Kum Za Khat Laisim Minam ~ Hau Za Cin

Kum Za Khat Laisim Minam ~ Hau Za Cin

Pil mahmah ta leh kilawm hi. Mihing khat in kum za khat sung laisim tazen leh theihna zai mahmah ta ding hi. Pilna tampi mu ding, theihna tampi khang ding, gamtat luhekzia ding thei mahmah ta ding hi. A kilawm a kituak in gamta siam ding hi. A hoih a hoihlo khentel thei ding hi. A sia a pha thei dinga, a pil leh a hoihzaw teel in a kiim a kianga omte a puah ding hi. A kisam mite huh dinga, a zawngkhal mite lamsang ding hi. A pilzaw a om leh etteh dinga, amau a bat theihna dingin hanciam ding hi. Thudik thuman thei ding ahih manin a pil leh thudik thuman tawh gamta nuam dinga, tua mah midang kiangah pulak nuam ding hi. Picing mahmah tading ahih manin pai a kisin tung naupang a khut pan len in makaih dinga, ‘ka nung hong zui in’ ci in paisan ziaulo ding hi.

Minam hileh e?

Minam khat in kum 100 laisim leh ama minam hihna leh ama hihna kitel mahmah ta ding hi. A minam bulpi leh a khankhiatna, a kipatna, a khantohzia leh a maban bek hilo in a tulaitak dinmun mahmah tel mahmah ding hi. Khan khat pen kum 20 ahih leh khan 5 bang kisuangsawn khin ding ahih manin tua khang 5 kisuangsawn te in a omsa, a kipsa ngeina leh minam hihnate limtak in kemcing, zuun, puah ding hi. Tawmkhat ensuk leng.

1. Amah leh amah kitel ding hi: Minam khat in lai kum za khat sim tazen leh adang genloh ama hihna kitel ding hi. Amah kua hi a, amah koi pan kipan hi a, amah kua te tawh kizom hiam cih thei ding hi. Sangkah naupangte in leitunga degree sangpen a ngahna dingin kum 5 sung limtak a ama thukan nop lam a sin dikdek khit ciangin ‘theita’ ciin kipia a, thuthei, thukansiam, thugil suut siam ciin laipi kipia hi. Kum 100 thusin in thukan ta peuh leh bang degree a kipia tam maw! A degree sangin ama theihna a khan ding zia kingaihsut pih thei hi.

Minam khat in kum 100 sung laibu tuamtuam a simna pan, a thuzakna tuamtuam pan ama hihna bang hiam cih a kitheih kei leh tua minam khantohna ziakai mahmah cihna hi a, a mailam ding sau mahmah lai kha ding hi. Midang delh a sawm a, a khangto masa minamte a phaksawm leh a ki etphat mahmah kisam ding cihna hi. Amah leh amah a kitheilo mi pen tulai ciang company nasem dingin zong kideihlo a, gamsung makai ding, thu leh la vaihawm ding diakdiak in mipi in deih vetlo hi. Minam khat in hattakin mainawt a sawm leh amah kua hiam cih a kitel masak kul hi.

2. A thahatna a thanemna kitel ding hi: Kum za khat sung nang leh nang kisit lecin, nang leh nang kua ka hiam ciin ki kan lecin kitel mahmah dingin kong um hi. Kum 100 ci kei ni, kum 10 sung ki examine leng zong kitel lel kha ding hi. Kum 100 a pha khat pen ama thahatna, a thanemna a kitheih ding kilawm hi. Minam khat in a thanemna, a thahatna a theih kei leh koi pan bangci maban zom ding cih theilo ding hi. A tunna ciang theilo ahih manin a kipatna mun ding theilo ding cihna hi. A thanemna a pulak theite kiangah a pai kisam ding hi. A thahatna a pakta theite tawh a sepkhop kul hi. Khantohna a deih leh a thanemna kipuahpha a, a thahatna te ah mite a makaih ding kisam hi.

3. Sia leh pha theitel mahmah ding hi: Kum za khat sung laisim minam in sia leh pha thei tel mahmah dinga, a zuihnop leh zuihnoploh thu bek hiding hi. Hihte hoih, hihte hoihlo, cih thei ta ding ahih manin a khantoh nop leh ama thu, a hoihlo a zuihnop leh ama thu hita dinghi. Minam dangin tuaci un, tua ci kei un a cih ciang a dik hi, a diklo hi cih khentel thei ta ding hi. Mi cih khat peuh, mi gen khempeuh um pahpah nawnlo dinga, a theih thu khat zong ‘mittaw sial khau let’ nawnlo ding hi. A kisam bangin khentat thei ding hi.

4. Lungduai in migi mahmah ding hi: Kum za khat laisim minam pen a hoih ahoihlo theilua mahmah tading ahih manin mite kona, mite gensiatna neucik cik tawh heh, lungpho, kitom cih bang om nawnlo in lungduai in migi mahmah ta ding hi. Mihaite bek heh pahpah a, mipilte lungduai in migi hi. Kum 100 laisim minam a kigensiat sim in heh phangphang den cih om nawnlo ding hi. A hoihlohna a kigen leh ‘hi maw’ ciin ki enkik thei dinga, a kul a kisam bangin kiseek thei ding hi. A hoihna a kiphat leh zong lungdamlua in laam pahpah tuanlo ding hi. Picing ta ding cihna hi.

