Lungphona tawh kisai

Lungphona tawh kisai

Mi khat in a pianpih ngaihsutna tawh suakta takin gen theihna nei ciat hi. Hih mikim in a neih suaktakna pen a hunhunin galvan zang loin, dai takin zatkhiatna hi a, tua pen suakta takin lungphona kici hi.

India gam suahtakna dingin Gandhi in na zang a, mikangte in manin thong sungah khum bek uh a, galhiam zangin na bawlsia lo uh hi. Gamkekte hun lai in ngeina khat bangin kizang ngei uh a, mikangte pen Vietnam a uk Piantitte zahin na gamtat sia lo uh hi. Kawlgam kumpite in lungphona a neite a thah zah leh a ngongtat bangun Piantitte na gamtat sia lo uh hi.

Mikangte hun lai in sangnaupang Bo Aung Kyaw na that ngei uh a, mikangte leh sangnaupangte kiho theihna na nei zaw uh hi. 1962 kumin Ne Win hong kah ciangin mikangte sangin suk zaw-in, sangnaupangte a lom a tangin na that hi. 1988 kumin zong sangnaupangte a lom a tangin a kithah banah thong sungah tampi na khum uh hi.

U Nu hun lai in sangnaupang Hay Ri Kan a sihna hangin U Nu in gambup Primary pan tan 10 dong exam kul loin na pass sak khin hi. A hunhun in Democracy gam ah aana neite in sangnaupangte lungkim sakna dingin kimuh pih den thei uh a, ei gam ah ahih leh sangnaupangte khualna om loin, a sin ding uh lesson a kipan thu tuamtuam ah tung lam panin ukcip uh hi. Sangnaupangte haksatna khat peuh a neih uh ciangin lungphonna hong neih uh leh kumpi in thah leh mat thuah den lai uh a, a haksatna uh bang hiam cih zon pih ngei loin gal bawl den lai uh hi.

Tu lai takin lokho mite en le hang a leitang uh aana tawh kilak sak a, a leitang uh a kivakna uh ahih manin deihkikna hangin daitakin (Non-violence) lungphona a neih uh pen pia kik ding cih tha dah manin thong sungah khum zaw uh hi. Kumpi khat in a gammite a it naak leh a gam mite in zong it pah ding a, a gal bawl leh a mite in zong gal bawlin kumpi tokhom tungah a tut lianluan hangun mipi neilo suak thei hi.

Tua ahih manin kumpi in a gam mipite haksatna, sangnaupangte haksatnate thudonin kimuh pih ngam ding uh a, tua bangin kimuhna hangin, tu lai tak a i haksatna khempeuh hong veng thei pan ding hi. Kigal bawlna in gam susia ding a, kikup khopna in gam kipsapin khantohna zong hong piang sak bek ding hi. Ref: New Watch Weekly. Lom 9. Hawm 26. Nov. 18, 2014 Laimai 18.

Zo Aw Lom II, Hawm 21 pan hongki suaksaksawn ahihi.