Lengtong Late ka khumcil thu

Lengtong Late ka khumcil thu

Kum 1981…., ka nu’ hong sihsan zawh kum 5.., Nulepa a ka ngak ka U pi te Tonzang ah.., ka pian’na kapa lah a zinawn leh a tanawn te tawh Khampat No.1. ah..,

Lengtong Hoih mah banga kanu in pian’pih sanggam pasal 7, aneih lak ah, 5 te Sawbuayeshin ah teeng uh ahih manin ka nu’sanggam ka Pute beel in Sawbua….. ah ka om hi.

Sawbuayeshin pan tai 7 (11 Km) khawng a gamlat na Myathlah lui dungah khaallo (khinn) kho a lawi kapkhat tawh ka giah hun laitak…….,

Tongkup pih ding lawmdang neilo kahih manin ka malaria (nghetphia) natna nangawn lawm a ka neih zawzen kum.., muthei hileng ka omna kiim ah bel Ngalkhawhang leh Khuasiameide tam mahmah kici mah hiven, amau lah hong hawh ngei samlo ….,

Tuahun laitak ka lolai a ka ciin ankam thau kungte,nipi paak te,mawngphal icih (leibe)te hong picin’ toh ding leh gan (lawi) in hong neek sakloh nading cihte ka nasep bulpi ahi hi.

Nikhat…., ka lobuk pan muhkhop ciaiciai ah minih hongpai kamu a, ka lo veengte lah hihtuak lo ahih manin, ka lungsim in:” Hih gammang lak ah bangvai thupi om a hong vak dihdih uh ai’tam maw “ka naci ci hi. Ka buk lam manawh in hong paipai uha, ka gei nai hongtun’ teh tua minih te pen, lamhilh khat leh kei hong sam dinga hongpai U GoLian nahi mawk a ka lauliang hi.Lamdang salua ka hih manin,patau kawmkawm in: “Bangthu om ahia?U Lian” kacih leh,

“Kithawi ou, ciahding, Zangkong ah lakhum a paisuk ding, tu’n SuaMang in Kawlpi ah hongngak”, hongci suk ziau mawk a, ka Pute’inn pan a lawi kapkhat zang a ka sepsa Lo pen a lak lawhpi a, anusia ding kahi mawk hi.

Gammang tulak pan a Zangkong khuapi sung a lakhum dinga ki sam ngiau cih pen, Mawsi zong a minam ta dingin gam palak mah pan ki sam khia hitah a… cih ka ngaihsun kha a, keizong ka vakhum ding late pen gamlenam itna late mah ahih lam ka phawksaan hi.Tua ban ah U GoLian pen sawltak vantung mi bangin ka ngaihsun a, ama hong gen bangbang mangdingin ka khentat hi.

Kawlpi tungta….U SuaMang tawh ki
muta…”Alaisai U Mang dam maw?.. Zangkong e’.?.. la khum ding e’.?… Pa Kap kuate maw?. nuammah si’ng”, kava ci daidai kha zawzen hi.

Mi 3. Zangkong tun’zawh nading sum kicing lo ahih manin sum leitawi zonga hong khuanung pai’ dingin U GoLian ciahkik phot a,ahi zongin kuamah’n na pialo ahih manin kei hongsam pa penpen tuni dongin LENGTONG lakhum na ah a kihel kha nawnlo hong hita mawk hi.

U Mang tawh ko’geel Kawlpi pan Gunkhawm a kicih na lam, Ipu ipa te’n gun/tui tawbing acihna lam ah paisuk.., Teembaw acih te khat na khawl……, apaisuk ding maw apaito ding cihlah kan selo, kahto in tuang lenlan pong, phadawm ei’ a Teembaw agiak ding nahi bilbel…,

Nai 9pm khawngteh Homeland pai to ding ahih lam theipan, Zingsang 5am a Monywa tuaksuk ding hi akici tungkhat ah kituah lu’nglu’ng leuleu,mi 3. phasam hive ungin, ka lawmpa uh amin Satan nahi sawnsawn…ana himai…!

