Lungkiat hemkhia

Lungkiat hemkhia

Tut hit hiat kawmsa in a lungneu thei mi om hi. Thu a ngaihsutsut kawm in a lungkham semsem mi om thei hi.

‘Ka lung gim lua’ a ci leh ‘si nuam mai ingh’ a ci mi om thei hi. Tuabang mi te in lungkiatna pen a om hithiat laitak in a ngah a hihi.

A om hithiat laitak in thu ngaihsunsun uh hi. A piangtheilo ding lam, a lungkiat huai lam, leitung siatna vai leh a deihloh teng ngaihsunsun uh a hihmanin lungkia lungkia kungkia hiden hi. Lawpna peuhmah nei lo hi. Tuapen ngaihsutna pan a ngah a hihi.

Thu i ngaihsut ciangin a deihhuai thu, a lungdam huai thu, hongpiang ding aa i ut te leh damna, hauhna te ngaihsutsut ding a hihi.

Ngaihsutna in hong lawpsak aa hong cidamsak hi. Hong thahatsak hi. Banghanghiam cihleh ‘mikhat in a ma ngaihsutna bangin a piang hi’ ci in laisiangtho gen zo hi.

Lungkham laitak in lungdamna, lungnopna hong piathei Pasian thu ngaihsun ni. Ngaihsutna in nuntakna naakpi a hihi.

Haksatna lau kei ni

Vasa khat huihlak ah leng hi. Huih nung a hihmanin haksa sa in tawl mahmah hi.

Tuaciangin ‘leitungah huih om kei leh hoih ding hi ven’ ci in phun hi.

Huih in dawngkik pah aa ‘huih om keileng nungta thei ding na hiam?’ ci kik hi.

Ih nisim nuntakna sungah i tuahkhak haksatna tampi om thei hi. Tua haksatna te om kei zaw leh i cih tampi om ding hi.

Ahizongin tua haksatna te sung mah ah nopna, nuntakna ii manphatna leh zawhna lianpi te om khinkhian hi.

Tua haksatna te i zawh khit sim in a lianzaw lawhcinna a ki ngah a hihi. Haksatna mudah lo ding hihang. Haksatna a zo ding te i hihi.

Sihna a zopa

• Galhangpa leh sihna a ki do ciangin sihna in zo zaw hi.
• Mipil te leh sihna a ki do ciangin sihna in zo hi.
• Mihau te leh sihna a ki do ciangin sihna mah in zo lai hi.
• Mi minthang te leh sihna a ki do ciangin sihna mah in zo leuleu hi.
• Kumpi te nangawn in sihna do zolo hi.
• Siavuan pil pen te leh Pasian nasem minthang te zong si veve uh hi.

Sihna in lelh nei lo hi. Mihingte nuntakna tomno sung bek hiaa ki saktheihpih ding omlo hi. Na khempeuh sihna nungah bei siang hi.

Ahizongin.… Zeisu in Pasian tapa hi. Sihna pan in thokik zo hi ci aa a um mi in sihna zo ding hi. Sihna nawk kha mahding aa a hizongin sihna in lenkip zo lo ding hi. Pasian a minthangta hen. Amen. – Siamsin Library