Mailam kalsuan ziading ~ Dr. Ngul Khan Pau

Mailam kalsuan ziading ~ Dr. Ngul Khan Pau

(Joshua 3:1-17) Pasian in Joshua hopih in a paina ding uh lampi hilh hi. Amaute ompih ding leh thahatna pia dingin thu ciam hi. Kum sawm li sung gamdai ah kileh koikoi in a om hun uh bei ding hita a, amau adingin gamciam a tung ding uh hita hi. Mailam i cih ciangin i pai ngei lohna hi a, lampi tot khialh ding lauhhuai mahmah hi. A beisa hunte ah i tuahkhaksa thute’n hong huh theihna ciang a om hangin mailam adingin zat pak ding baih tuanlo hi.

Zomite ngeina i et ciangin “mailam” sangin “nunglam” en mite kihizaw hi. Mikangte tawh i kibat het lohna ahih leh amau “mailam” adingin nungta uh a, ei pawl bel “nunglam thute” lungngaihna tawh kinungta hi. Mailam lametna gen ding tampi i neih loh hangin a beisa thute lungngaihna tampi kiciamteh hi.

Kadesh, Param gamdai panin Kanaan en dingin Moses in Israel tangmi sawm leh nih sawl hi. Amau lak panin mi sawmte in, “Kote nong sawlna leitangah ka va tung uh hi. Tua lai-ah bawngnawi leh khuaizu tui bangin luang a, hih pen tua gama gah ahi hi. Ahi zongin tua gama teng mite thahat uh a, a khuapite uh kulh tawh ki-umin lian mahmah hi. Tua banah Anak’ suanlekhakte tua lai-ah ka mu uh hi,” ci uh hi.

‘Pasian thahatna tawh luahto ni’ cih sangin ‘luahzo kei ni’ cih tawh Israel mite lungkiasak uh hi. Tua hangin kum sawm li sung Pasian in a umlo khangkhat a sih khit madong gamkeu, gamdai lakah kileh koikoisak hi. Upna tawh gamthak luah thei bek ding uh a, amau thahatna tawh a luah zawh ding uh hilo hi. Pasian gamciam “bawngnawi leh khuaizu luanna” hong tung petpet tading ahih manun; Pasian in Joshua kiangah Israel mite kalsuanzia ding lamlak hi.

I. PASIAN THUCIAMNA SINGKUANG ZUI IN (Aneu 1-4)

Israel mipite’n mailam lampi a theihna dingun “Topa na Pasian uh Thuciamna Singkuang Levi siampite in a puak na muh uh ciangin na omna panun dingkhia-in na zui ding uh hi,” cih thu ngah uh hi (Aneu 3). Banghang hiam cih leh Thuciamna Singkuang in Pasian ompihna lim lak hi. Thuciamna Singkuang cih sagih vei a lian thum sungah kigelh hi. A siangtho penpen kici munah kikoih in, Pasian vangliatna leh thupitna pulakna zong ahi hi. Israelte adingin Pasian amau kiangah om cih theihna hi a, tua Singkuang a pai ciangin pai ding, a khawl ciangin khawl ding cihna hi. Ei zong thupha ngah minam leh Pasian zat minam i hih ding leh Pasian zia leh tong i theihna dingin Thuciamna Singkuang zuih ding kisam hi. Zui ding cih ciangin masa lo ding cihna hi. Pasian omna Thuciamna Singkuang a siangtho ahih manin a kikal uhah pi tul thum bang om ding ci hi. Tua bek hiloin mi khempeuh in a muh theihna dingin a kikal uh kihal dingin thupia hi.

I Pasian pen zuihtak leh zuih dinga muanhuai penpen hi. Banghang hiam cih leh na mailam hong tung ding khempeuh Ama’n thei khin zo hi. Na paina ding lampi na thei kei hi, ahi zongin nang hong hilh dingin Amah mansa in om tawntung hi. Joshua kiang bekah thuhilh ding hi loin Amah lam a en to khempeuh thuhilh nuam hi. Ama kamciam in, “Na paina ding lampi lakin ka hong hilh ding a, ka mit tawh hong enin thu kong hilh ding hi,” ci hi (Late 32:8). A lamdang mahmah khat ahih leh khatveivei Pasian sangin a pilzaw bangin i kingaihsun hi. Kei nuntakna keima ut bang deih bangin gamta ning i ci uh hi. Ahi zongin Pasian loin kua in nuam sa taktak ding hiam?

