Lunghihmawhna tawldamna ~ Dr. Ngul Khan Pau

Lunghihmawhna tawldamna ~ Dr. Ngul Khan Pau

(1 PETER 5:7) “Pasian in note hong kem ahih ciangin na lunghihmawhna khempeuh uh ama tungah na koih un.”

I Lai Siangtho simna ah “kem” cih nam nihin khentheih hi. Eima nuntakna tawh kisai a lunghihmawhna i kep thu (anxious care) le Pasian hong kepsak (divine care) ding thu hi. Lunghihmawhna en i kep ciangin van lompi bangin gik mahmah a, ahi zongin Topa’n hong kepsak ciangin i tawldam hi. Tuni-in hih thu ngaihsutna tam lo kikum ni.

Na lunghihmawhna khempeuh uh ama tungah koih un: Hih lai-ah kammal i et nop ahih leh koih cih hi. Greek kammal in hih pen aorist tense hi a, cih nopna ahih leh “khatvei thu-a koih khin kiuhkeuh” cihna hi. I lunghihmawhnate Topa’ tungah ka koih i cih hangin mihing ihih manin a neng a tawng mah kaikhawmin pua kik hi leng kilawm hi. Thungetna i neih sung bek lungnuam a, i zawh ciangin lungnuam nawn lo ihih leh koih khin lo cihna hi. Hong tung nai lote koih khin kiuhkeuh cih pen ahi thei ahih loh hangin, “Topa, tuni ka vai ding khempeuh bangbang a piang zongin nang tungah kong koih hi” kici thei hi. A beisa thute na lungngaih kikkik ciangin bawlphat kik theih lah hi loin na lunghihmawhnate zong Topa’ tungah ap leng, a beisa natna zong hong damsak ding hi.

Lunghihmawhna khempeuh: A kammal khempeuh cih i mu hi. Lunghihmawhna tampi kinei a, a lian a neu, kha thu tawh kisai le leitung thu, tawlkhat sung bek hi loin hun khempeuh ah Topa Pasian tungah koih ding hi. A lungdamhuai thu in hih lai-a kammal “khempeuh” cih hi. I haksatna lunghihmawhna kimkhat bek hi loin a vekpi-in ama tungah koih ding hi, cih mahmah manpha hi. Nupi khat leitung haksatna tampi a tuahkhak hangin a maitai tawntung kiangah, nang bang na cih leh na maitai tawntung hiam, ci-a a kidot leh, “Ke’n haksatna van lompite Jesu Khris’ liangko tungah suan mengmeng, ke’n pua ding hi leng pua zo lo ding hi ing,” ci hi.

Lunghihmawhna eima tuah ciat mah lian kisa a, midangte a baih deuh dingin kingaihsun hi. Zingsang lamsiau a ka pai ciangin suangtang ka khedap sungah hong lut thei hi. Ka khe tawh a kinawkkhak ciangin tua suangtang lian mahmah tawh kibang hi. Ahi zongin tawlnga-in ka khedap suahin en leng, tua suangtang neupha mahmah na hi lel hi. E’n i tuah khakte eima aituam bang ahih manin lian kisa hi. A lungdamhuai thu in Topa Pasian in ama tungah koih dingin hong zawn hi. Mikangte’ la khat in, “Leitung bup a liangko tunga pua Pasian in nang’ haksatna pua zo mahmah hi,” ci hi.

Hong kem ahih ciangin: Kem cih kammal pen a thu-a i theih hangin i nisim nuntakna ah a taktakin hong kem takpi hiam cih i ngaihsut ni tam veipi om hi. Ama hong kepna le i lunghihmawhna tehkak ding hi leng, koi lianzaw ding hiam? Nang lunghihmawhna le Pasian hong kepna kiteh thei ding hi lo hi. Leitung khempeuh bek hi loin ama bawlsa khempeuh kem hi. Topa hong kepna tawh kisai i gen ciangin Philip Yancey in, Finding God in an expected places a cih laibu ah, Penguin (vasa nam) tawh kisai hih bangin na gelh hi. “Tua vasate’n tuikulh ah no nei dingin paikhawm uh a, a tul a then in tui nei masa uh hi. A tui zong tangkhat bek mah hizaw deuh a, a pi in tua a tui kha thum sung bang opin kem hi. Kha thum zawh ciangin a tui keuhin a note uh tawlkhat sung nusia-in an zongin dingin tuipi sungah paisan uh hi. Tua a pi le a pa in an tawh hong ciahkik ciangun a note uh amau omna ciat panin na vakkhia-in kihelkhawm gawp uh a, ham ziahziah uh ahih manin a gin ngaih mahmah hi. Tua tul tampi ham ziahziah sung panin amau’ no’ aw khen thei uh hi,” ci hi. I Pasian in amah a sam tul tampi sung panin nang’ aw khenthei hi.

