Maisakna pen mangngilh sitsetna hilo

Maisakna pen mangngilh sitsetna hilo

Mi pawlkhat in, “maisakna pen mangngilh sitsetna hi” ci uh hi. Tua ahih leh maisak ing na cihte pen na maisak ni, na maisak hun lian mahin, na ngaihsut theihna khuak panin a bei sitset pah hiam, i van khatpeuh i mansuah lian dan mahin a mang pah sitset takpi mah hiam cih nang leh nang na kitelpen ding hi. (Neu lai thute leh naa i sak luat loh pawlkhatte bel ahunzui-in ki mangngilh thei mah hi, tuate pen maisak mana mangngilh kihi loin sawt luata (or) mangngilh zawh loh ding zah dongin thulian lua lo cihna hilel hi).

Gentehna in; Nungak no khat pasal ginalo khat in buan hi. Ahi zongin nungak no in zong 100% (za-ah-za) maisak hi(maisak takpi hi). A maisak hangin a khantawn in tua migilopa’ buanna pen mangngilh hetlo dinga, a mit kha ah mang theilo ding hi. Maisak ahih manin a sia tawh thukkik loin a thei nawnlo bangin a om hibek hi. Leitungah nungta khuasa-in ngaihsut theihna khuak na neih lai teng na maisak thute zong na phawk lai veve ding hi. Tua pen ahi ding mah ahi hi. Pasian in ngaihsut theihna lungsim leh phawk theihna ding khuak hong pia, hong neisak lai ahih man hi.

Pasian in zong i mawhnate hong maisak ciangin, a beisa huna i mawhnate a thei nawn vetlo(a mangngilh)sitset hi hetlo hi. Na khempeuh a piangsak Pasian in i mawh i khialhnate nak theih lai lua, nak tel lai lua hi. Dik lo pi dik hong tangsak khin zo ahih manin a thei nawnlo, a phawk nawnlo bangin a om hibek hi.

“Maisakna pen mangilh sitsetna hi loin, a thei nawnlo, a phawk nawnlo bangin lungsim siangtho tak tawh om hithiatna hilel hi.” Topa’n hong telsiamsak ta hen. Amen .

*(Kei’ mimal muhna hi-a, maanpen ding cih hituan lo hi).

Khazih sungah, David Tuang