Libya vanleng A320 ki Hijack in, Malta kibawhsak

Libya vanleng A320 ki Hijack in, Malta kibawhsak

Dec. 23, 2016: Libya gamte passenger vanleng mi 118 tuanna Airbus A320 kici grenade bomb tawi hi ung a ci pasal nih in pimang/pikawi (hijacked) uh a, Malta gam bawhsak uh hi. Tua vanleng pikawite lakah khat in a kithat Libya gam uk Gaddafi gum (pro-Gaddafi) hi ing ci a, vanleng passenger 111te ka ngetna teng uh hong kipiak leh Airbus A320 panin khah khia ding hi’ng a cih hangin crew member 7te khah lo ding hi ing ci hi ci-in Times of Malta in suaksak hi. Ahih hangin bang ngen uh hiam cih kitel lo hi.

Libyan State television TVM in tua vanleng pikawite gel in a grenade uh puaksak sawm in vauna bawl uh hi ci hi. Libya gam uk ngei Muammar Gaddafi pen 2011 nitumna gamte tawsawm mipite kiphinna hangin kithat a, tua khit tu dong Libya gamah ngongtatna dai nai lo hi.

Libya gam-a UN’ gup government in tua vanleng kipikawi pen Malta ah kibawhsak mah hi ci-in Libyan state news agency LANA in pulak hi. Libyan foreign ministry sunga ulian min gen loh khatin vanleng sunga tuang teng cidam uh hi ci hi. Malta Prime Minister Joseph Muscat’ zum in vanleng pikawite tawh kihona dingin negotiating team kicite Malta International Airport tung ta uh a, National Security Committee tawh meeting a nei lai Prime Minister’ thupiak kingak lai hi ci hi.

Hih Airbus A320 pen Sabha panin Tripoli zuan dinga leng ahi hi. Hutkhiatna nasem dingin Security services ten vanleng kiim umcih in metres 100 kiim panin panmun la-in operations pan ta uh a, vanleng ah a kum leh a lut kuamah om lo hi kici hi.

A vanleng pen tu zingsangin Malta a bawh khit nung 45 sung a enginete kikhawlsak lo hi. Hih vanleng kipikawina hangin Malta International Airport ah vanleng leng khia dingte leh bawh ding khempeuh kikhawlsak hi. A vanleng pen Libya kumpi’ vanleng (state-owned) Afriqiyah Airways ahi hi.

More: Japan tuipi gei khatah meikanggawp, inn 140 kang

Malta Prime Minister Muscat in passengerte pen pasal 82, numei 28 leh naungek khat hi ci-in a Twitter ah tuangsak hi. Hih Airbus A320 Afriqiyah Airways vanleng hawlpa in Tripoli khuapi a Mitiga airport ah bawh ding hi napi un control tower-te thuzasak in vanleng hong kipikawisak hi ci a, tua khit nung thu bangmah kizaksakna kinei thei nawn lo hi ci-in Libya senior security ulian ten ci uh hi. Source: Al Jazeera and news agencies/ Thang Khan Lian