Lamdawt tawnse dahni

Lamdawt tawnse dahni

Lamdawt tot pen kitungbaih napi-in, kigim mahmah hi. Lamdawt tot pen hun tomno adingin, ahoih bang napi-in, mailam hun saupi adingin, lamdawt tot loh mah nahoih zaw veve hi. Lamdawt tawn se dah ni.

Hauh nadingin lamdawt i tot lai teng, lungkim hun cih om ngeilo dinga, duhhop huaihamna tawh kidim ding ihih manin i lunggim semsem zawlai ding hi. Thuman, kuhkal takin lampi maan i tot nak leh, hauhna zingni hong suah hun khat hong om veve ding hi. Lamdawt tawn se dah ni.

Lamdawt tawn loin thuman kuhkal takin i kalsuan laitakin i lampi haksa kha thei mah ding hi. Tua bang hun ciangin zong lamdawt tawnin tawmvei sung nuam asa pakte engkha kei ni. Lamdawt tawnte leh thuman kuhkal takin lampi maan a tawnte’ thumong a kilamdang hun hong om pelmawh ding hi. Lamdawt tawn se dah ni.

Lamdawt tawnin tung baih ding cih pen mihingte’n i ut hi-a, lamdawt tawn se loin, thuman, kuhkal taka mainawt ciatciatna pen, Pasian’ deihna hizaw hi. Lamdawt tot manin a kinuamsa pah ding hi hetlo a, lam dawt totna nungah buaina leh lungkhamna in zui thei zawsop lai hi. Lamdawp tawn se dah ni.

Lamdawt tot pen a kitunbaih mah bangin sawt kikhom lo a, lampi maan tot pen cihtak kuhkal a kisap mah bangin sawt kimang zaw hamtang hi. Lamdawt tawn se dah ni.

Lam dawt tawn lo sa-in a kigualzo/lawhcing thei lua hi cih pen i phawk tawntung ding kisam hi. Ama’ hun a tun nak leh lamdawt tot sangin, amanlang zaw-in, Pasian in nasem thei lua hi. Lamdawt tawn se dah ni.

“Limtakin ngaihsunin geelgeelna pen hauhna lampi hi-a, nawhsa-in lopthop hihna pen zawnna lampi ahi hi.” Paunak 21:5

Khazih sungah, ✍️ David Tuang