Pasian zuite in amah zahtakna tawh gamta uh hi. Mit tawh a kimuh theihloh hangin mihing lungsim ngaihsutna Ama’n sittel hi. “Keimah Topa in mi khempeuh’ nuntakzia leh a gamtatna tawh kizui-in a piakhia dingin ngaihsutna ka entel a, lungsim ka sittel hi,” ci hi (Jer 17:10). Na gamtatna panin midangte’n na lungsim hong thei bek uh hi. Ahi zongin Pasian in na gamtat ma in na lungsim thei khin hi. Amah zui i hih leh i gamtatna tawh lak ni. “Khris hanga Lungdamna Thu tawh a kilawm a kituakin na nuntak ding uh a thupi pen hi” ci-in Filippi Pawlpite kiangah gelh hi (Fil 1:27). Sawltak Paul in i nuntakna leh Lungdamna Thu a kitonkhop ding thupi sa pen hi.

II. PASIAN MAI AH SIANGTHO UN (Aneu 5)

Sianthona omloin Pasian tawh kinaih theih hilo hi. Banghang hiam cih leh i Pasian siangtho hi. “Note a hong sampa a siangtho ahih mah bangin note zong na gamtatna khempeuh uhah na siangtho un. Lai Siangtho sungah zong, “Keimah siangtho ka hih manin note zong na siangtho un,” na kici hi (I Pet 1:15-16). Siantho ding thupiak ahi hi. Pasian deihloh na khempeuh na nuntakna panin na koih khiat ding cihna hi. Mi pawl khatte’n, “Bang hangin Pasian in hong hopih ngei lo hiam?” ci uh hi. I Lai Siangtho in, “Nuntak siangtholo tawh kuamah in Topa mu zolo ding ahih manin nuntak siangtho na nungta un,” ci hi (Heb 12:14). Nuntakna nin mahmah ahih hangin Pasian thu lah lunglut mahmah cih bang om thei hilo hi. “Siangtho” i cih ciangin na dang tawh a kihello, kisawhlo, kibanglo cihna hi. Tua banga i siantho theihna dingin thuli khawng gen khawm ni.

1. “Siangtho ding” cih ciangin pumpi mahmahah kithawikholh, kigingkholh ding kisam hi. Joshua leh Israel makaite’n mipite kiangah Pasian santaak a siangtho hi dingin hansuah uh hi. Pumpi sianthona dingin kithawi a kul mah bangin lungsim sianthona dingin zong kithawi kholh kul hi.

2. “Lungsim ngaihsutna” lamah sianthona cihna hi. Leitung pumpi bangzah in i sawpsiang zongin i lungsim a siantho kei leh Pasian nasep lamdang kimu tuanlo ding hi. Pasian santaak lungsimin Singlamteh tunga kibua sisan in a sawpsiangte ahi hi. Tua ciangin i Khristian nuntakna ah a lui nate nusia in a thak nuntakna tawh nungta ni. “Zuauna lungsim in a suksiat khitsa, nidangin na nuntakna ngei uh ahi na pianlui uh paikhia un la, na lungsim uh leh na ngaihsutna uh thaksuak sak un. A thutang a siangtho ahihna thu, nuntakna mahmah panin a kilangsak, Pasian’ pianzia tawh kibangin a kibawl na ngeina thak uh bangin na nungta un,” (Efesa 4:22-24).

I mihing lui nuntakna paikhia in Khris Jesu sungah mi thak nuntakna tawh khangto ding cihna hi. Sawltak Paul in mihing lui sihsak ding Khris ah Pasian suun dingin thaksuak tawntung dingin hansuah hi. “Tua ahih manin nu-leh-pa mawhna, a kilawmlo gamtatna, hukna, lanna, a hoihlo lunggulhna, leh milim biakna nam khat ahih manin huaihamna ahi note sungah a om leitung lungsimte na sisak un. Ama thu a manglo mite tungah hihbang gamtatna hangin Pasian’ hehna hong tung ding hi. Note pen hihbangin gamta-in a nungta ngeite na hi uh hi.

Ahi zongin tu-in hehna, thangpaihna, muhdahna, gensiatna, kam hoihlo pauna cihte nei nawn kei un. Ngeina lui leh gamtatna lui khempeuh a beisakkhin na hihna uh kithei-in khat-le-khat tungah zuauthu kigen nawn kei un la, ngeina thak tawh kituakin gamta un. Eite a hong piangsak Pasian a kicing takin i theih semsemna dingin amah a sun dingin a hong thakbawl tawntung ahi hi,” (Kol 3: 5-10).

