London pan Kuala Lumpur alengkhia vanlengkhat ekbuktui omlo ahih manin kilehkik

London pan Kuala Lumpur alengkhia vanlengkhat ekbuktui omlo ahih manin kilehkik

England khuapi London panin Kuala Lumpur zuanin alengkhia Malaysia Airlines te vanlengkhat dailenbuk “Lavatories” tengah siatna om ahih manin vandawn panin ki lehsakkik cihi. Tua vanleng pen Malaysia Airlines te neihsa Flight Number MH1 ahihi.

Hih MH1 vanleng pen London’s Heathrow Airport panin nitaklam 8:36pm (Local Time) in alengkhia hi a, Belgium gam ii atung “Airspace” sungah alutkhin, atungkhinta ahihi.

Ahi zongin dailenbuk tengin hoihtak nasemlo, Malfunction ahih manin, vanlenghawl Pilot pa’n ki lehkikding khentat a, London lam zuanin aki lehkik vingveng ahihi.

Leitungbup vanleng tuamtuam a encik Monitor asem ahi Flight Alerts te’n Twittwer tungah agelhkhiatna ah hih Airbus A380 pen akilehkik ciangin vanlengtual ah hoihtak akumtheih nadingin asungah apuak vanleng sathau “Fuel” te vandawn ah buakhia “Fuel dumping” in, bangmah nawngkaina omlo in London’s Heathrow Airport tukikthei cihi.

(Fuel dumping: Vanleng tungah Emergency Situation khatpeuh aom ciangin “Fuel dumping” ci’n sathau apuakteng lakpan akisamlian zahdingbek sitin, adangteng vandawn ah buakhia uhhi. Hihpen vanleng agihna Aircraft’s Weight tawmtuamding banah, vanlengtual ah Emergency Landing abawl ciangin mei akat zenzenleh, meikuang akilawhgawp loding cihna ahihi)

Vanleng sungah akizang dailenbuk Lavatories sungteng ah tui omlo ahih manin, hih vanleng pen gamlapi panin akilehkik ahihi.

Hih thupiang akizak ciangin Malaysia Airlines te kidongpah a, amauzong hih thupiangpen amanmah hi ci’n genkhia uhhi. London panin Kuala Lumpur pen nai 12 sungbang akilengding hi a, nai khatsungbang alengleng khinsa, Belgium gam ii atungsan atungkhin cihi. Vanleng sungah akizang Water Supply System hoihlo ahih manin, amanlang in aki lehkik cihi.

London’s Heathrow Airport ah Engineers te’n na ngakpah dimdem uh a, vanleng atunkhit phetin hoihtak sitcianna neipah uhhi.

Hih Malaysia Airlines pen banghun ciangin lengkhiakik theiding cihpen kitheilo ahih manin, Passengers tengkhempeuh Heathrow Airport geinai aom Hotel te ah kitungsak hi.

More: India, Mumbai vanlengtual ah buannawigawp in vanleng khat awkcip

Hihbang in khualzinte nawngkaina apiangsakkhak manin Malaysia Airlines te’n Passengers te tungah thuum uh a, adiakdiak in Kuala Lumpur panin mundang zuanin alengsuakding Connection Flight te akisam bangbang in panpih uhhi. Sawltak #zomidaily