Lungsim Limlangh (57) ~ Job Thawngno

Lungsim Limlangh (57) ~ Job Thawngno

[1]. Ngaihsut kibang lo, mi 2 nasep khop pen tha ki tuaklo bawnglengkai tawh ki banghi.

[2]. Ui-in akih tak te tawngin akih tak loh te pet a, mihing hong kihta te-in hong koko-in hong kihta lo te-in hongsu’ ek hi.

[3]. Pasian in mawhna pulaak pah lo , thukpah lo a, a pulaak teh mi mai ah pulaak-in athuh teh akhangin thuk hi.

[4]. Tulai tangval te leh Nungak te ki it lo-in ki ngai uh a, khantawn ading hi lo-in tawl khat adingin ki teng uhhi.

[5]. Na lian khat ihsep zawh ciangbek in phatna ki ngah a, na nengno khat ihsep khelh ciangin gensiat ki ngah hi.

[6]. Mi pawl khat te ami pumpi piangthak-in, aneihsa piangthak lo a, mi pawl khat te ami pumpi piangthak lo-in aneihsa piangthak hi.

[7]. Ih piakding sumpi atawm ciangin ki thumaan zolo a, ih piakding sumpi atam ciangin ki ha-za thei hi.

[8]. Nuihna khempeuh nuamna hi kiim lo a, kahna khempeuh dahna hi kiim lo hi.

[9]. Vantung atung mite adingin leitung pen HELL tawh ki bang a, HELL atung mite adingin leitung pen vantung tawh kibang hi.

[10]. Mihing in ei-bek amaan ih ki sa-a, ahi zongin Pasianin kei mawh nei hing aci te deih hi.

[11]. Hong kiphah ciangin nui pah pekpek ken la, hong ki gensiat ciangin puam pah ngeungau kei-in.

[12]. Ki phah na zong gensiat kipatna hi thei-a, ki gensiatna zong pahtaak piakna hi thei hi.

[13]. Mi hai [10] in hongmuh khelh sangin mi pil khat in hongmuh khelh dah huai zaw-hi.

[14]. Ih muan pen te mah in hong khem zo pen a, ih ngaih pen te mahin hong mudah zo pen hi.

[15]. Pirat mai-ah zeisuh thu ki sit theih mah bangin pawlpi mite mai ah sia te thu ki sit hun om thei hi.

[16]. A mi namuh dah man-in a thu nial ken la, a thu na deihloh man-in a mi mudah kei-in.

[17]. An naduh mah bangin nasep na duh leh na puksi ngei kei ding hi.

[18]. Gilkial loh nangin annek akul mah bangin puksih loh nangin nasep zong kul hi.

[19]. A talkolh khempeuh a pil kiim loh hangin, a pil khempeuh atalkolh kiim hi.

[20]. Innkuan sungah sila leh to’ omlo ahih manin nasep ki tuh lo a, ih ki khiat lai teng, nasep zo leh innkuan nuam om thei lo hi.

[21]. Mi ih hawm thawh nop leh ama sangin sepzawk na leh hoihzawk na ih neih phot kul hi.

[22]. Pasian gal pen SATAN hi a, mihing gal pen MIHING mah ahihi.

[23]. Na kiangah mi khat hong ki gensiat leh a ki lemlohna uh leh ama pianzia hoihtak in kan masa in.

[24]. Zu leh va-in agawl sihpih uh a, mihing in alungsim sihpih hi.

[25]. Pasian in lem asak nak leh alem lo mun te ah zong lem veve lel hi.

[26]. Sihna lamdang ih sa-a, sihna lamdang lo zaw-in suahna lamdang zaw tham hi.

[27]. Natna lamdang ih sa-a, natna lamdang lo zaw in damna lamdang zaw tham hi.

[28]. Haina lamdang ih sa- a, haina lamdang lo zaw in pilna lamdang zaw tham hi.

[29]. Mi minthang te asih teh minthang zaw a, mi minsia te asih ma-in minsia zaw uh hi.

[30]. Mi khempeuh khat vei tek ki khem zo a, tua khemna hong ki theih leh khantawn hong ki um nawn lo hi.

[31]. Pasian in atawi san mi khat na nenniam leh Pasian in tawisang veve ding a, nang na min dai dinghi.

[32]. A cingh te tungah Pasian cingh a, ahuai ham te tungah Pasian ciil hi.

[33]. Thau muk sangin laikung kihtaak huai zaw a, ih gal te sangin ihlawm te kihtaak huai zaw hi.

[34]. Itna akiam leh mawhna ki zong a, itna akhan leh dikna ki zonghi.

[35]. Pawi siimna sangin sih galna hoih zaw a, sih galna sangin natveh na hoih zaw lai hi.

[36]. Na khempeuh ah paulap bei mawh a, apiang khempeuh lungkiim leng paulaap khempeuh bei pah hi.

[37]. Hawm thawh na pen dem zawhloh na hi thei a, nenniam na pen tawi sanna hi thei-hi.

[38]. Mawhsak na pen dikna pulaak na hi thei-a, gensiat na pen pahtaak piakna hi thei hi.

[39]. Thupha simsim le teh thusia ta zolo ding a, thusia simsim le teh thupha ta zolo dinghi.

[40]. Guahzuk ma-in huih nung thei den a, thupha ngah ma-in ze-et na ki tuak thei hi.

[41]. Thupi nasak mahmah te Pasian adingin thupi lo thei- a, thupi nasak vetloh te Pasian adingin thupi thei hi.

[42]. Sahang in mi apeh ding teh ngik masa a, mihing hongbawl sia ding te-in hong paakta masa hi.

[43]. Mipil gamah mi poi te ki hehpih a, mihai gamah mi poi te ki sim mawh hi.

[44]. Hong ngai te sangin hong it te tenpih huai zaw a, hong it te sangin hong hehpih te tenpih huai zaw laai hi.

[45]. Ihmut theihna mun pen lupna nuam pen hi a, gilkial laitak a nek an pen alim pen hi.

[46]. A zahtak huai manin zahtaak bawl in la, na zahtaak bawl manin zahtaak huai sak in.

[47]. Khatvei minthan khantawn ki mang lo a, khatvei minsiat khantawn ki mang thei hi.

[48]. Hauhna in kepsiam ngai mahmah a, zawnna in thuak zawh ngai mahmah hi.

[49]. Tu-ni mihau pa zingteh khutdawh ngen suak thei a, tu-ni mipil pa zingteh kolbulh suak thei hi.

[50]. Lungsiim ki- el minih omkhop pen agam la hi napi, anai a ki en dulvin et tawh ki bang hi.

[51]. Ih ngah thupha hang a lungdam koh pen ngah ing cih lahna VOUCHER piakna tawh ki banghi.

[52]. Nang deih bangin apian kei leh nang deih bang TOPA ci pah lel in.

[53]. Itna pen paaknamtui bangin namtui a, ahi zongin zangh het kei leng bei thei hi.

[54]. Na dinmun sangin na ki niamkhiat zawk leh na dinmun sangin hong ki tawisang zaw dinghi.

[55]. Gualzawh ma-in guallelh na aom leh tua gualzawhna liimci thei pan hi.

[56]. Hi zo kenteh ci -a, ahi zo veve sangin hi zo in teh ci- a, ahi zolo tawm zaw den hi.

[56]. Pasian in mi atawisan ding ciangin mihing lam pan ki nengniam masa hi.

[57]. Ganhing te aki-in ki si uh a, akam uh tawh ki pet-in, mihing te alungsiim uh tawh ki pet hi.

Job Thawngno