Kumpi, innpi leh party makaite kimuhna nei

Kumpi, innpi leh party makaite kimuhna nei

November 26 niin Yangon kumpi zum sung ah Kawlgam kumpi leh Party 67 makaite kimuhna om hi. Kawlgam ah Party 76 lak ah tutungin party 67 makaite kihel thei hi ci-in U Ye Htut (Kawl kumpi speaker) in MRTV ah gen hi. Hih kimuhna ah minamte kilemna laibawl ding vai, 2008 Danbupi puah ding vai leh Kawlgam ulian 6 – President U Thein Sein, Mipi Innpi Ukipi U Shwe Mann, Minam Innpi Ukpi U Khing Aung Myint, NLD makai Daw Aung San Suu Kyi, Tualsuak minam party makai pan Dr. Aye Mg (Rakhine) leh Galkap mangpi Sr.Gen. Min Aung Hlaing kimuhna ding vai kikupna om hi ciin RFA ah kisuah hi.

U Thein Sein in athugenna ah Democracy tawh kituak ki-ukna apianna dingin kivaihawm hi. Federal Union gam hihna dingin gam kitapsakna ding thute simloh thautawite tawh kilemna dingin thukimna kinei khin hi. Student Union apianzawhna dingin Sangnaupangte leh University/College Sangsiate kigawm kipawlna kinei ding hi ci-in kumpi leh party 67 kimuhna ah gen hi ci-in DVB TV in gen hi. Hih kimuhna ah apai party makai 126 pha a, party 67 panin party 41 in thugenna nei hi. ZCD panin Pa Zam Za Mung kahin CPP President Pu No Than Kap leh CNDP President Pu Zo Zam in thugenna nei hi. October 21 ni-in Nipidaw President Innpi ah National Political Allince (NPA) pawl 5 – USDP, NUP, UNA, NBF, NLD, FDA leh President U Thein Sein, Vice President Dr. Sai Mauk Kham leh U Nyan Tun, Kawlgam Innpi ukpi U Shwe Mann, Minam Innpi ukpi U Khin Aung Myint, Galkap mangpi Sr. Gen Min Aung Hlaing, Election Commission Chairman U Tin Aye, Galkap mangpihuh Dy.Sr.Gen.Soe Win tawh mi 14 kimuhna nei ngei khin uhi. Tu-in makai 6 kimuhna panin Kawlgam aa ding thuhoih hong geelkhia dingin ki-um hi. U Thein Sein kumpi asep kum 3 sungin Daw Aung San Suh Kyi tawh 2 vei akimuhna hi-a, Galkap mangpi Sr. Gen. Min Aung Hlaing tawh khatvei kimuhna hipan hi. Daw Aung San Suh Kyi in kimuh ding angetnget hangin kum 3 sungin tu-a angah hipan hi.

Hih kimuhna zong kumpi leh party 3vei akimuhna ahih hangin geelkholh zaksaksa hilo-a, Galkapte in Kachin KIA/KIO phualpi ah Galkapbu asinte thaupi tawh kapin 23 si-a, 20 liamin asite zong Kachin kihello, ABSDF, TNLA, CNF leh AA pan vive hi-in sangnaupang galkap ABSDF leh Shan, Chin, Arakan minam thautawite kihel ahih manin gamsung buai ding launa hang hithei ding hi ci-in agen om hi. November 19 ni-in KIA phualpi Laiza – Kachin ah Galkapbu asinte 105mm thaupi tawh Kawl galkapte in gal kido lak hilo-in agal pan akap uh hi-a, thuman hetlo hi aci zong om a, Yangon Kachin Baptist Church ah asite aa ding thungetna om hi. November 25 ni-in Yangon Kamayut U Tun Lin HuanLampi – COMREG zum ah hithu tawh kisai Press conference om a, CNF AGS -2 Dr. Shwe Khar in kilemna ding deihna tawh bangmah paulo-in asuplawh hi hang. Kilemna bawl mengmeng ni ci-in pulak hi. KIA galkap mangpi Maj.Gen.Gum Maw in hih thu hangin kilemna tawh kisai haksa ding a, Kawl kumpi tung ah muanna kiam hi ci-in gen a, NCCT makai Naing Hanta in hithu hangin kumpi leh thautawite kimuhna leh kilemna vai thugenna hun kisotto hi ci-in pulak hi. VOA leh Galkapmangpi Sr. Gen. Min Aung Hlaing kimuhna thudotna ah Thukhun 436 puahnopna mi million 5 tawh kisai akidot ciangin Kawlgam mipi seh10 suah seh1 bek hi-in atamzawte deihna hilo hi ci-in dawnga, Daw Aung San Suh Kyi in mipi deihna hilo hi na cih leh Kawlgambup ah mipi deihna deihlohna phalna tawh hong lasak un ci-in dawng a, NLD makai U Thein Swe in 2008 Danbupi deih 92.0% val pha hi cihna min sungah 2008 Nargis sung asite min kihel hi – koici banghiam ci-in thukkik hi. Makai 6 kimuh ding tawh kisaiin U Ye Htut in Gambup innpi leh Daw Aung San Suh Kyi deihna tawh kimuh ding hithei nailo hi. Kumpi deihnai n khuam 4 – Kumpi, Innpi, Upadi leh Media ban ah CSO kipawlna kibulphuh a, Gambup innpi leh Daw Suh Kyi in mimal bulphuh lua hi ci-in gen hi. Galkap palai 70 leh Daw Suh Kyi in kimu ding acih zong hun kibicih lua ahih manin hitheilo ding hi ci-in zasak hi. Daw Suh Kyi pen minam palaite tawh kimuhna nei khin hi ciin DVB leh Voice ah kisuah hi. qMRTV, MAL

Zomi Times