3. “Pasian tawh kimu ding” ahih kei leh “Ama na lamdang bawl mu ding” ci hi. James in, “Pasian kiang nai un. Amah in zong hong nai ding hi,” ci hi (James 4:8). Pasian kiang naih leteh Ama’n zong nang hong naih ding hi. Pasian tawh kituak dingte in Ama kiang a naih nuamte ahi uh hi. A naih nuam i cih ciangin Pasian lunggulhna nei, dangtakna nei cihna hi. “Sakhi in tuiluang sialsial a lunggulh bangin nang ka hong lunggulh hi, ka Pasian aw,” (Late 42:1). “Pasian aw, keima Pasian na hi hi.

Nangmah kong zong a, ka lungsim khempeuh tawh nang kong deih hi. Tui omlohna gamkeu bangin ka pumpi bup in nang hong deih hi,” (Late 63:1). Bang na lunggulh pen hiam? Bangah na dangtak pen hiam? Na lungsim khempeuh tawh na zon bang hiam? Lungsim khempeuh tawh a zongte kiangah Topa kilak hi. “Note in kei nong zong ding uh a, na lungsim khempeuh uh tawh nong zon’ uh ciangin nong mu ding uh hi,” (Jer. 29:13).

4. “Kipumpiakna” – Siangtho mite Pasian kiangah a kipumpiak mite ahi uh hi. Kipumpiakna leh siangtho kizom tawntung hi. “Tua ahih ciangin note ki-ap un la siangtho un; bang hang hiam cih leh kei pen Topa na Pasian uh ka hi hi. Ka thukhamte zui un la, tuate sem un; note a hong siangthosak Topa pen keimah ka hi hi,” (Siam 20:7-8). Pasian tungah ki-ap ding, tua hi leh siangtho mi suak ding, banghang hiam cih leh Pasian mahmah in hong siangthosak hi.

Sawltak Paul in, “Tua ahih ciangin sanggamte aw, Pasian in eite tam veipi tak hong hehpih ahih manin ama lungkimna ding leh ama nasepna dingin nomau mahmah a hingtangin Pasian tungah na kipiakna dingun ka hong thum hi. Tua banga kipiakna pen Pasian biakna man taktak ahi hi,” ci-in Rom Khristiante kiangah lai na khak hi (Rom. 12:1).

III. PASIAN MUANNA TAWH JORDAN GUN KAN UN (Aneu 6-17)

Israel mite’n Kanaan gam a lut theihna dingun Jordan lui kan kul hi. A lui kan ding uh Lai Siangtho i et ciangin hih a nuai a bangin kalsuan ding ci hi:

1. Siampite in Thuciamna Singkuang pua in Jordan lui ah pai ding: “Thuciamna Singkuang a pua siampite thu na pia ding a, ‘Jordan tuite’ gei na tun’ uh ciangin Jordan tui sungah tangloin na ding ding uh hi,” (Aneu 8) leh “Leitung buppi’ Topa ahi Topa’ Thuciamna Singkuang a pua siampite’ khete in Jordan tui a sik ciangin Jordan tuite luang nawnlo ding a, a tunglam panin hong luangsuk tuite lomkhatin khawl ding hi,” ci hi (Aneu 13). Jordan lui tua hun lai takin khang hi, kici hi (Aneu 15). Amasa in Siampite in Jordan lui tuilet zihziah amau khe tawh ngapsuk ding cihna hi.

Siampite adingin zong baih hetlo ding hi. Banghang hiam cih leh San Tuipi hong kan lai un a tuipi kikhen masa in leikeu tungah pai uh hi (Pai 14:15-31). Ahi zongin Jordan lui upna tawh ngapsuk ding in thupia hi. Jordan lui tui khangin a piautaak dongah tuiluang tua siksuk ding cih pen thubaihlo ding hi. I nuntakna ah “Jordan lui khang” kituak tawntung hi. Khristian nuntakna ah na picin nop leh na “Jordan” gun na kan kul hamtang hi. Tuipi bek na et leh na galkai ngei kei ding hi. Hih lui khang upna tawh kaan ding hi. Nangma tha tawh na hihtheih bangmah omlo hi. Mit tawh na muh loh hangin upna tawh kalsuan in. Na khe tawh na siksuk mateng a tui kikhen ngeilo ding a, tua tuipi sungah leikeu tawnin zong na pai ngei kei ding hi.

