Kumthak leh ih nuntak kaalsung ama nungzui a hong makaihding hoihkhat

Kumthak leh ih nuntak kaalsung ama nungzui a hong makaihding hoihkhat

Lono namun tui kiangah kei hong kha hi. Kum 2005 kum in Turkey gam, Istanbul khuapi nai’ah tuuhonpi khat lak pan amakaai madawk tukhat in ken sang mahmah tung pan alensuk ciangin, anung pan azui tuuhonpi lak pan 1,500 kim bangin amakaaipa uh nungah ahonpi-in leng uh a, tua te lak pan seh thum suah seh khat si pah in adang teng liam pha mahmah uh ci hi. Zuih ding lampi theihlo/ atello tua tuuhonpite in ngaihsut theihna neihlo in amai a paite dan zui a khat khit khat kizui leh ahi ding mah sa’in ken ah leng ngam uh ahi hi.

Lungsim, sung pan ngaihsun a muanhuai/ muantaak ding makaai alutang leh anungzui ngam pah ding akisap lua dante gentehna akizon simsial in, tuuhon sang gentehna hoihzaw omlo hi ci-in mipil te’n gen uh hi. Eite khempeuh tuu tawh ih kibatnathu Prophet Isaiah in (Isa 53:6) Eite khempeuh in tuu bangin lam i khial khin a, eite khempeuh eimau san ciatah i pai khin hi. Ih ut bang ciatin ih painop tei hang’ tucing lianpa i lamlahna leh hong makaih ding pello akisam thukhat zong ahi hi.

(Late 23) ah Topa pen tuucin’ bangin hong cingpa leh ahoih tuucing lianpa pen ih up/ muan nading thu hong hilh ahi hi. Tuu bangin hong cingpa in eite hong kem hong khoi (take care) hi. (1), Eite ih pumpi ading a akisam khempeuh mah hong sih in hong hehpih den hi. (2), lungsim. pumpi. kha Pasian deihna tawh kituak leh bangci bang’ siangthotak ih nuntak theih nading hong hilh hi. (3), Topa in eite thathak hong guan denin, hong hehnem tawntung hi. Ih natnate hong damsak hi. A dimlet valin thupha hongpia hi. Topa in eite hong nusia, hong pampaih ngeilo hi.

Eite Topa in lainatna awnem tawh hong sam leh hong zol in amuan huai mahmah abanzal khut tawh ih khutte kiptak honglen tawntung ahih lam phawh tawntung ih hih manin, bangzatak lungkim/ luntai/ lungnop huai thu hong piangsak ahi hiam? Tua bang hong makaih nate ah, Hehnemsiampa Khasiangtho hang’ tawh ahih zongin, akammal LST tungtawn leh thungetnate hong dawngin, tuate tungtawn pan hong makaih, hongompih lam hong telsak hi. Topa pen eite kisapna pen khat ahi amuan huai ‘makaai tuucing lianpa’ ahih lam phawk ni.

Hih atung a thu teng hang’ Topa tungah ih vai khempeuh kinga in, beltaak ahih nathu sansiam in Late (Psalams Siapa) tawh kibangin, ” Topa pen tuucin’ bangin hong cing hi a, kisapna teng kicing ta hi. Lo nona-ah hong lumsak a, tuidam kiangah hong paipih hi.” Cih thu agen den dingte ih hi uh hi.

Tuuno bang in tuuhonte lak pan paikhia a, haksatna tawh kidim hih leitung nuntakna lampi tungah zuih ding lam theihnawnlo in ih om laitak lam ih khialhlo nading’ ” Tuucinglianpa i abanzaal khut ih khaksuahlo nading leh ama hong et-cih denna mittang kisam mahmah ahi hi. Tua ahih kei leh eite in makaai omlo tuu bangin, lam ih khial ding uh hi.

Eite hong honkhia ding a sihna athuak tuuno in eite khempeuh lam hong hilh ding a sihna in lel a athoto anungta tawntung ” Lam hong pui, ih mai pan hong makaih den “Tuucing lianpa” ahi hi. Happy New Year to you All! Kham Khan Suan (Artist Kyaw Kyaw Oo)