Kumpipa suakzo! Tai guk bekbek! ~ Rev. Zam Khat Kham

Kumpipa suakzo! Tai guk bekbek! ~ Rev. Zam Khat Kham (Matthew 2:1-6)

Christmas kici Lungdambawl hong tung kik ding hi ta hi. Tu laitak i gam sung om zia tawh kizui-in i biakinnte ah Lungdambawl i bawl thei ding hiam cih zong a kitel loh laitakin i Topa’ hong suahna thu khat vei i lungngai kik ding hi.

Christian kici mi tampite in Christmas khawng, i Topa’ hong suahna lungdamna thu khawng a awlmawh loh laitakin leitung in sum leh paii ngaihsutna-in Christmas bawlbawl khin ta hi. Shopping mall khawng, super-market khawngte kizemin Christmas la khawng kihong hiauhiau khin tham ta hi. “Holiday season” khawng peuh ci ziau leuleu uh hi. Bangbang ahi zongin Christmas i cih i Topa, i Honpa, i Kumpipa hong suahna lungdamna tawh i phawkna ahi hi. Christmas thutak taktak bel Laisiangtho sung bek ah kimu hi. Pawlkhat in thutak deih khol lo thei lai hi.

2006 kum hi ngel. Fox news in Evangelist Billy Graham’ tanu Anne Graham Lotz live interview nei uh hi. Pasian’ thu thutak tawh kisai-in dong uh hi. 2001 kum September kha 11 ni-a Muslim Arab mi gilote in New York khuapi-a World Trade Center a kapna uh tawh kisai dong uh hi. Tua ni-in mi 2996 si hi ci-in kiciamteh hi. Tuate’ lakah minam tuamtuam, biakna tuamtuam zong kihel hi. A dong pen in, “Vantung tun nadingin Khazih na san loh phamawh ci na hih manin tua ni-a si Muslim-te, Jew-te hell tung ve maw?” ci lian hi.

Interview tawh kisai a kisinna sangte ah bel tua bang dotna namte pelhin melh ding ci-a kisin ahi hi. Ahih hangin Anne Graham Lotz in pelh lo-in melh lo hi. John 14:6 simin Zeisu bek lampi ahihna gen hi. Vantung tun nadingin Zeisu Khazih up loh phamawh hi ci-in siangtakin gen hi. A dong pen in, “Tua ahih leh vantung tun nadingin bel Zeisu Khazih i san loh phamawh maw?” ci phapah hi. Ama’n bel nui hiuhiau kawmin “Laisiangtho in tua bangin gen” ci ziau hi. A dong pen in a gen ding om nawn lo hi. Nui bek hi. Khazih’ ading teci panna i cih tua bang ding mah hi.

Hih Matthew 2:1-6 ah zong Kumpipa’ suahna thu ahi bangin kigelh hi. Jerusalem khuapi-a Kumpi Herod kiangah nisuahna panin mipilte hong tung uh hi. Hih mipilte aksi lam pilna neite ahi uh hi. Astronomy kici pilna hi a, vantunga aksite’ kiheii dan a ente ahi uh hi. Aksi lam pilna veve astrology kici khat zong hi. Daniel bu sung khawnga aksi lam pilna neite ahi hi. Hih mite in aksite, planet-te’ kiheiina zui-in mailam thu khawng gen uh a, biakna tawh kizom den pian zaw hi. Hih muna mipilte bel “magi” kici hi. Persian kammal hi a, hih mipilte zong tua gam lam pan hih tuak ngel hi.

A suak thak Jew-te’ Kumpipa a piak uh letsong nam thumte’ hangin “mipil thumte” kici dena, thum bel hih tuak lo hi. Tua banga tai 1000 bang a gamla khualgam pan hong pai nadingun mi thum bek hi lo-in mi tampi hih tuak uh hi. Nasem, security cihte kisap tuak hi. Za khat, za nih bang hi kha ding hi, kici hi. Tua thu hang mahin Jerusalem khuazang “so” keii-in patau keii hih tuah hi. “A suak thak Jew-te’ kumpipa koi ah om hiam?” a cih sawnsawn uh ciangin Herod-a kipan a khuazangin patau keii hih tuak hi.

Matthew 2 sunga kigen thutak i gen ding hi. Hih mun ah thutak a zong mi pawlkhat kimu a, tua mahbangin thutak a kihta mi khat zong kimu hi. Tua banah, thutak a awlmawh lo mi pawlkhat zong kimu hi. Hih mipawl thumte i en ding hi.

I. Thutak A Zong Mite

Hih Matthew 2 sungah mipilte’ thu kimu hi. A neu khat ah hong dawk uh a, a neu 12 ah mang kik uh a, dotna tampi hong nusiat uh hi.

