Luxembourg gamah meileng kiphukha, mi 1 si, 2 liam

Luxembourg gamah meileng kiphukha, mi 1 si, 2 liam

Europe sung aom Luxembourg gamah Tuesday (Feb 14) ni in meileng kiphukha a, meilenghawl khat si cih AFP pan kiza hi. Aki phukha meileng tepen mi apua Passenger Train khatleh van apua Freight Train khat ahihi. Asipa pen Passenger Train ahawlpa hi a, Red Light kantan in taisuakkha ahih manin, Freight Train khattawh aki phukha ahihi.

Hih meileng kiphutkhakna hangin Passenger Train tungah atuang ahawlpa in sihlawh a, anungzui Conductor pazong limliam mahmah hi. Freight Train ahawlpa zong liamgawp hi.

Hih Passenger Train tungah khualzinmi adang omlo in, ahawm in apailaitak hibilbel ahih manin mitampi sukhalo hi. Hih meileng pen Luxembourg gamsung aom Bettembourg City leh France gamsung aom Zoufftgen City kikal atailaitak in GMT 0800 hunin atuahsia ahihi.

Traffic Management System panin thuneite genna ah Passenger Train in Red Light kantan in taisuak ahih manin, akhatpen tawh aki phukha hi ci’n genkhia uhhi.

Luxembourg Prime Minister Xavier Bettel inzong Train Driver pa sihna hangin Twitter tungtawn in dahpihna pulakkhia hi. A sanggam, innkuanpih te leh naseppih lawmlehgual tetawh akibangin kadahkhawm hi ci’n pulakkhia hi. Tuaban ah hih meileng tuahsiatna hangin aphual ah abuai Rescue Workers tezong lungdam mahmah in, kong zahtak hi ci’n pulak hi.

2006 kumlai inzong hih tuahsiatna tawh aki gamlalualo apamdiak khatah Passenger Train khatleh Freight Train khat ki phukha ngei uhhi. Tuahunlai in mi 6 in sihlawh a, adang mi 23 takin liamlawh uhhi. ZD Sawltak #zomidaily