Lamka buaina Zomi te’n Autonomy gam ngahna in neihen

Lamka buaina Zomi te’n Autonomy gam ngahna in neihen

Dear Zomi U le Nau,
Tulaitak-a Lamka buaina vai meizom-in, India leh Kawlgam gamgi kikhen vai pen kei’ theihna/ muhna khat hong kuppih nuam ingh.

English Colonial Government [Kawlgam: 1824-1948 January ni (4) Indepence ngah masiah leh India: 1947 August ni (15) Independence angah ni masiah] hunlai pek in Kawlgam leh Indiagam “Diarchy Rule” / Dai-archy oh-choh-yei ci-in Kawlpau in tuei-yei, khuei-yei oh-choh-yei pyattanar cih Myanmar history taangthu ah akisinn zahkhat in khuei-yei in zo ahih manin atuamtuak-in hong uk uh ahihi.

Tua hi-a, hih gam-nih atuamtuak-a ukna hong neih kipat, gamgi akhen ding ciangin, India lam pan thuneite leh Myanmar lampan Zogam tua hun-a Ukpi Kam Hau tawh gamgi vai ah gamgi-phuh ding ani-lem-khat kiciam-in, a-omna tuak uh pan kuankhia dingin akituah-tuahna vuah gamgi phutpah ding cia kithukimna a omsa pen, tua akiciiamni-liann takin Upipa Pu Kam Hau azi siciitciat-a dahlua in bangmah-dang ngaihsunzo vetlo, adahna bek tawh kapkap in ni-3-sung vilvel inntualzang ah kapin omcip kicihi. Tua manin Lamka district buppi pen India gam lam suakin, India / Vai leh Kawl gamgi in ih Zogam khen nih a hong suah ahihi kici hi.

Cihnopna ah Kawlgam pan va paito a ava luahto hipeuhmah lo hihangh. Taang pek-a ih Zogam leh ih Zolei hi. Lamka a’ eimi Paihte kampau te’n atheihloh man un Chin State pan-a pai ih hihman in Paite akici hihang peuh cimawkmawk uh. Paihte hong kicihna pan Paite peuh aa alaihdan aa kinei mawkmawk. Hi-peuhmahlo hi. Taangpek-a ih pu ih pa te luahna sa Zogam leh Zoleitang hi. Asung-a teeng mite ZOMI ih hihna pom tinten ciatni.

1988 Kawlgambup Students’ Boy-cott Sangnaupang buppi lungphona apian khit deuh takin Lamka lam pan Zomi National Congress (ZNC) cih hong thang vangvang-a amakai pi Pu Thang Khan Gin @Zo Khan Khual pen tua hun-a India gam Prime Minister Rajib Gandhi tawh sang akah khawm ahi kici in tawl khat kimuang mahmah in Kawlgam lam pan aa kei akipan Zomi Nationalist te kilawp thei mahmah hi. Ahizongin tua zawh asawtlo khat in Pu Go Gin in Paihte National Congress (PNC) hong phuang khia sese-in tua pan ZNC hong thanem mahmah hi.

Tua meizom in Pu Thang Khan Gin in agenkhiat kammal kazakngei khat ah ei Zomite in Autonomous Administrative Region gamkhat ih ngahzawh nang-in; “Tu-le-tu-a Zomi asangzo pah-lote in nih vei atuak/ thuak pelmawh ding vua, ahizong tu-a Zomi asangzo pah-te in khat vei bek athuakkha ding uhhi,” ci-in agen kici hi. Tua bang ngeei-in 1997-98 kum in Paihte leh Kuki unau beelkaang kituh in sanggam Kukite’n Paihte gamteng lamangg khin ding dinmun ahihlaitak nung-a Pu Zo Khai gen dan liann takin Kawlgam lam-a ei Zomite in huut leh lep va thuah-to in kilemna va lakpih in Paihte te’n agamngeiteng uh ngahkik zo pan uhi. Tua pen Pu Thang Khan Gin genna tawh kituak takmah-a Zomi pompahlo te in nih vei athuak ding lakah amasa thuakna ahi dingin ka mu hi.

Tu tung-a Lamka buaina leuleu pen ei Zomi bup in Autonomous Administration Area khat ih ngah nang a thuakna dingin ka mu-a Pu Thang Khan Gin ii mipil thugenna maan mahmah ka sa hi. Tutung Lamka lam buaina pen ei Zomite in Autonomous Zogam khat India ah ih muhzawh nang hong hih nang in pantheih zahzah aa mapan khop ding ahihi. Agam-a om eimi te in zong Zomi’ min mah tawh Movement kician tak hong neihtohtoh suak nangin ngaihsutna hoih apia ih hi pah hi. Paihte’ min peuh, Kuki’ min peuh tawh hipeuhmah lovin, ZOMI’ min ngiat mah tawh ZOMI HILL-TRIBE AUTONOMOUS ADMINISTRATIVE REGION cih khat Face of Movement in hong neih ding uh ngaihsutna hoih khat ih piak kawm in ih ngahzawh dongin pantheih panmawh in ma panpih ding hi cih Honpa ih TO ZEISU KHRIS’ Min in akizawn phapha ih hihi.

LONGLIVE ZOGAM-ZOLEI!
PROSPER ZOMGAM & ZOMI ALL THE TIME!
MAY GOD BLESS ZOGAM & ZOMI ABUNDANTLY FOREVER AND EVER!!!
ZOGAM LEITANGH AH ZOMITE IN THUNEIHNA TAKTAK NEI TA PEUH UH HEN! AMEN.

Sia Thang En