2. A nungta Pasian note lakah a omna hih thu tawh na thei ding uh hi: Jordan lui galkai ding bek hi loin Kanaan gam sunga teng namdang khempeuh Topa Pasian in hawlkhia ding ahih manin Topa amau lakah om hi cih kitheihna tua hi ding hi, ci hi. Israel mite khangthu ah “Pasian ompihna” a ngah laiteng uh gal zo-in gual tungtuang den uh hi. Ahi zongin Pasian’ ompihna a ngahloh uh ciangin guallelhna, maizumna, niamkiakna tuak uh hi. Jordan gun kan ding zong Pasian ompihna hangin galkai thei bek uh hi. Nang zong Pasian ompihna na tel maw? Ama ompihna panin pialkhia dingin hong sam tam mahmah lakah Ama aw na za tawntung maw? Topa omna mun peuhpeuh mun nuam leh manpha hi.

Tua hangin kumpi David in Topa omna a lunggulhzia hi bangin gen hi. “Topa’ tung panin na khat ka ngen khin a, tua ngenin ka zon’ ding pen: Topa’ inn sungah ka khan’tawntung in om ding, Topa’ hoihna et ding leh ama biakinn sungah thu dot dingte ahi hi,” (Late 27:4). “Vanglian Topa aw, nangma ten’na mun bangzah takin etlawm ahi hiam? Ke’n ka lunggulh mahmah hi. Topa’ huangsung ka lunggulh mahmah a, ka lungsim leh ka pumpi a nungta Pasian’ tungah lungdam mahmahin la a sa hi,” (Late 84:1-2). Hih leitung deihgawhna in nang zong hong zol maw? Na Topa nusia dingin khemin na om maw? Sawltak Paul naseppih Demas in zong leitung sum leh pai mah deihgawhna hangin Lungdamna Thu nasep nusia hi. “Demas in hih leitung thu kinzaw ahih manin kei hong nusia-in Thesalonika khua-ah a pai hi,” (II Tim 4:10).

Banghangin Thesalonika khua ah pai hiam? Tua khuapi kiangah leisung panin siksan kitokhia in sum leh pai muhna baih mahmah hih tuak hi. Tua hangin Demas in vantung sum sangin leitung sum zong dingin Paul na nusia hi. A nungzui tampite’n a nutsiat uh ciangin Jesu in a nungzuite kiangah, “Note zong na ciahkik nuam mai uh hiam?” a cih ciangin Simon Peter in, “Topa aw, ciah le ung kua kiang zuan mawk ding ka hi uh hiam? Nangmah in nuntak tawntungna ding thu na nei hi. Tu-in nang ka hong um uh a, Pasian kiang panin a hong pai a Siangtho Pa na hihna thu ka hong thei uh hi,” ci-in a dawng hi (Johan 6:67-69).

3. Israelte khempeuh lei keu tungah galkah uh hi: A lamdang mahmah khat a hih leh Pasian in Jordan lui sungah Israelte lei keu tawnsak hi. Thumanna hangin na lamdang amau mahmah in mu uh hi. Jordan galkai ding amau geel hiloin Pasian geel hi. Israel mite’n Psian geelna bangin a gamtat uh ciangin na lamdang mu uh hi. Nang zong na lamdang na nuntakna ah na mu nuam hiam? Tuni in piangthei ngei ken teh na cih, Topa thumanna tawh na gamtat ciangin na lamdang hong suak a om ngei hiam? Topa in a thuciamna panin nungkik ngeilo hi.

Na upna bangin na lamdang na mu ding hi. Pasian tawh tonkhawm mite adingin Topa in lampi om ngei lohna ah lampi bawlsak hi. Pasian in tuni mahmah in zong nang adingin na lamdang hong bawlsak nuam hi. Jordan lui tui luangsukte khawlin khanglo hi. Ama geelna tangtunna dingin a bawlsa na khempeuh Topa in zang hi. Khatveivei Pasian in leikeu hong tawnsak loin buannawi hong palsak hi. Tua bang hun ciang zong hong ompihlo hi tuan lo hi.

Na mailam kalsuanzia ding na theih kei leh Topa dong in. Amah na zuih leh lam na khial ngei kei ding hi. Ama ompih mi na hihna dingin a siangtho lampi tawn in. Na Jordan lui na galkai theihna dingin Topa thuciam muang inla, Ama thu mangin. Topa in na nuntakna a lamdang hong suaksak hen. Rev. Dr. J.M. Ngul Khan Pau