Zan nai 10pm satta,Tembaw tungah mei ki sumit ta, mi te’n a lupna ding ciat uh zuan diamdiam,ko’lawmta 3. teng ka lupna dinguh omlo,midang passenger te’n amau atun’phet vua a munding uh pheek,tuipuan,puanza cihkhawng phah a,a khaamkhol uh na himawk, koteng lah tun’hak leh bangmah khaamkholh na meel theihloh tawh thuah,Kawl nupi te lah alawh aciang abeem apang teng tawh khualal ding abangden te’ kawmkal a zankhat nuntak zong baih sakeng. Zanbek hak kei in ko’zong hah pih ung.

Gunkhawm pan lamkal ah zankhat giakin zingsang 9am kiim ah kapa’hong gen ka zakngei Monywa khuapi a cihcih alut ta kahi uhhi.Ka paikhiat na gam palak tawh teh in na thupi suk tektek teisam buang hileh ki lawm.

U Mangin Mandalay motor ahi, a manlang Monywa-Mann Ranger motor te leh a zaptel Hilux car te’ tuan’man a vadawp kawikawi ciangin motor sap tam salua hiding hiven Meileeng tuang zawni hongci ahih manin Monywa Meileeng Station akicih na mun ah Satan mah tawh ka ding liai’luai’ uh hi.

A manlang Ranger te…..Ks..10.00
A zaptel Hilux te pen……Ks..12.00
A tuantual MRT pen Ks..06.80 ahi hi.
Monywa MRT Station… ah, mihai 3….,

Meileeng pen saupi hi a, ko’ bel up mawhna pen mun ah pangpong….!
I ticket limlim en leeng Seat No..cih bang om vetlo hiven.

Tua leh Shwebo pan meileeng hongtung ta ei’….!.ki awng ngeiingaii..mi te tutna kituh hiding hiven tailua kisa ki phuziah ziah…, ka Satan uh zong ko’ tenih sang’.. na gamtei’ zaw vial hidi’ ven
koilam tungta ai’tam???. U Mang le keibek kisal lemlam ung.

A tawpna ah Meileeng paidek tading ahih teh ci in Vok le Ak te’ kipuakna ahi Sik singkuang Meileeng buk neu sungah U Mang tawh ka tuang uh hi. Ka nih mah un kawl puanteen’ka teengtuak uh hi.

Meileeng hong paikhia theisam a, ahi zongin agin’ngaih lua mahmah ahih manin bilhum kawmin ka tuang uh hi.A sawtsawt teh ki thuakzo nawnlo a,a pailaipi mahin a kongkhak hong (open) mai in apua lam ah kakhe te uh khaikhia hibeklo, khevei neknek in katuang nong uh hi.

Meileeng lampi hoih khol hetlo a, alang alang lam ah hoi daidai kawikaw hi. Tua banga ka tuan’ laitak un ka tuan’pih te uh ahi vok le ak te in azun a eek uh na thatha uh a, a meileeng kihuan’na danzui a ko’ kianga hong luangluang ahihlam.. Meileeng ging tawh ka phawk kha vetkei uh hi.

Ka puanteen’ uh, ka sungteen’ te uh honglet petmah teh hongvot nuang nuang ahih manin kathei pan phiing uh a ka din’khiat uh leh ka taw uh pheeng deda zawzen ta a, puanteen’ kheekbek hilo puanak monglam zong na kawt viau viau ahih manin apiangthei dandan a puan kikheek pongphot ahi hi.

Mandalay acihna khua lut luangluang ta….., U Mang mah masa in Zomi sumciil te’ zinbuk “Chin Yeiktha” acih na lam zuanin kaki zui longlongh uh a, thopuan zanpuan cih te a omloh na mun thokaang le namsia atuamtuam bek aki ngah na mun ah zingsang khuavak ding ngak in ka kual ngiiungeu uh hi.

Tua pan Zangkong ciangdong bel Meileeng tutna tungah tukha…, nuam salua himai…Zangkong pan la hong khumsak ding Pa Kap (Gambup lasiam Zamnu pa) tawh ka kimu ta uh a…….. U Mang tawh ki nuihsan in tu’n bel nungta hangh ei’ ka kici uh hi. A baan zomzel ni, MunKhai’pa