1. Kuate hi a, koi pana hong pai uh ahi hiam?
2. Bangzah taktak pha uh hiam?
3. A muh uh aksi bangci bang aksi hi a, Jerusalem a tun dongun bangci bangin tua mite makaih ahi hiam?
4. Zeisu Khazih a suah khit bang tan a sawt ciangin Jerusalem hong tung uh ahi hiam?
5. Bangci bangin tua naungek Jew-te’ kumpi ding ahihna thei uh ahi hiam?

Hih mite’ thu a kigen behna a om loh manin a kiphuak zong tawm lo hi. Mipil thum hi a, a min uh, Gaspar, Melchior, leh Balthasar hi, cih banga kigen zong i za ngei hi. A taktakin li hi uh a, khat pa (a min Artaban) lampi ah mi cimawh khat a huhna-in ziakai-a a lawmte pha zo lo hi, cih dan tangthu bang om laizen hi. Hih Artaban in a lawmte pha nawn lo-in Bethlehem tung ngei lo-in naungek Zeisu mu ngei lo, a khantawnin zongzong hi, cih bangin tangthu om hi.

Hih magi kicite thupisakna zong khang ngei a, Germany gam Cologne khua bangah cathedral kici biakinnpi khat ah hih mipilte’ nusiat van (relics) pawlkhat kikem lai hi, ci-a kigen bang zong ka za ngei hi. Amau pen tu laitaka Iran gam, nidangin Persia a kici gam pan hi a, tua gam ah Islam upna a khan ma pekpek, Zoroastrianism a kici biakna pan hi ngel ding hi, ci-in kingaihsun hi. Biakna, siampi, leh amau’ laisiangtho cihte nei uh hi. Astrology kici aksi en dinga kipantah mi’ zahtak a ngahte uh ahi hi.

A thu tampi i theih beh loh hangin i Topa hong suah ciangin a aksi etna panun “ama’ aksi” mu mawk uh hi. Aksi lamdang khat mu uh hi. Jew-te’ kumpipa suak khin hi, cih thei uh hi. Bangci banga tua banga thei uh hiam cih i thei kei hi. Ahih hang tanglai-in Daniel bang amau’ gam ah kumpi innsung ulianpi khat ahih manin Daniel’ mangmuhnate khawng tungtawn hiam i theih loh, bangbang ahi zongin thei mawk uh hi. A pilna uh tungtawnin Pasian in kisamsa ahih manin na laak hi ngel ding hi. Hong kuankhia uh hi. A suak thak kumpi naungek hong zong uh hi. Thatak hong zong uh hi. “Koi ah suak hiam?” ci mawk uh hi.

II. Thutak A Kihta Mipa

Mipilte Jerusalem hong tunga, “A suak thak Jew-te’ kumpipa koi ah om hiam?” ci-a a dot uh ciangin “Herod leh Jerusalem khuazang patau hi” ci ngiat hi. Herod pen amah leh amah Jew-te’ kumpi a kici hi a, Jew-te in bel tua bangin sang ngei lo uh hi. Bang hang hiam cih leh Herod pen Jew minam hi lo hi. 175-164 BC kum sung Syria a uk Antiochus Epiphanes kici pa in Jew-te nakpi-in bawlsia hi. Apocrypha bu Maccabee Masa leh Nihnate bang ah kician takin kiciamteh hi. Modin khua siampi Mathathias leh a tate makai-in tua Syria pana Greek kumpipa na lehdo uh a, a tawpna ah zo-in biakinnpi na siansuah uh hi.

Tua khit kum 100 huam a suakta bang khata a om uh hangin a tawpna ah a kawlngian tawh Herod in kumpi za ngah a, Rome-te’ hat hun hi khin ta ahih manin Roman Senate in “Jew-te’ kumpi” cih za pia hi. Ahih hangin a lungmuan hun om lo banah a hai in tun thei hi. A sunghnopa, a sunghnu, a zi cih bangte that hi. A zi a thah zawh kum tampi nungta-a lungnop hun nei lo-in zan simin a mang sia den, kici hi. 37-4 BC sung kumpi sem hi. Tua bang kawmkal ah “Jew-te’ kumpi ding naungek khat suak” a kicih ciangin, ama’ innsung ah a tu a ta a suak lah om lo ahih manin patau mahmah hi. Lau hi. Ahi ding mah hi.

