Ludwig van Beethoven (17 December 1770 – 26 March 1827)

Ludwig van Beethoven (17 December 1770 – 26 March 1827)

Beethoven pen leitung music tangthu sung ah aminpha mahmah music pilna nei khat ahi hi. Ama ii gelhkhiat music te in ama ii zahtakbanna lak khia hi. Beethoven ii music te pen tua hun lai in mipi te ii dahna, lungdamna, suahtakna le thalawpna te pia zo hi. Tua ahihman in ama ii music te in mi te thangah sak in tawsawn hi. Tu ni ciang dong ama ii music te in mi te lungsim sukha den lai hi.

Beethoven pen aneu tung pan ama ii music kivaqna akilangsak khin ahi hi. Apianpih kivaqna ahiban ah aman hanciam beh lai ahihman in atheihna hong sang semsem hi. Ahilh asia te nangawng in lamdang sa phial uh hi.

Beethoven pen kum 12 aphak lai in kumpi inn sung ah Piano le Organ sia ding in kiseh in tua tawh a innkuan pih te vak hi. Avan gik mahmah ahi a innkuan te avakna hang in Beethoven in asiamna hong sin beh semsem hi. Nasep hong hanciam semsem hi. Khua zat khit ciang vul ningniang sa in inn ah ciah den hi. Akum tawh kituak lo in na asem kha ahi hi.

Kumpi inn sung ah mipi te zahtakna angah hang in amah lungkim zo tuan lo hi. 1787 kum in Beethoven pen Vienna khuapi ah pai in Mozart kiang ah siamna va sim beh hi. Ahihang kamsaitna tawh anu cidam lohna tawh inn ciah kik pah hi. Asawtlo in anu in hong nusia hi.

Tua in Beethoven linglawng sak mahmah hi. Anu ii nusiatna le angimna atangtut nading hanciam in akipeina te hang in nuntakna ii haksatna te Beethoven in hong nawk ngiatngiat ta hi. Akhangno mahmah hang Beethoven in ahaksa nuntakna ii khongkhak te hangsan takin nawk in lungsim kip takin ama hong nawt hi.

Beethoven in ahanciamna hang in gualzawhna hong ngah hi. Amah pen damdam in mi tampi te in hong thei hi. Tua hun laitak in anuntakna ah kamsiatna pi khat hong tuak hi. Abeng hong ngong hi.

Music ging te aza thei nawnlo music siam khat, gamdai sung ah music abawl ding, asun mang te atangtung sak ding mi khat in hih bang tawh amasuan bang ci phuk mawk ding … cih zong hong ngaihsun zo nawn lo hi. Hi pen a lainat huai kamsiatna khat hi hi. Abeng ngawn lam midang te theih ding utlo ahihman in Beethoven pen mi te tawh akigamlatna ah damdam in hong kihem khia hi. Hi bang tawh amah le amah hong ki zawngkhal sak semsem hi.

1802 kum ciang in Beethoven pen Vienna khuapi pan nai khat akipai Heiligenstadt akici khuano khat ah hong pai in music aw te hong gelh hi. Tua khua ah Symphony No. 2 hong phuak khia hi. Ama ii beng ngong pen ni khat khit ni khat hong suuk semsem hi. Ama ii thuak natna le ama ii kamsiatna te pen “Heiligenstadt sih thuvaikhakna” ci in amah mah in hong gelh hi.

Anung lam ciang Beethoven pen Germany philosopher khat ah Immanuel Kant ii pilna tawh amuhkhiat thu ahi “Ih kamsiatna te ih mangngilh nading ahoih pen in nasep te khawllo aa sepsuakna hi” cih kammal tawh amah le amah tha hong kila kik zo hi. Nuntakna ma anawt ding in thahatna hong nei kik hi. Nasep hancaim tak in asep kawm in ama ii kamsiatna te hong mangngilh zo in music tam pi hong gelh khia zo hi.

