Kuppihna: Mindat Paina ~ Khupkhan Thang

Kuppihna: Mindat Paina ~ Khupkhan Thang

Tg. Mung Laan Thang Mindat khua khualzinna kasim ciangin kei zong kakuppih nop bawlkhat hong om hi.

Kumpi lam pan development project adiil ahaa in om ahih man in nasep tam mahmah hi. Tua ban ah telhawng zong Japan te’n nak lei mahmah uh ahih man in nuntakna baih hi. Tu’n strawberry aciing zong omta hi. Atamzaw in bel telhawng nak ciin mahmah uh hi.

Ei Khamtung mite in lokhawh tawh taanglai pek akipan ihpu ihpa khang, tudong ciang nungta te ih hihi. Mi pun’na (Population explosion) zui in, lokhawh tawh ihgam ihlei ihkham nawn kei hi. Munkhat pan munkhat ah kisuan lo khawh dan (Slash and burn shifting cultivation) zangh ih himan’in, ihgam tul semsem aa, an ih kham kei semsem hi.

Ihpu ihpa te ciin’; Vaimim, Taang, Kawlmim, Baal, Kawlkai, Haikai Haliiam, Be namtuam tuam, Mehgah mehteh etc. teng mah lumlet kawikawi in ih ciing ciing hi. Tua ahih man’in, khangthak te in, an kikham zawkna Kawlgam, Vaigam, tuipigal kai in ihlal lal ta hi. Ih gam ah khangualphalo, pitek putek teng bek a kinusia hi aa, khuangaihhuai mahmah hi. Ihgam ihlei hici nusiat mawk ding ih hiam?

Abeisa kum 70 khawng aki pan, eigam tualsuak (Native plant) ahilo, leengla sumsuak thei (Cash Crop) singgah kung te (Exotic plant); Apple, Coffee, Niangteh (Tea), Lingmaw(Tangerine), Bokthok or Nailung an kung (Mulberry) etc. Vaimim, Taang, Anteh Theipuam ta’ng in, ciin’ ih kipan hi.

Ahizongin, tualsuak singgah kungte hilo mawk ai ciang kum 10 sung bang hong hoih mahmah sam na ven, damdam in hong tul semsem aa, tuhun ciang kisuan nawnlo hi. Kumpi te hong thataang suansak Daidawng’ te lah mualsuak zo samlo hi. Tualsuak singgah kung ahi, Zawngtah cite bek mah hong khantul ding, khang khat khangnih kine dingdan ahihi.

Tua ahih ciangin, ih tualsuak singkung or ankung (Native plant) ahii leh sumsuakthei an kung (Cash Crop) ahi “Telhawng or Tellawng” leh Aigia-cil (Cardamum) suan’ leng ih singkung te zong phulphuk kullo, Lothak zong zuatzuat kullo, singkung liim tengah kisuan lel ding aa, ihgam zong guahtui te hoih kik in, hong dumkik ding hi. A lauhuai minam hong beisak ding “Beng” zong ciin’ ciin’ kul nawnlo ding hi.

Telhawng leh Aigia-cil te ihtualsuak ankung (Native plant) ka cih na in:- I taangthu ah Cing Khup or Zawl Cing asih khit ciangin Ngambawm misi khua ah vahawh hi. Misi khua ah a innte uh “Telhawng” vive tawh kilam ahih man’in tovet loin, Ngambawm pai leh a sualte uh kitan ziahziah hi ci hi. Ih taangthu sungah, Vompi leh Telep Aigia-cil sawk khawm zong ih thei hi.

More: Mindat Paina ~ Pu Thangboi

Tua ahih ciangin, taanglai pek akipan ih Khamtung gamah “Telhawng leh Aigia-cil” tam mahmah cih ih muthei hi. Tua ahih ciangin, leengla ankung (Exotic plant) te bang in puahpuah zuunzuun (Pruning) kulloin, atang vawh (Sow the seed) peuh leng hongpo bek thamlo hong hoih mahmah ding hi. Japan gal WWII lai aa Japan sum or Japan Dangka te hilo in Japan sum (Yen) taktak ih lawh ding ahihi. “Mi khat peuhmah in na a sep nop kei leh, tua mi in an ne kei hen” Thesalon Nihna 3:10

Khupkhan Thang Taithul
Norman, Oklahoma