Makai hoih in pilna thupi sa ~ Pau Khat Suan

Makai hoih in pilna thupi sa ~ Pau Khat Suan

Mipil mihoih makai in nautang leh khangthakte’n thuthei a a pil ding deihsak a, Mihai leh ukcip nuam lungsim sia makai in pilna leh thutheihna khaktan in, mipi’ mit humcip ding hanciam den hi.

“Pil peuh leteh midangte’n na na ong sem lel ding uh hi..” ( LKY ). A gam a khantohna ding in khangthakte’ pilna thupi ngaihsut mahmah a, executive power peuhmah ama’ munciat ah a pil penpen, a pil mahmah, a thei mahmahte mah makai sak pah hi.

A khangto thei mahmah lo, thatang suang a ukcip leh angsung ading meetdawh ding bek a ngaihsun den makai in amah sang a pil zaw, a siam zaw, a thei zaw makai thei mipil leh thuthei a khankhiat khak ding leh tuabang mite in mun a ngah khak ding patau den hi. Khaktan theihzah in khaktan den hi. Mipi’ in thu a theih khak ding patau a, mit humcip sak ding hanciam hi. A suuksia deuh munte ah makai khat bek in munkhempeuh sawk in vai khempeuh sai, siapi sem kawikawi nuam den hi.

Kipawlna khatpeuh ah mipil leh thutheite kinawlkhin, kipampaih a, mipil leh siamna neite in tua mun nuam salo, kihel lo in, mipi’ tung ah thugil a kigen kei leh tua kipawlna kimakaih zia diklo hi.. kici thei pah a, muan leh belhtaak kipawlna hilo hi kici thei pah hi.

Leitung vai kipawlna genloh Pasian’ thu tawh kalsuan vaihawmna biakinn leh pawlpi nangawn tuabang mah ahi hi. Tuabang munte makaipi khat sang a mipi pilzaw ngeilo ( kikhaktan ahihman in ) a, khangto lo, mi banlo den hi.

A khangto leh gualtung tuang kipawlna, pawlpi, gam leh minam i ut leh pilna thupi ngaihsut a, mipil misiamte amau’ mun ding mah ah koih thei in, khangthakte i makaih i pattah siam ding kisam mahmah hi.

Zomite’n pilna leh mipil thupi ngaihsut leng… lunggulh huai ei maw… Pau Khat Suan