Lungdamna Pulakna ( Pu Ngin Za Langh Sihna, Kivuina Vai ah)

Lungdamna Pulakna ( Pu Ngin Za Langh Sihna, Kivuina Vai ah)

Dear Zomi U leh Nau a kuama peuh:

Ka-pasal, ka-pa uh, ka-pu it uh a hi Pu Ngin Za Langh ( March 5, 1950 – Oct 31, 2014) in a leitung nuntakna nusia in vantung-a PA kiangah hong ciahsanna hang in koh-te tawh a kibangin hong dahpih akuama peuh tungah lungdamna lianpi hong ko ungh.

Innteek dinmun hong sepsak ahi Zomi Innkuan New York City President-pi Siamah Dim Lam Cing, makai-te leh pawlmi khempeuh tung leh Zomi Christian Church-Columbus pawlpi mi-te khempeuh tungah lungdamna lianpi hong ko ungh.

Mimal-a hong pha-a sihgaalna leh neek leh dawn hong pia, hong tawi Zomi U leh Nau akuama peuh, genvai lam sihgaalna hong pia Zomi Innkuan USA Genvai thukhunpom-te khempeuh leh Zomi Innkuan New York City Genvai a kihel khempeuh tungah lungdamna lianpi hong ko ungh. Hih banga nong gaalna uh hangin sihvuina ah sumbeina a tam thei zawkna mun ahi New York City khuapi ah lungkim huai tak in ka-pasal, ka-pa,ka-pu uh kivui zo suak ahi man in lungdamna lianpi ka nei uh hi. Ka dahna uh tampi thuaknuam tuam mahmah hi.

Phone tawh ahi zong, group mail, text message, Facebook te pan dahpihna, hehnepna hong pulak a kuama peuh tungah lungdamna hong ko ungh. Ki lamet gamloh, ka hihna uh sang in mun tuamtuam, gam tuamtuam pan Zomi a kuama ciat in dahpihna, hehnepna nong khah, nong at na uh ka muh uh ciang in ka dahna khitui-te hong nulsak in, angtang in hampha kisa mahmah ungh.

A nat-hun pan kipan hong pha, a hun nunung dongah hong dahpih, hong hehnem Pu Hau Do Suan leh Nu Cingh San Niang (Daw Nwe Nwe Aye), sihvuina vai khempeuh hong makaih Rev. Do Sian Pau, Tedim Baptist Church-Yangon pawlpi ah a mapan pih gei ahi Siamah Don Ngaih Lian, Nu Lel Lun leh pawlpimi-te, Myanmar Baptist Church –New York pan Rev. U Myo Maw leh pawlpimi-te, New York City a om Kawlgam-mi lawm leh gual-te, Jacksonville, FL pan in hong delhpah Rev. Khual Lian, Atlanta pan hong delhpah sanggam-te, Bowling Green, KY leh Nashville, TN pan hong delhpah Zogam Mungno leh sanggam-te, Florida pan hong delhpah gang Pu Hau Ngin, Nu Ngaidim leh Pa John Thangpi leh Portland, OR pan apaneu hong veh-a hong pai Honey Nempi, mel theih U leh Nau-te, Pyidawtha khuapih, vontawi U leh Nau-te leh mun tuamtuam, state tuamtuam pan Zomi U leh Nau a kuama peuh tungah nong dahpih, nong hehnepna uh hangin lungdamna lianpi ka nei uh hi.

Nong dahpih, nong hehnepna uh, ka dahna khitui-te nong nulsakna uh koh tha tawh cikmah hun in kong thuk zo kei ding uh a, nong it-na, nong khualna uh hangin i biak Pasian in thupha tampi hong pia ta hen.

Lungdamna lianpi tawh,

A it a zi Pi Khual Za Man leh anutsiat ta-te leh tu-te teng