Lai ka gelh ciangin (1) ~ T. Sawmlian

Lai ka gelh ciangin (1) ~ T. Sawmlian

A gen hi lo, a gelh a ka gelh ciangin, laigelhzia ka zat pawlkhat anuaia bang ahi hi.

1. Khat sanga tamzaw: English mah bangin Zomite in lai i gelh ciangin khat sanga tamzawte pen kizomsak hi hang. English ah ‘village’ a cih ciang ‘khua’ cihna hi a, ‘villages’ a cih ciangin khat sanga tamzaw gen ahih manin ‘khuate’ hi suk pah hi. I zatzia kibang, amau ‘village s, boy s, girl s’ ci ngei lo uh ahih manin ken zong ‘khua te’ ka ci ngei kei hi. Englishte aa ahih mana zui hizaw loin, i zatzia kibang hi a, amau mah bangin ken zong khen sese lo hi ing.

2. ‘in’ tawh kisai: Thupiakna/sawlna/ngetna ahih a, a ban a om nawn kei leh ‘in’ pen ka tuamdinsak hi. ‘Na va sem in’ cih ciang nasem dingin kisawl hi. ‘Na semin va kuan in’ cih ciangin sawlna mah ahih hangin a sa pen zomin a nung a pen tuam ding a, sim ciangin a masazaw pen a gin niamin, a nunung pen a gin khauh hi. “Amah dingto-in tapa kiangah pai-in, van lei dingin, ‘Pai in’ ci-in a sawl hi” ci-in ka gelh hi. Vowel nih a kizop ciangin a sim nopna dingin hyphen (-) mun pawlkhat ah ka zang hi.

3. Laimal gol leh neu: Thugelh kipatna khempeuh ah laimal gol tawh ka pan a, khawlna (fullstop) khit, thu ka gelh kik ciangin laimal gol ka zang hi. Mi thugen ka gen sawn ding ciangin zong ka zang hi. Gtna. “Thangpu in, ‘Ka lungdam mahmah hi’ ci hi,” ciin ka gelh hi.

4. Fullstop: Utna mun peuh ah ka koih kei a, Pa. Thangpu, Upa. Khualkhek ci-in ka gelh ngei kei hi. Ahi zongin Tg. Liankip, Rev. Suantawng ci-in ka gelh hi. Bang hang hiam cih leh Tg. pen ‘Tang’ kitomlak hi a, Rev. pen ‘Reverend’ kitomlak ahi hi. Pi, Pu, Pa, Lia, cihte pen a kitomlak hi lo, kim khin ahih manin Pu Khekno, Lia Cingkuak ciin ka gelh hi.

5. Kammal kizom leh khen: English bangin gawm leh khendan kibang a kizat theih nailoh hangin, nakpi takin ka hanciam hi. “Katanumeinakhoihkeiin” cih pen – (a) “Ka tanu, mei na khoih kei in,” (b) “Ka ta, numei na khoih kei in,” (c) “Ka ta numei, na khoih kei in,” cih ciangin (a)ah, a tanu kiangah mei khoih lo dingin hilh cihna hi; (b) ah, a ta kiangah numei khoih lo ding hilh hi; (c)ah, ama tanu pen mi khat kiangah khoih lo dingin hilh hi. Tua ci bangin gawm leh khenin a gennop kilamdangsak ahih manin tuate ngaihsun kawmin gelh-in gawmin ka khen zel hi.

6. ‘zaw’ leh ‘pen’: ‘Hoih’ cihin ‘hoihzaw’ cih leh ‘hoihpen’ cih nei hi; pil, pilzaw, pilpen, cih bangin. Tua ahih manin tua bang gen uangnate ah ka zom hi. “A hoihzaw a om sam hangin, a hoihpen mah tel zawk ding hi” cih bangin ka zang hi. “Thangpu pen migi hi,” cih ciang ka zom kei a, “A khut zaw mahmah hi” ka cih ciangin ka zom ngei kei hi.

7. ‘in’ leh ‘pen’: “Thangkuak in Lianpi tapa hi,” ciin ka gelh ngei kei a, “Thangkuak pen Lianpi tapa hi” ka ci hi. “Thangkuak in Lianpi it mahmah hi” ka ci leuleu hi.

8. ‘ki’: ‘Ki’ pen mathuap ahih manin vasa nam khat leh gamsate lu a om ki a gen ka hih kei buang leh mathuapin ka zang hi. ‘Kiniamkhiat, kiphasak, kihua’ cih bangin ka zang a, “Tukum lo lamah ki tam mahmah hi” ci-in lo a vasa nam khat a tamna thu ka gen hi. “Gamsa tampi in ki nei hi” ka cih ciangin gamsate pumpi a om ahi ‘ki’ ka genna hi a, ka zom kei hi.

9. Te Dim, Lam Ka, Lai Tui, Zo Mi, Eng Lish, ci-in ka gelh ngei kei a, Tedim, Lamka, Laitui, Zomi, English, ci-in ka gelh hi. Min bel amau zatzia leh ngeina, a neite deihna [hi a ka theih] zuiin ka gelhsak zel hi.

10. Uang genna kammal nih kizomte ka zom hi. “Hoih mahmah, hoih lo semsem, lian toto” cih bangin ka gelh hi.

11. ‘aw’ leh ‘o’: “Aw” pen a ginsau khempeuh ah ka zang a, a gin tom leh ‘ou’ gin khempeuh ah ‘o’ ka zang hi. “Gam laka zawng i zon leh kizongsang thei a, kizawnlawh thei mawk a, kizawnzawn lehang zong kizong man lo thei hi. Moh themkhat nein awng lehang, i otna hangin i gawl gol gawp thei mawk hi” cih bangin ka zang hi.

12. ‘ah’ tawh kisai bel zatzia kician ka nei kei a, min (noun) peuhmah ah zom loin, a dangte ah a maiate tawh zom lehang a piang thei diam, a hoih diam cih ngaihsun ing… Nang e? T. Sawmlian Thomte