Lamka News Update (10 September 2015)

Lamka News Update (10 September 2015)

Tuni in Phungzathang Tonsing, Vungzagin Valte, Chaltonlien Amo in MLA pan a tawpna uh lai khia a, T Manga Vaiphei pen damlohna hang tawh Delhi ah om ahih manin lai khe lo cih kiza… Zani (9/9/2015) in Ginsuanhau Zou in lai khe khin hi. Ahi zongin hih a laikhiat uh pen Governor in sang ding maw, sang lo ding cih kithei nai lo hi. Amau banah Naga MLA 4 in nungin tawpna lai (resignation letter) pia khin uh hi.

Hici banga MLAte in resignation hong bawl uh pen a ban bangci bangin Joint Action Committee in kalsuanpih ding hiam cih bel i thei kei a, MLA kitawp (resigned) ten bang politics hong sai uh diam, bye election om kik ding maw, mai lamah tu sangin buaizaw thei dinmun hi, cih ka ngaihsutna ahi hi.

Zomi, Kuki, leh Naga in thukhat in kivaihawmna tuam (separate administration/Tribal State or Zogam/Zalengam) ngah nadingin bangtan pangkhawm ding, bang hiam hamphatna om ding kituhin ei leh ei (Kuki, Zomi, Naga) teng mah hong buai uh diam? Tribal state /UT bang ngen taktak hi leng capital peuh kituhin ei tribal sungmah a kibuai diam?

Nagate in hong pompih taktak zo diam? State bang kimu leh amau Nagaland a belh thei di dan khawngin kilemna a guk a om a, hong panpih ahih kei leh tua zahin hong pang law lo mai thei uh hi. Tua kawmkalah zong Nagate leh sanggam Kukite pen a area uh kibang, teengkhawm uh ahih manin amau kal zong bangcih ding cih pen a buaihuai mahmah ahi hi….

Bang teng hi leh, na khempeuh bel tunglama Pa vaihawm hiin, Zomi leh Zosuante adingin hong vaihawmsakna thupi ahihna zong kithei lo hi. Makaite in tampi ngaihsun uncin, lam zang taka mipite hong makaih a, i sanggamte sisan luang pen a mawkna hong suak peuhmah kei hen, cih i deih hi…..

T. Sawm Lian