Tua thu tawh kizui-in mipilte’ tung panin tua aksi a kilat hun limtak dongin Bethlehem leh a kiima kum nih nuaisiah naupang khempeuh that hi. Laisiangtho in a gensa vive a tangtung ngelhngelh hi lel zaw hi. Herod in thutak kihta hi. Herod in naungek zonga ahih hangin a thah nop manin zong hi. Tuni dongin hih Herod lungsim a nei lai mi tam mahmah hi. Kha thu peuhmah ah thutak zong lo-in kihta uh hi. Pelh uh hi. Melh uh hi. Zeisu Khazih’ min a kilawh cianga hehna thangpaihna-a la mi tawm ding sa maw? Christian gam i sak ngei America gam bekbek ah zong tawm lo ding hi. Herod lungsim mah a nungtata lai ahi hi.

I Christian biakna bang thah theih hi leh a that nuam mi tawm lo ding hi. Christmas cih bang kibawl vet lo-in a min mahmah zong kilo vet kei leh a ut mi tawm lo ding hi. America gama city hall khawngte pan bawngkuang lim khawng, singlamteh khawng a kihepkhiat nadinga ma a pang sitni bang tawm het lo hi. Thukhen zumte ah Thukham Sawm a kisuangte bang a kiphiatkhiat nadinga a hanciam sitni bang tawm het lo hi. News ah kisim kha den hi. Herod in naupang a that kha hiam? That kha lo hi. Lau nading bel om kei.

III. Thutak A Awlmawh Lo Mi Pawlkhat

Herod in naupang a thah theih ma-in kimaitaiisak pong kha ding hi. Mipilte in tua naungek a muh zawh nadingun a huh nuam bangin gamta-in kampau hi. A khua sunga Laisiangtho theite dong hi. Siampite leh laitheite, thukham hilh siate dong hi. Naungek koi ah suak hiam? A theih nop tua hi.

Laisiangtho theite hong kikaikhawm uh hi. A inn dimin ding pelpal kha ding uh hi. A mitkha ah ka bawl ciangin Laisiangtho uma a hilh ciatciat ka sangkahna Concordia Seminary khawng, Southern Baptists sangte, Wheaton, Trinity, Moody, Dallas, Westminster, Talbot cihte banah Harvard, Yale, Oxford, Cambridge University-te pana mipi khempeuh a kikaikhawm dingin ka seh hi.

Scholar-teng, proessor-teng, thu kidong. Dawng thei pah uh hi. “Na khawl pak o, ka siapa hong dong ning” a ci om tuak lo uh hi. “Ka laibute hong en phot ning” a ci om tuak lo uh hi. Naungek a suah nading mun thei lua uh hi. Dawng lian uh hi. “Bethlehem ah suakin cei” ci lian uh hi. Kamsangpa in gen khin hi ci-in tua hun ma kum 700 lai, Isaiah-te tawh a khang khawm Micah sung pan dawng lian uh hi. Tu huna i Laisiangthote ah Micah 5:2 hi.

Tua banga a dawng thei lian siampite leh laitheite Bethlehem ah nau-en dingin a pai uh hiam? Pai peuhmah lo uh hi. Jerusalem leh Bethlehem bangtan kigala hiam ci-a ka kan ciangin tai nga val, tai guk dektak bek kigamla hi. Tai guk pha lo hi. Ahih hangin Jew-te’ kumpipa a suahna mun ding a thei satsat tua siampite leh thukham hilh siate khat beek mahmah zong Bethlehem ah nau-en dingin pai peuhmah lo uh hi. Pai taktak lehang nai nih sungin kitung ding hi. Tedim pan Lamzang, Saizang cih bangte i pai bangin a suklama kisukpai hiathiat ding hi lai hi. Kuamah in nau-en dingin ka pai ding a ci om lo uh hi. Tai guk bekbek hi ve’n.

La khawng sa auau-in Lungdambawl i dawn thei hi. Hih thu ngaihsun pha dih ni. Tua Laisiangtho thei mahmah mite in i Topa’ suah nading mun thei mahmah napi tai guk bekbek a gamla Bethlehem ah a pai loh bangun tu hunin zong mi tampite in Lungdambawl khawng i bawlbawl hangin i Honpa a nei taktak lo tampi ki-om mawk hi. Tu mahmaha san suk ziau ding hi napi-in ki-awlmawh lo thei mawk hi. Tai guk bekbek gamla napi-a pai lo siampi leh laitheite bangin awlmawh lo uh hi.

“Hong pai un, thu-umteng”… Tai guk bekbek!
“Bethlehem khuaneu mite aw”… Tai guk bekbek!
“Leitung lungdam, Topa hong pai”… Tai guk bekbek!
“Zankim gamdaih kim laitakin” … Tai guk bekbek!

“Ngai un vantungmi’n lasa”… Tai guk bekbek! Kinai mahmah, ahih hang pai lo uh. A theihna buk un bangmah phattuamna pia lo. Mipilte in bangmapi thei lo, naungek a muh dongun zong uh. Siampite leh laitheite in tampi thei, tua tai guk bek a gamla mun pai lo uh.