Vienna khuapi ah lungdam takin hong kileh kik hi. 1803 kum in athahat “Salpha” Symphony No.3 hong gelh khia zo hi. Hih music pen Napoleon aading agelh nop hina pi in Napoleon in kumpi hongsep ciang in Napoleon min phiatkik in “Salpha” ci in min apia ahi hi. “Salpha” cih music aw sung ah music abawl pa ii nuntakna khamsiatna teng anawk zawhna hangsanna salpha lungtang te adim in a omlam kilang takpi hi.

Amah le amah kimuanna anei Beethoven ii lungsim sungah meimual bang aa aso, mong nei lo itna te, atumdang deuh, anem diaidiai, akihual kim hialhial, tha khauhna tawh akidim, ahoih na khempeuh te ama ii gelh khiat a music aw te sung ah adim in om lam kilang khia hi.

1804 kum pan 1814 sung teng apumpi tung ah natna nakpi tak in thuak hi. Ahihang hih kum 10 hun sung ah tangthu sung ah aman akiciamteh zo lo ding music aw te hong gelh khia zo hi. Mihing te ii music tangthu sungah suangmanpha abang music te aman hong gelhkhia zo hi.

Vienna aa aminthang tanglai music siam khat ii nuntakna le khua hun piak tawh kinia cih sam hang in Beethoven ii ngaihsutna te pen Haydn le Mozart te tawh kibang lo in tumdang deuh hi.

Music gelh siam Haydn ii nuntak sung in mite mawhsakna le kosiatna te tawh kidim hi. Hi te pen khat veivei aheh hang in thukkikna nei ngei lo hi. Music siamna tungbek ah lungsim sung in ama nawt hi.

Mozart in zawnna le mi te mawhsakna athuak te zong pen Haydn sang tawmzaw kici thei tuan lo hi. Ahihang Mozart in azawn hang in mi te ii nopnehna te pen thuk kik pahpah hi. Ama ii gelh khiat music te sung ah khangnona, lawpna te akihel hang in a music aw te ngai lehang ama ii na asakna, athuaklahna te ki mu thei hi. Beethoven pen ama ii kamsiatna athuak ahihang in, tua hunlai ki-uk dan athuak lah hangin ama ii music te in mi te suaktakna, lungdamna le thahatna te pia zo veve hi.

Beethoven ii gelh music aw khat: Beethoven’s 5 Secrets – OneRepublic – The Piano Guys

Beethoven pen music abawlna tawh anuntakna nitum lawh hi. Atawpna khat vei mipi te amel alah khit ciang sin natna tawh zawmtak in ni khat khit ni khat hong kantan hi.

Anuntakna abei madong ama i lungsim dai hithiat hi. Hi bang hun na ngawn pen aman state tung aa ding bang in om in ama ii athuakna kitheihloh bawl in music tumtheih van nam li tawh akitum (String quartet) music aw dawng 5 hong gelh khia lai hi. Hi pen mihing te aading Beethoven i agelh topna music aw ahi hi.

Beethoven pen alungsim tawh natna te azawh zawhna, kuhkal hangsanna te hang in gualzawhna hong ngah ahihna thu, sihna mang pa lehdo in daihna angah zawhna thu tetti hong hong lak ahi hi.

Russia physics pilna nei Nikolaevich Lebedaev in “atanglo tui maitang tung pan ahanciam tui tung nasem hong piang thei lo ding hi. Anuam kim le pam pan mipil mi siam hong piang lo ding hi” ci hi.

Zawngkhalna in mihing te na asep theih nading in lauthawn thei hi. Mihing te khuisa sak hi. Nung kiksak hi. Lungkia sak hi. Ahihang in lungsim khanglo sak hi. Thahatsak zaw hi. Lungsim tha khauhsak hi. Hi pen nang zawnna pen bang ci muh na hiam cih tung ah hong kinga ding hi. Zawnna, gentheihna, haksatna ih tuah ciangin kihta lo in hangsan tak aa aphul ngam te in gualzawhna ngah ding uh hi. Peter Suumpi