Leitung Ci na hi uh hi. (Mt 6:5) ~ Fr. Khuppi

Leitung Ci na hi uh hi. (Mt 6:5) ~ Fr. Khuppi

Ei leitung mihingte pen Pasian in ama lim le meel suun in, hong bawl ahih mah bangin, ih manhphat zia pen bangmah tawh kiteh thei lo hi. Eite manphat zia ih tel theihna dingin Topa Jesu in, Note leitung Ci nahi uhhi hong cihi. Tua ahih manin Ci in bang zahtak in man nei hiam cih thu thawh kisai tawm khat kong kuppih nuam hi.

Ei zomite’n paunak ki nei in i neu pekpan kipan in i Sang kahna ah “C : Ci omlo sa lim lo” ci hi hang. Sa icih pen Mehlim penpen khat a hih tei hang, Ci pakei leh a limna mal khat zong omlo hi. Tua ahih manin, ci lo in meh kibawl theilo a, meh omloh in an kine theilo hi. Tua hi-a Ci pen mihingte nuntak na dingin a thupi mahmah ahihi. Hih pen ih muh theih pak ih gen hi a, ih theih khak loh tampi tak om lai hi.

Ci pen Topa Jesu pianma, BC 2200 lai pek pan kipan in a manpha mahmah suangmanpha zah phial in kingaih sun hi. Tua ahih manin Sengam Kumpipa Hsia Yu in ci tawh kisai in siah (Tax) piak dingin na vaihawm hi. Tuamah bangin Tibetgam ah zong Kumpi Grand Khan ii Lim pen Citangh tawh bawl uh a, dangkatang in zong zang uhhi ci-in Marco Polo in na ciaptehna hi. Tua dangkatang te pen tuni ciang dongin Ethiopia gam Danakil zangkuam ah kizong laihi kici hi.

Tua bektham loin nidang sila ki zuak hun lai in zong, Greek minam te’n sila khat a leiuh teh Ci tawh na kilei uh a, Ci tawh mihing manh natan uhhi. Tua banah, Roma minamte khasum akipiak uh ciangin “Salarium” ci in (Salary acih na) Ci naki pia uh hihtuak hi. Tuma Kum zalom 12 hun lai in zong Sahara Sehnelgam lutna kong pi leh mipil misiamte tual tatna ahi,Timbuktu aki cihna munah Sumbawlte in Ci pen a manpha mahmah Laibu leh Ngunte taangin na zangh uh hi.

Hihzahtak in aki thupi zat mahmah Ci pen vankham bang phial in kingaih sun ahih manin, 1785 kum in Englandgam ah kumsim kumsim in Ci tawh akiman mi 10,000 bang omden hi ci-in Dundonald in na nagen hi. Tua mah bang in 1930 kum in zong India gam ah gamkeek mikang te’n Ci man khangsak bek thamlo in Cikhun(tax) dongsak ahih manin Mahatma Gandhi makaihna tawh tai 200 val a gamla Ci apianna Arabean tuipi kiang dong Ci pua dingin khetawh na pai uh hi.

Ahihleh sanggam te aw, Topa Jesu hong paima pek nangawn in hihzahtak in mannei in kithupisak a, mihing taang nangawn in akizang Ci pen, Topa Jesu zong nak theih mahmah ahih manin ama nungzui Christiante zong tua Ci mah bangin amanpha ih suah deihna tawh; “Note Leitung Ci nahi uh hi,” ci-in Mate gelh Lungdamna LST sungah kician takin hong hilh ahihi.

Ahizongin tua Topa Jesu in agen behna ah, tua Ci pen a alna bei leh bangmah kimanna nei nawnlo in, lamlak ah kipai dinga mihing te khenuai ah kisikcil ding hi, na cihi. Ci amanphatna ahang in a Alna hang hi a, tua Alna in Limna piangsak in, tua pen Pasian in atuam vilvel in Ci tungbek ah apiak manphatna khat ahihi. Tuamah bangin, Mihingte ii manphatna zong ei mihingte bek tungah atuam vilvel in Pasian in hongpiak manphatna hi-a, ganhing dang tuamtuam te’n tua manphatna ngah khalo uh hi.

Tua ahih manin, lawm le gualte aw, ih manh neihna, ih manhphatna, ih thupiitna, ih vaangneihna te mangngilh kei ni. Nang na manphat mah bangin kei zong mi manpha ka hihi. Nu le pate amanphat mah bangin tate zong manpha hi. Uham te amanh phat mah bangin Naupangte zong manpha hi. Puteek piteek te amanphat mah bangin Nau ngek suak tuung le nute gil sungah leitung muhding ngaka aom lai naungekno te zong manpha hi.

Leitungah mipil misiamte ih zahtak mah bangin, mihai mimawlte zong nawlkhin tuan ding hilo a, mihau miliante thupi sakin vaang ihpiak mah bangin, mizawng daipamte zong paampaih tuan ding ahi kei hi. Banghanghiam cih leh mihaupa zat Ci zong Ci mah hi-a, mizawngpa zat Ci zongh Ci mah ahihi. Dimci (Dimpite khuataw a piang) zong Ci mah hi-a, Iodine ci zong Ci mah ahihi.

Tua hi-a, Ci banga amanpha mihingte pen Topa Jesu in mong neilo itna tawh hongit in, manh kiciangtan zolo a Sisan Manpha tawh hong lei lailai ahih manin, Nang le Kei sang amanpha zaw leitungah kua om nawn ding hiam? “Note Leitung Ci na hi uhhi” (Mt 6 : 5)

# Iodine pen kizangh pha diak se ahih teh, thupha ngah beh ih citam maw? Fr. Khuppi