanmar, Rakhine State sung ahzong IS tetawh akizom migilo pawlkhat aom khinkhian hihtuak mawk hi. Sawltak #zomidaily