Lai Siangtho bulphuh Theology thu thuk nono

Lai Siangtho bulphuh Theology thu thuk nono

Theology Pasian’ thu thuk nono
1. Tulai thusuakte, kamsangte maan maw maan lo cih pen a hoihna zong om, a hoih lohna zong om, a maanna zong om, a maan lohna zong om cihte tawh khen ding hi lo a, Pasian’ kiang pan hong pai maw, tuate Christian upna bulpite tawh kithuhual taktak maw kithuhual tawntung zolo cih tawh kan ding hizaw hi. LST tawh kituak maw kituak lo ci-a kan zawh ding kisam hi.

2. Lai Siangtho in Pasian ong sangkhia hi lo a, Pasian in LST ong sangkhia hi zaw hi. Kamdang in gen le’ng LST in Pasian ong suah khia hi lo a, Pasian in LST ong suahkhia hi zaw hi. (sangkhia = breathes out)

3. Judah mite in tanglai kamsangte’ gente Pasian’ kammal hi a cih mah bangin Christian te in zong nungzui sawltakpite’ gente, gelhte Pasian’ kammal hi kici hi.

4. Pasian in milim biakna deih lo ahih manin Israel mite thukham sawm a piak lai-in a mel kilang sak leh lim in suai-in tua milim bia zaw ding uh ahih manin a kimu thei lo a aw bek tawh hopih a, Israel mite lau mahmah uh ahih manin, Moses palai dingin sawl uh hi.

5. Lai Siangtho gelh cilte’ khutgelh (original) pen mihingte’ khut sungah om nawn lo hi. Tua om nawn lohna pen lamdang sak ding hi lo hi. Tua (original text) gelhcilte om lai hi leh lai gelh sak Pa Pasian sangin a kigelh laidalte kibia zaw dinga, a sunga om thute sangin a Lai Siangtho bu kibia ding hi. Tuni tuhun mahmah in zong mite in Lai Siangtho thu neih loin bu neih bek mawk uh hi.

6. John Calvin in mihingte pen milim biakna ah puk pahpah ahih manin amah zong a sih khitteh a guh a tang a kibiak khak ding lau ahih manin, a nungzuite kiangah a sih ding ciangin ka luang kuamah in a zon kik theih nawn loh nadingin ka han ah ka min tawh ciaptehna om sak kei un ci-in vaikha a, tuni dongin John Calvin han kithei zo nawn lo hi.

7. Lai Siangtho siamte in Moses luanghawm Sinai mual tungah Pasian in a seelna pen Israel mite in Moses luang hawm nei leh Pasian sangin tua luang, tua lim, tua mi bia zaw kha ding ahih manin seel hi ding hi ci uh hi. Thukham sawm tawh kisai ah zong a khatna le a nihna ah hih milim biakna (idolatry) tawh kisai a deih loh luatna tawh na kipan pah hi.

8. Lai Siangtho ii thot thuhilhsya sangin a pualam thute ii thot thuhilhsya kitam mahmah ta hi. (thot = impact)

9. Tu ni a ih zat Lai Siangtho ciat pen a kitei Lai Siangtho (translated Bible) vive hi a, tua a kitei khiatna mu-zian (original text) pen kuamah in kem kha nawn lo hi. Tua ahih manin Lai Siangtho bu (version) tuamtuam ong suak hi. Ih zat bulpi New King James maw, NIV maw, ESV maw pen bulphuh kawm a, a dangte tawh etkak ding pen a kilawm mah ahi hi. Banghang hiam cihleh tua nang zat Lai Siangtho zong a kitei Lai Siangtho mah na hi den hi. Tua hi a, a kitei Lai Siangthote pen khialhna (eror) khat peuh a om thei mah hi a, kicing (perfect) taktak lo hi. Ahi zongin a-mu-zian (original text) pen khialhna khat zong om lo hi. Tua original a bulphuh vive Lai Siangthote etkak zo lehang tua tungtawnin a-mu-zian (original text) hong kimu thei kik dinga a kicing Lai Siangtho (perfect) Bible mah a nei suak veve hi hang. Bu khat ah a kicing lo pen a dangkhat ah na kicing a, bu khat ah khialhna pen budang khat ah a maanin na kitei hamtang hi. Tua ahih manin Lai Siangtho version khempeuh manpha lel hi. Etkak in na lungsim ah gawmtuahna tawh Lai Siangtho gelhcilte’ khut gelh (original text) a nei na hi ding hi.

By Evan. Suangh Dal