“Let It Be” leh a kiim teng

“Let It Be” leh a kiim teng

“Ngilh ngei kei ning e ka Tuun aw khum…” – Lengtong Pauno

Naupan lai, cise leng! vengte khat vaigama sangkah hong ciah in mangla kisiamsak lua kisa “Leribe leribe leribe leribe” cih bekbek pen lumletlet mawk hi. En’ lah ahi ding mah sa ciltui kai dek liangin kingai zawzen lai!

Tua ka vengpa’n “Leribe” ci-a ana theih khialhkhak pen Sir Paul McCartney phuak “Let It Be” cih la na gige mawk! Beatles te la minthang pente laka khat ahi hi.

Hih la sunga Mother Mary pen mitampiten Zeisu’ nu Mary a genna sa kha uh hi. Ahih hangin a phuakpa McCartney in a genna ah ama’ pianna nu Mary a gennopna hi ci hi. Kum 14 a phaklai-in a nu in cancer natna hangin nusia ahih manin a nu a ngaihna lian mahmah hi.

McCartney in hih la a gelh lai 1969 kum pen Beatles Band ten hun haksa tuamtuam a tuah laitak uh ahih banah Vietnam war leh Ireland gamah buaina a pian laitak ahih si tawh a lungzing mahmah hi. Tua banga hun haksa a tuah laitak zankhat pen a mang sungah a nu hong kilangin, “hong veng lel ding hi, hi ta peuh hen (It will be all right, just let it be)” ci-in a nu hehnepna aw khum za citciat hi. Tua a mang sunga a nu’ hanthotna kammal in nakpitakin thapia ahih manin la tawh hong taangko khia ahi hi. A ma genna ah, “kum sawm khit nunga ka nu ka muh kik theih pen hampha lua ing, tua mang in thupha tampi hong tunin thei ing” ci hi.

The Beatles-Let It Be Music Video (1970) with lyrics

A lamdang mahmah khat pen Beatles vocalist John Lennon in hih la pen Christian biakna gimnam lua hi ci-in na saangzo khollo kici hi. I theihsa mah bangin John Lennon pen, “Zeisu sangin minthang zaw ung” ci a ana kisial ngei khat hi. A hun laiun leitungbup ah minthang vangvang mah uh hi. A hi zongin tua thu a gen zawh kum sawm-le-li khit ciang ama’ fans teekteek khat in thau tawh kap lum hi.

McCartney pen a pa Protestant, a nu Catholic biakna zui hi-in Khristian innkuan sungpan khangkhia a hih man a’i diam Beatles members li teng lakpan thupha saangpen tawh hong kibang a, UK gam lasiam hau penpente lakah kihelin, 1997 kumin British kumpinu in a gam mite pahtawina saang penpen Knighthood pia-in tuazawh Sir Paul McCartney ci-in kisam den ta hi. Piakkhiatna lamah zong na kiva mahmahin Charity tuamtuam ading sum tampi a piakkhiat banah Charity Concert, Charity Album tuamtuamah na kihel kawikawi hi. 2004 kumin Aung San Suu Kyi a supportna-in “US campaign for Burma” cih album adingin zong la na pia-in nakpitakin na panpih ngei hi.

Khai le! A dawng guk teng Zokam in bulh bialbual dih ni:

Buaina huihpi’n kei hong nawk ciang
Tunnu Mary hong pai-in
Sinthu gil tongdam hong lel, hi peuh hen

Lungkhamna meiipi’n hong tuam ciang
Ka mai-ah dingin hong liah
Sinthu gil tongdam hong lel, hi peuh hen

Lungsim tamkham mitampiten
A leitung nuntakna uh a saansiam ciang
A dawnna hong om lel ding, hi peuh hen

Kikhenthaang phial ta dih mah leh
Kimuh kik hun hong om ding hi
A dawnna om lel ding, hi peuh hen

Zanciang khimmei zingpi’n hong kimvel zong
Kei hong taan khuavak khat om
Zingciang dongin taang ding, hi peuh hen

Zaila ngaih tawh ka khanlawh ciang
Tunnu Mary hong pai-in
Sinthu gil tongdam hong lel, hi peuh hen

Mungpi Khupson