I lunghihmawhna zong gik mahmah thei hi. Gik kei leh lah Topa’ tungah koih kisam lo ding hi. Bang hang hiam cih leh eima puak dingin gik lua cihna hi. Tuni na puak loh ding pua-in na lel lua hiam? La phuakte’n, “Thuak loh dingpi i thuak hi, na khempeuhte Pasian kiangah thumin i koh loh man hi,” ci hi. Thuak loh dingpi i cih ciangin leitung mi ihihna ah thuak ding om hi. Ahi zongin mi tampi in zu ahi zongin zatep ahi zongin sihpih thei cih thei napi-in kidek tuan lo uh hi. Mi khat in voksa duh lua mahmah siavuanpa in, “Voksa na ne nawn ke’n, na sikhang tawh kituak lo hi,” a ci hi. Ahi zongin kidek zo lo ahih manin voksa a nek teitei leh ihmu khanglo nawn loin ihmu suak hi. Voksa nek ding ciangin Jesu min tawh na siansuah hangin nang cidamna tawh kituak lo ahih leh na kikep ding hizaw hi.

Hong kep manin tawldam hi: Pasian in hong kem ahih manin vai tampi vengpah hi. Lai Siangtho sungah Peter thum vei a “ihmut” thu i mu hi. Melkilamdanna mualtungah ihmu cih kimu hi. Tua ciangin Gethsemane huan ah zong na ihmu leuleu hi. Ihmut loh nading ah ihmutkhak zong na tampi kisum hi. A thumna ahih leh ihmut theih nading hun le mun ahih loh hangin amah na ihmu cih i mu hi. Sawltak 12:1-10 sung i sim ciangin amah Kumpi Herod in a mat khit ciangin thah dingin thongsungah koih hi. Zing ciang thah dinga kikoih Peter nuamtakin ihmu cih kimuh hi. Vantung mi in amah lakhia dingin a pai ciangin va phong hi. Hih ihmutna pen lunghihmawhna khempeuh Topa’ tungah koih takpi cih kimu hi. I thuzawhna ah hong kep manin tawldam ding cih thu li khawngin gen ni.

Khatna, i Pasian hong bawlpa in nang hong telpen ahih manin ama tungah i vai khempeuh ap ding kisam hi. Nang le nang na kitheih sangin hong telzaw, na guh na tang thei in, na lutung a samzang omzah nangawn a thei Pasian ahi hi (Matt. 10:30). Tua pa’ tungah i vai khempeuh ap ngamhuai hi.

Nihna, ama’n vangik puate ama kiangah tawlngakna nei dingin hong sam hi (Matt. 11:28-29). Leitung nuntakna ah vangik pua-in i nungta hi. Mikang gam khawng ah bangmah buaina nei ke’n teh i cihte zong amau’ vanpuak na zang tuan lo hi. Vangik ciatciat ah mawhna van mah gikpen hi. Topa Jesu in leitung bup mawhna a puak ni-in pukpih, sihpih ahih manin mawhna van gik penpen hi.

Thumna, haksat hunin hong huh dingin hehpihna nei Topa hi. Haksat hunin hong thahatsak dingin amah ei tawh kinaitakin om tawntung hi (Heb. 4:16; Late 46:1). Haksat hunin Topa’ kiang na zuan leng hong huh dingin amah ei tawh kinai mahmahin na om hi. I haksat thuak zong ama’n hong mu hi. Amah hong huh dingin man tawntung hi. Amah i koh ding hi a, tam veipi kiko loin kigum thuak hi.

Lina, ama’n lungsim kitamte damsak a, amau’ meimate a tuamsak hi (Late 147:3). Lunghihmawhna hangin lungsim natna nei, ahih kei leh liamna neite, Topa’n hong damsak nuam hi. Ama kiangah ap leng, hong puaksak bek hi loin hong gualzawhpih ding hi.

Rev. Frank E. Graeff (1860-1919) in la dawng 200 val phuak hi. Tuate sung panin a kideih mahmah ahih leh Jesu in hong kem hiam, cih hi. Cinatna, haksatna tampi tawh Pasian nasem a, lungkiat nading tampi na tuak hi. Tuate kawmkalah ama’n hih la na phuak hi.

• Ka lampi sau-in a gimhuai a, vangik pua-in kikem khialin;
• Ka lampi sau-in lungsim a nat ciang, Jesu in kei a hong kem hiam?
• A hong kem hi, ke’n ka thei hi. Ka dahna hong thuakpih hi.
• Sunin om nuam loin zan a lauhuai laitak, hong gumpa’n hong kem.

Rev. Dr. J.M. Ngul Khan Pau