Lai sim a manphatna (Puteek khatin a tupa tungah gentehna a gen khat)

Lai sim a manphatna (Puteek khatin a tupa tungah gentehna a gen khat)

Nikhat Putute Lui gei khat ah hong tu khawm uh hi. A tupapa in a pu kiangah, “Pupu…nisim a na lai simte bangzah na ciamteh zo a…mangngilh ding veve banghang lai simsim na hia,” ci-in a gen hi.

Puteekpa in nuihmai kawmsa in a tupapa kiangah, “Hua taka Meihol kikoihna seeng va la sin aw,” a ci hi. A pu in bang a deihna hiam cih a telloh hangin tua seeng vom gemgam a va la hi.

“Tua seeng tawh lui tui hong dim dih oleh,” a cih ciangin lamdang sa mahmah kawmsa in a pu thumang in tui a va dim hi.

Seeng sungah tui dim ding cih pen ahi theilo ding thu ahihlam etpak in zong kitel mahmah hi. A tupapa in tui sungah a seeng diah suk zel, khaikhia to zel hi. A seeng sungah tui kikhol thei hetlo a, tui a om thei kei hi. A pu gennopna bangmah telsiam hetlo kawmsa mahmah in hong semsem hi.

Tua bangin tui a ngah theihloh hangin zong a pu in hanciam lai sin aw…a cihna tawh kizui-in tui dim kikkik a tui hai khat ding nangawn a ngah thei tuan kei hi.

Tua ciangin Puteekpa in, “Tua na seeng tawi en sin awleh…den a tawh a kibang na,” ci-in a dong hi.

Den in a hih leh meihol hangin vom gemgam in om a, niin mahmah hi; tu’n ahihleh tuateng bei in a sian liklekna a tupapa in a mu hi

Puteekpa’n a thugen zom a, “Lai sim icih pen tua na seeng in tui na dip mah tawh kibang hi. Tuite in seeng tumcip in..tua seeng ii sungtawng kawmbuteng va tok gawp a, hici et pakleng bangmah phatuam lo tawh a kibat hangin tua tuite in seeng a sawpsawp na hi gige hi. Lai simna icih in zong hidan mah hi-a, mihingte lungsim sungtawng dongin hong sawpsiangsak hi.

Tua in lai simna ii a manphatna ahi hi. Laibu khat i sim khit phet in i theihna hong khang pah hanhan a, pil lawh pah saisai cihpen om thei pah samlo hi. Ahi zongin laibu khat pepeuh i simna tungtawn in i phawkkhakloh i thu theihna lungsim(khuak) in na khat teitei ka ciamteh kiukiau hi. Tua i theih kiukiau thu in i theihloh kalin ei pen hong na makaih toto ahi hi” ci-in a gem hi.

Sen laigelh siam khat in a genna ah: “Laibu hoih khat ka sim ciangin amaute in kei hong kaito uh na hi gige a, kei ka tun taktak ciangin amaute in kei tawh hong omkhawm den uh hi,” na ci liang hi.

Laibu khat i simkhit ciangin i lungsim khatvei a silsiang ihi hi. I sim khit thu le la khempeuh mangngilh gai lel hang..kici kha thei hi. A taktak in cileng…i laibu simna sunga thute in i lungsim kiukhat ah mun na la a…tua thute in i phawkkhak loh kalin i nuntakna hong puah toto ahi hi. Tua ahih manin lai sim ding thadah kei ni. Lungdam, Dong Mung