Laphettoh ~ Hau Za Cin

Laphettoh (လက်ဖက်သုပ်) ~ Hau Za Cin

Taiwan pan London a om Sia Dongbawi tawh online kiho kha in, “Ann na ne ta hiam?” ka cih leh, “Ne nai keng, laphettoh leh niangtui dawn ing,” hong ci hi. “‘Laphettoh’ na cih bang ahia?” ka cih leh, “Niangteh a kine te e,” hong ci ziau a, ka thei hetkei hi. Niangteh a kine thei a om lam thei ngeilo ka hih manin lamdang ka sa hi.

Hong ciamnuihna ahi tam ci kawm, a taktak ahih leh bang ahi zen tam aw ci kawm si, “Niangteh a kine thei om maw, niangteh pen niangtui bawlna ding beka a kizang hilo maw?” ka cih sawnsawn ciang, amah zong ka telloh lam tel ahih manin a gendan ding hong sau pian a, a bul takpan hong pan kik in kicing takin hong gen a, kician mahmah, mitkha ah kibawltawm thei phial cih bang himah leh a mel kimu ngeilo, a omlam zong kitheilo ahih manin …nek dinga a kibawl, a kine thei niangteh hi… acih hangin ka tel thei tuan kei hi.

Tuni ahih leh laphettoh ka ciamkha ta a, a limna nangawn a thei dekdek ka hita hi. Laphettoh genloh ‘laphetzi’ pen India ‘chai’ sang limzaw pekpek hilo hiam ka ci hi.

India lamah niangteh nek theih, niangteh kine cih tuabang kiza lo, kitheilo ahih manin lamdang asa ka hi hi. Leitung niangteh lak ah Darjeeling Tea pen a lim pen a kigen ciin kithei a, a diktakpi mah hiam ka theikei hi. Commercial items ahih manin amau bawl ciat a limpen asa uh hikha maithei. China te in zong amau niangteh pen a limpen mah ci a, Sri Lanka te in zong amau gam niangteh mah thupi bawlpen zel uh hi.

A thupi pen a kitheihloh hang amau-a ciat mite in bel na thupi bawl thei zel uh hi. Tua manin Kawlgam niangteh nektheih om a, India ah niangteh nek theih omlam kitheilo, leitunga niangteh zuakna lian penpen Dr. Neng Ngaih Lian te inn kong mai ah Innpi khat Guwahati ah om deda deep napi, a tua bang lam kithei kha hetlo hi. Nek ding sang dawn dinga kibawl tamzaw hi peuhmah ding hi.

Laphettoh pen a lim penpen dingin a lim nam tuamtuam tawh a helkhop, a gawm, a mixed uh ciangin a lim diak ahi hi. Singgah tawh hel, be nam tuamtuam tawh hel, maimu, tangmaimu, peanut, shrimp, etc tawh a hel bang uh ciang sathau namtui tawh mek lai leng… slurp slurp slurp… i lei kiliakliak kha hi. Nuts tam ahih manin cholesterol a tam diam i thei kei a, a niangteh nek theih pen bel cidam mahmah dingin ka um hi. Singteh himawk ahih manin. Hau Za Cin
Phuitong Liim