Lungdambawl hun sungah, phawk ding leh thalak nadingin ka deih thu pawlkhat

Lungdambawl pen, eite’ adingin a manphapen letsong hong kipiakna ahi hi. Letsong kipia napi-in i san kei leh tua letsong pen, ei aa’ hi theilo dinga, lungdam takin i san nak leh tua letsong pen ei aa’ hi thei pan bek ding hi.

Elizabeth in, Mary hopihna aw’ a zak ciangin, a sunga om naungek lungdam in a dian mah bangin, Jesu anei mi khat i hih nak leh ei tungtawnin mite in phattuamna/lungdamna khat teitei ngah ding uh hi.

Na nuntakna tualniam na kisa kha hiam? A niampen munah mi bangin hong suak, Jesu in Pa’ deihna teng kicingsak in eite’ adingin na khempeuh hong sepsak khin zo hi.

Pasian’ Tapa takpi a suahma na ngawnin gal nei ahih leh, eite in gal ineih zenzen leh zong a lamdang lua hi lo hi.

Lungdambawl bangzah vei muak lai ding cih theilo na hih manin, tukum a na muak lungdambawl pen, Topa’ deihna bangin siangtho takin zangh in. Nang adingin lungdambawl nunung zong hi thei ahih manin, suahni neipa ahi, Jesu Khris nei limlim in!

Mipilte in Jesu kumpi inn sungah suak ding cih lamen in kumpi inn sung zong masa uh hi. Ahi zongin amau upmawh bang hi loin, Jesu pen a niampen munah na suak hi. Kiniamkhiat takin a niampen munah a suak Jesu, eite’ nuntakna sungah hong tum theih nadingin i kiliatsakna khempeuh suahkhia a, kiniamkhiatna tawh i lungsim kongkhakte honin, amah mun i piak ding ahi hi.

Leitungah numei tampi om himah ta leh Jesu mi bangin hong pian nadingin Pasian in nungak suangtho Mary na zangh sese hi. Pasian in a siangtho mite mah na lianpi sep nadingin zangh nuam a, ahi zongin a ginalopen leh a mawhpente na ngawn kisikkik in ama kiang zuan leh na lianpi sem dingin zangh lah tuan hetlo hi.

Pasian’ cih bangbang nial loin amang Mary tungah, Pasian in na lamdang piangsak in na lianpi a sep mah bangin Pasian cih bangbang nial loin a mang mite’ tungah zong Pasian in na lianpi hong sem ding hi.

Ama nuntakna mahmah ki piakkhiatna tawh itna hong lak Jesu Khris in, vantung nopsakna khempeuh nusia-in, a niampen munah kiniamkhiatna tawh mi bangin hong piang hi mah ta leh, sihna in len zo loin thokik a, vangliatna leh minthan’na tawh a gualzawhna hong lak hi.

Khazih sungah,
David Tuang