Hih mi thumte’ lakah kua pahtakhuai pen hiam? Kua in Jew-te’ kumpipa mu-in bia ahi hiam? Herod bel genna vet om lo; kumpi thak khat suak cih thu a kigen ciangin lau hi. Thah ding bek tum hi. Tua siampite leh laitheite e leh? A suah nading mun bang thei satsat uh hi. Nau et sawm peuhmah lo uh hi. Tua mipilte in aksi a muhna uh thu hang bek tawh tai tampi a gamlatna mun panin nau-en dingin hong pau vingveng uh hi. Thutak a kihta kua? Thutak a awlmawh lo kua? Thutak a zong kua? Tuni-in eite’ dinmun koi ah om? Hih thumte’ lakah kua pen tawh i dinmun kibang ahi hiam?

Pastor Jess Moody (1925-2018) a kici Pasian in a zat mahmah pastor khat om ngei hi. America gam Palm Beach ah pastor semin Palm Beach Atlantic University zong phuankhia hi. Hih siapa in a gen ngei thu khat genin i thugenna i khum ding hi. Pastor Moody in Bible study a neihna khat ah numei khat tawh kituak kha hi. American president a sawm thum leh ngana pa John F. Kennedy’ (1917-1963) nu Mrs. Rose Kennedy’ (1890-1995) thu ahi hi. Amah bel khansau mahmahin kum 105 a nungta khat ahi hi. Bible study ah siapa in a lungtangte uh naungek Zeisu a kisialna gan ankuang a suahsak nadingun hanthawn hi. Hun man ciangin Mrs. Kennedy siapa’ kiang hong pai khiankhianin “Siapa aw, ke’n ka lungtang naungek Zeisu a kisial nading gan ankuangin na bawl khin mah ing” ci-in gen khiankhian hi. Ama’ thu teci na pang hi.

Hih nu pen a suah tunga kipan mihau innsung leh politics ah thunei zo mahmahte’ innsung ah khangin mothak ahih manin sum bekbek thupi a sa khat ahi hi. Tanu khat a neih ciangin natna khat tawh suakin a khantawna zato khawnga kikem ding khat ahih lam a theih ciangin heh mahmah hi. Pasian’ kiangah, “Topa aw, bang hanga hih banga hong bawl mawk na hi hiam?” ci-in Pasian bang tawng ngiatin to ngiat hi.

Nisimin hehna, thangpaihna vive tawh nungta hi. Nitak khat bang, party khat ah a pai dinga kithawisa, mi khatpeuh in a tanu bangci ta hiam ci-a a dot ding thuak ngap lo-in a nupa-un khawl kik uh hi. Phunphun mai hi. A inn vua nasem, a piangthak lua mahmha a nasemnu in, “Mrs. Kennedy aw, hong kuppih vial bel ci het kei inla, na hi ci om suak leh hoih lo ding hi. Zato tung thei ni teh. Na lungtang naungek Zeisu kisialna gan ankuang suaksak in” ci-in kuppih hi. Heh lua mahmahin tua mun mah ah tua nu a nasep tawpsakin ciahsak lian hi.

Tua zan ihmu thei mahmah lo-in thu tampi ngaihsun hi. A tawpna ah a na semnnu’ gen phawkin tua bangin Pasian’ tungah ki-apa, “Topa aw, ka lungtang hong luah in. Naungek Zeisu a kisialna gan ankuang hong hisak in. Kong ki-ap hi” ci-in a lungsim khempeuh tawh Topa samin ki-ap hi. Thakhat thu-in a vangik khempeuh tolhkhia-in a vanzang liana a lungdam lua hi. Zingsang ciangin nasep a khawlsak a nasemnu sam kik lianin a sih dong kum tampi kithuah uh hi. Siapa’ kiangah hih thute genin teci pang khiankhian hi.

Tuni-in eite’ lakah tua thungetna a ngen dinga kisam tampi i om kha ding hi. Zeisu Khazih in i lungtang hong luah matengin lungnopna kicing taktak i ngah ngei kei ding hi. Zeisu’ thu i thei mah hi. Ahih hangin i Honpa-in sangin i kipum-ap ngei kei hi. Commitment peuhmah i nei ngei kei hi. Tuni-in i lungtangte hongin i Topa i sap ding kisam hi.

Amah a zongte in mu hi. Kumpipa suak khin zo! Jerusalem pan Bethlehem tai guk bekbek hi. Thutak kihta ding maw? Thutak awlmawh lo-in melh ding maw? Ahih kei leh mipilte bangin thutak zong ding maw? (Sunday, December 17, 2023 ni Myothit EBC biakinn-a ka sermon hi) Rev. Zam Khat Kham