Leitungbup aom Zomi khempeuh te tungah itna tawh hopihna

Kongit leitung bup aom Zomi khempeuh aw, Itna leh zahtakna lianpi tawh Topa Zeisu min sungin nakhutuh kong len masa hi. Nadam kim tek uh hiam? I biak Pasian kiangah Leitung bup aom Zomite ading thukong ngetsak den hi. Tutung a, kong laikhakna ah thupi thum hong gen nuam kahihi.

Amasa pen in tukha pen ei Zomite in KHUADO KHA ci-in i ciamteh kha hi-a, tua mah bangin Zogam, Kawlgam leh mun tuamtuam a kikhen Zomi khempeuh in khuado tekin i minam ading thungetsakna leh khat leh khat tha kipia-a, thu kihilh nading hunpha ahi hi. Na omna munmun uh ah khua nado in Pasian kiangah thupha nangen un. Pasian in note Khuado Pawi panin athak in thupha hong pia ta hen.

Anihna ah GZA icih leitung bup Zomite kipawlna pen November kha 29 ni hi-a, tua ahih manin no zong na omna munmun uhah GZA Ni (Global Zomi Alliance Day) ci-in na nabawl tek nading uh thungetna leh kipawl khawmna tawh GZA Day nana mantek nading un kong thum hi. November Nipi nunung pen Zomi Khristian khempeuh in lungdam kohni a izat ahih man bangin tuani-in zong Pasian tungah lungdam nako un. I biak Pasian in lungdamkoh ding hong kal Pasian ahi hi. Zomi khempeuh aw, i biak Pasian, hih ciang hong tun Pasian mangngialh lo-in lungdamkoh tangtang ni. Amah in thupha hongpia ding hi.

I biak Tung Pasian in i Zogam i Zolei leh mun tuamtuam a kitheh thang aom Zomi khempeuh hong huai henla, ki-itna thupha tawh hong phungvuh den ta hen.

Itna lianpi tawh,

Rev. Dr. S. Pau Khan En
GZA Makaipi
19 Oct 2014