Lai ka gelh ciangin (2) ~ T. Sawmlian

Lai ka gelh ciangin (2) ~ T. Sawmlian

‘Lai ka gelh ciangin…” cih sungah ka laigelhzia pawlkhat ka gelh khin hi. Tua banah pawlkhat hong hawmsawn nuam lai ing.

1. Sanggamte pawlkhat in min (noun) khit ciangin ‘in’ a om leh zom uh hi. ‘Pathianin min hmangaih em em a’ cih bangin gelh uh a, ahi zongin ken bel, ‘Pasian in hong it mahmah hi’ ci-in, ‘Thangpu in nasep hahkat hi’ ci-in ka gelh hi.

2. “A (3) Veina Xyf Khawmpi” cih bang, “Kum (1992) in hong nusia” cih ahi zongin, “Mi (4) in lawhcinna ngah hi” zong ka ci ngei kei hi. Ahi zongin, “A 3veina Xyf Khawmpi” ahih kei leh (ahkl), “A Thumveina Xyf Khawmpi” cih bang, “Kum 1992 in hong nusia” ahkl, “Kum tul khat zakua sawmkua le nih (1992) kumin hong nusia hi” ci-in ka gelh deudau hi. “Mi 4 in lawhcinna ngah hi” ahkl, “Mi li (4) in lawhcinna ngah hi” ahkl, “Mi sawmnih le li in lawhcinna ngah hi” ka ci hi.

3. “Kum 2020 sungin thu tampi piang hi” cih bangin ka gelh a, “Tukum (2020) sungin thu tampi piang hi” ka ci hi. “Lianpu pen (zi nei khin ahih hangin) a lawmte tawh nungak a hel kimu hi” cih bangin zong ‘parenthesis’ ka zang thei zel hi.

4. “Itna (love) pen khansak theih hi” ci-in ka gelh a, “Itna, love pen khansak theih hi” ci-in ka gelh ngei kei hi.

5. “Topa i mu ding hi” ci-in ka gelh a, “Topa ih mu ding hi” ka ci ngei kei hi. “Topa ihmu ngei lo hi” cih bangin ka gelh hi. “Ih kisap Topa hi” ci-in ka gelh ngei kei a, mite in ‘ihmut kisam Topa’ a sak khak ding uh ka lau hi. Tua ahih manin, “I kisap Topa hi” ci-in ka gelh hi.

6. Double vowels tawh kisai pen i sim ciangin a kitelzawkna dingin ka zang zel hi. Tam zatloh ka sawm hi. Thuum (beg, pray), thum (three), thumanna (obedience), thumaanna (righteousness) cih bangin, “Mi thum in thuumna nei uh hi” cih bangin “A thumanna leh thumaanna hangin pahtawina kipia hi” cih bangin ka zang hi. ‘Tua tengah double vowels zat ding’ ka ci thei kei a, a kiim a paamate tawh kizui-in koihna dinga a hoihte ah ka koih mai hi. Lei/leei/leii cih danin zang ding ci lehang zong piang thei lo a, lei (leei & leii) cih bekbek pen nam nga bangin kizang thei mawk hi. ‘Hai’ bang zong zatna tampi om a, double vowels zat hangin zong a khiatna kitelkim pah tuan loin, ‘lei’ mah tawh kibangin a kiim a paam a thute tawh a khiatna theih dingin ka tuat hi.

7. Min leh min a kizoma gelhloh hamtang ka sawm hi. “David Jerusalem ah om hi” cih sangin, “Jerusalem ah David om hi” ka ci a, a kizom teitei a om ciangin coma (,) tawh ka khen hi.

8. Mikang pau tawh kilehngat-in, Mikangte in, ‘Red cow,’ ‘Red Sea’ a cih uh pen, ‘San Bawng’ ci loin, ‘Bawng san’ ka ci a, ‘San Tuipi’ ci loin, ‘Tuipi San’ khawng ka ci hi. T. Sawmlian Thomte