Kumthak ading thalak nading leh phawk dinga ka deih thu pawlkhat

Kum lui sungah bangci nuntak cih thupi mah a, kum thak sungah bangci nuntak ding cih thupi zaw lai hi.

Kum thak in nang hong thaksuaksak lo dinga, nang in kumthak tawh na thakkhawm ding ahi hi.

Kum thak bangzah vei muak kha lai ding cih theilo i hih manin, tu kum a i muak kumthak pen lim takin muaka, Pasian leh ama deihna bangin nungta ding in i khensat kum leh siatna tuamtuamte nialin i nutsiat kum i hihsak ding kisam hi.

A beisa kum sungah bangzah takin lungkham haksatna leh buaina tuamtuamte thuak mah ta lecin, hong tung ding kumthak-ah Topa’ hoihna mu dingin upna tawh na ki-ap ngam ding ahi hi.

Mihoih nuamte in, kum thak pen hoih lohna khempeuh nusia-in, a kithakpat kum hisak a, mi hoih ahi nuamlote in siatna a behlap kum uh(ahih kei leh)hoihna a nutsiat kum uh hi sak zawsop uh hi.

Kum khat sunga i cidamna bekbek zong lei ding hi le’ng lei zawh ding hi hetlo ahih manin, eite hong cingh hong kem den, i biak Pasian’ tungah lungdamkoh taak lua mahmah hi.

Hong tung ding kumthak pen, mite’n thupha ngah kum ding ci-in, thupha dawhdawh ta uh hi. Nang e leh kum thak ading koici bangin thupha na dawh sawm hiam?

Kum hong bei ciangin, i hun nunung ding hong nai semsem ta ahihna phawk a, phamnua tuangtun nading i lunggeel mahmah kul ta ding hi.

Kumte bel Leitung a om lai teng, hong bei zelin hong thak zel lel dinga, eite bel leitung a om lai teng om ding cih hi lo ahih manin, si leng koi teng tung ding cih i kitel sinsen kul ding hi.

Emanuel Pasian nang leh na innkuan tawh hong omkhawm hen la, kha thupha taksa thupha na san kum uh hong hisak ta hen. Amen.

Khazih sungah,
David Tuang