Mai kum 5 sung etkholhna ~ Pu Thangboi

Mai kum 5 sung etkholhna ~ Pu Thangboi

NLD in tutung 2015 kum lai sang in tam hong ngahzaw lai mawk in dahhuaisa ing.

Bang hang ?

Amah alangpang ding om nawnlo. Nainganzi ah langpang pawl (opposition group) a om kei leh hoih ngeilo hi. Aanaashin (dictator) suakbaih mahmah hi. Langpang pawl thahat leh mipi metzaw hamtang hi. Tu’n NLD te’ thanemna akawk ding langpang pawl gina om nawnlo hi.

Minam Neu Pawl

Ei minam neute’ sunmang gamla tektek in ka um hi. Minam party te upmawh zah in ong thahat zolo ahih man in dahhuai hi. Kawlte nuam mahmah un ka um hi.

ZCD Dinmun

ZCD pan state ah 1 leh union ah 1 kah aih teh abeisa kum 5 lai dan mah in nainganzi sepkhuan ngah lai hi. Asep nop leh sepnop loh bel thu tuam ci ni. Chin state sung pan minam party lak ah ahatpen mah hong suaklai veve hi.

Tu a akah tegel in mai kum 5 sung na hoihtak hong sepzawh leh 2025 kum ciang in ZCD lam et omlai ding a, asep zawh kei uh leh bel ZCD bei theiding hi.

Tedim Dinmun

Abeisa kum 5 sung MP asem sa mi 3 in demkik in khat zong kahlo ahih man in ahang pen gen takei leng siang mahmah hi. Tom gen leng mipi na lungzuang mahmah ta cihna hi.

2010 kum khit anih veina gambup a uk party (ruling party) sung ah ih lutna ahi hi. Mai kum 5 sung bang ih semzo taktak hiam cih in Zomite’ mailam ding tampi hong khentat ding hi.

Tonzang Dinmun

Tonzang ah NLD leh ZCD in langhawm linlian ahih man in hoih mahmah hi. Ataktak in Tedim zong hoihtak in kiho khol in langhawm leng hoihzaw ngelngel ding hi.

ZCD leh NLD nasep hong kidem ding uh hita ahih man in ih gam leh ih mi ih sa tading in hoih mahmah hi. Tulaitak a MP sem 3 in dem uh a 2 kahkik ahih man in akah tegel in abeisa kum 5 sung anasepna uh mipi in thangah gawp cihna hi. Lungdam huai.

Panmun Vai

Tedim pan state ah vuanzi khat peuhmah bel hong kah in um ing. Tua val bel lam et ding om kei. Tonzang pan bel MP lak ah state ah vuanzi angah ding kahawi omkei mai. Ong piaknop tantan uh leh MP lo khatpeuh hong kaito thei unteh. Tonzang in state ah vuanzi lam et ngam huai phakei. Chin state ah vuanzi 7 bek hi.

Thukhat ah bel tutung Pi Cing Ngaih Mang in Naypyitaw ah gambup panmun khat hong ngah khatam ci giugiau ing. Bang hang ?

• Numei khat hi
• A degree zong sang hi
• Mel theih neita hi
• Tuni ciangciang min hoih nei hi

Tuaban ah

Atung a ih lung himawhnate Daw Su in zong ngaihsun khangel ding aih teh tutung minam party pan akah sunsunte sung pan panmun piak theihte piak ding khawng hong vaihawm thei ding hi. “Ko NLD te’n minam neute kahuai veve uh hi” cih hong laknuam khangel ding uh hi. Kawl galkap te’n zong gambup kilemna ding vai gen pah malam aih teh tua in zong tawsawn khangel ding hi.

CM Vai

Chin state ah Chief Minister ding bel U Soe Htet mah ka lam en pen hi. Amah hileh ei’ ading in zong hoih pen ding hi. Abeisa ate dan in ong haza vauvau samlo ding hi.

Kipuahphat Hun

Hong pai ding kum 5 pen Zomi tading in ki puahphat hun ahi hi. Abeisa hunte hoihtak enkik in gam leh minam khualna tawh nakpi in ih kipuahphat ding hun ahi hi. Bang kim ah ih ki puahphat kulta hi. Ih ki puahphat zawh kei leh tu a dinmun sang in ih niamkiat suk tektek zawlai ding hi. Genkhialh A Om Leh Ngaidam, Mung Laan Thang (Tonzang, Zogam)