5. Kisapna mu thei ta ding hi: Kum za khat laisim minam in a ma minam sungah a kisam a omte mu thei ta ding hi. Nekzonna ah bangteng kisam, khuasung ah bangteng kisam, mimal lungsim sungah bangteng kisam cih mu thei ta ding hi. A kisam a om leh a sem thei ding kuate, bangci sep ding, bangci ma pat ding cih zong thei mahmah ding hi. Tua teng a theih kei leh minam khangto hinailo dinga, ekteh banga tu cip minam hi kha ding hi. A tutna mun pan hong huh un ci a awngawng minam hilel ding hi.

6. Mi tawh kikhawl thei ding hi: Kum za khat laisim minam in picing ta ding ahih manin a lian a neu tawh kikhawl thei ding hi. A pil a hai tawh kikhawl thei dinga, a hau a zawng tawh kilawmta thei ding hi. Deidanna om nawnlo dinga, picing takin gamta ta ding hi. Mi khat khangto ding hileh thapia thei dinga, mi khat laptoh kisam leh lamto thei ding cihna hi. Hazatna lungsim neu ciikciik te om nawnlo ding cihna hi. Amah sanga hanciam zaw pa a kahtoh leh haza nawnlo dinga, amah zaha hanciam zolo leh amah pha zolo te sikcip in simmawh bawl sese nawnlo ding hi. Gospel kammal zang ding hileng mi khempeuh Jesu Christ itna mit tawh en dinga, mai-et pawl nei in, nawlkhin pawl nei cih bang hi nawnlo ding hi. Mi khempeuh a kibangin – amau hihna bang ciat in mu thei tading hi.

7. Midang ngaihsutna zong sang thei ding hi: Kum za khat laisim minam in midangte ngaihsutna zong sang thei ding hi. Ama ngaihsutna hi ciin pom siam ding hi. Midang ngaihsutna peuhmah kisang theilo cih lungsim kawciik, rigid nei nawnlo ding hi. A hoihzaw ngaihsutna ahih leh haza in suhsak cih bang hilo in lungdampih in pomsiam dinga, a hoihlo zaw ngaihsutna ahih leh engko in nuihsan in simmawh bawl cih bang hilo ding hi. Khantohna khempeuh zong ama minam adingin a hoih khin hiam cih limtak kantel siam ding hi.

8. Gensiatna zong thuaksiam ding hi: A gah singkung peuhmah suang tawh kideng hi. Kum za khat laisim minam in a gahpha singkung bang ahih leh mite in gensia in haza ding hi. Tua hazatna leh gensiatna a pomsiam ding hi. Picing taka lungduai a kiniamkhiat in a telsiam ding kisam hi. Gensiatna, kona leh simmawhna te gul gu nei banga a tu kik minam in minam picing hingeilo dinghi. A lawhcing minam, a khangto minam ahih manin singkung gahpha bang hiding cih a theih ding ahi hi. Mite gensiatna leh minsiatsakna te khempeuh haksa mahmah taleh a thuak keikaai zawh ding kisam hi.

9. Etteh pha suak ding hi: Kum za khat laisim minam in a laisimna pan a ngah pilna, theihna, gamtat hoih, nuntak hoih a theih khempeuh tawh kituak in nungta in mite adingin limpha, etteh pha a suak ding ahi hi. A theihna, a siamna te mite adingin a kicingin a zatkhiat ding ahi hi. Mite in amah a zahtak theihna dingin amah in limpha ahih ding ahi hi. Amah a thei ngeilo te nangawn in ama gamtatna pan a sin theih ding limpha a suah ding ahi hi. Limpha a suah kei leh a luangkhialo cik tui bangin a ciimna kua mah in dawnlo in a om cip ding ahi hi. Mite adingin thupha a suak ding kisam hi.

10. A kipuah den ding kisam hi: Kuamah a hoih kim, a perfect cih om ngeil ahih manin a hoihsem na dingin a kipuah den kisam ahi hi. A hoih zawhlohna a om leh a kisin kik a, a kipuah kisam hi. Minam dangte zong khangto manlang mahmah ahih manin amau tawh kiton thei dingin a kipuah den kisam hi. Siangthona ah, lawm leh gual kikholhna ah, nungak tangval kikholhna ah, nu leh pa kep dan ah, tate pattah dan ah, inn sung kikep dan ah, khuasung kikep dan ah, gamsung leh minam sung kikep dan ah…. a theizaw te gen sangsiam a, a theilo te pattah siam ding leh a kisam khat peuh a om ciang semkhawm liailiai thei dingin a kisin kul hi.

A semkhawm theilo minam in a khangto a bat hangin a sungheng singkungpha tawh kibang a, huihpi nawk leh kipuk lel ding hi. Minam sungah khantohna a kikim kei a leh a khangtozaw te zong a khangto lo te in kalsuan mah tawh a kiton veve kul ahih manin khantohna manlang tuanlo ding hi. Minam khat khantohna pen a sangtungpen te tunna hilo a, a niam pen tunna ciang pan kiteh hi. Minam khangto a utte in a niampen leh a sangpen kikal a kigamla lua ding a khual mahmah kul hi.

Thukhupna: Gen ding tampi om inteh, i gennop pipen thu thum hi. Kum za khat laisim minam in amah kua hi a, amah bang dinmun ah om a, ama maban bang hi hiam cih a kitel mahmah ding ahi hi. Hau Za Cin