Kum tulnih sung Khazih pawlpi etkikna ~ Pau Do Lian

Kum tulnih sung Khazih pawlpi etkikna ~ Pau Do Lian

“Simon Peter in, Nangpen anungta Pasian Tapa Khrih na hi hi ci in adawng hi” Mathai 16:16 18Tua ciangin Zeisu in nangpen suangneu acih nopna Peter na hi a, “hih suangpi tungah ka pawlpi ka lam ding a, sihna nangawn in zo zo ngeilo ding hi” Matthai 16: 16 & 18.

Zeisu in, “Kei kua kahi hiam” ci-in minam, Farisete leh anungzuite donghi. Farisete in Tuiphumpa Zawhang, Elijah, Jeremiah, kamsang khatpeuhpeuh nahi hi’ ci-in dawnga anungzui te lamah kihei-in note in keikuahi nahong ci uh hiam? acih ciangin Peterbek in, “Nangpen anungta Pasian Tapa Khrih na hi hi ci in adawng hi.” Acih khitciangin Zeisu nang (suangneu) tungah kapawlpi kalamding cihi.

Khazih pawlpi in aphutkhak nalianpi nam 5 te

• 1. Nungzui sawltakte hun (Apostolic fathers)
• 2. Leitung Ukte thuneihna (Emperors’ power)
• 3. Upna kilaih hun (Reformation)
• 4. Theihna thakleh muhnathakte (Enlightenment & modernism)
• 5. Tulaihun leh gamtatzia (post-modernism)

Khazih pawlpi hongpian khiatma Abraham, Isaac, leh Jacob tehun akipan Israelte in tuniciang dong galdo haksatna kumsim in phukha denhi. Zeisu hunsunginzong amah alangpan’ Farise akipan apaipai na-ah phukha hi. Khatveivei ciangin amuanpen’ anungzuite inzong panpihngam lo uhhi. Zeisu leitungah avaklai mahmah inzong apanpihding mitawm mahmah ahihman in asih khittak ciangin Zeisupen Khazih hi’ Pasian Tapa hi’ aci ngam mitawm semsem hi.

Nungzui sawltakte hun (Apostolic fathers) AD90s-150s

Zeisu Leitungah avaklai in Kei Pasian Tapa kahi hi ci-a atangko nahangin akithatlum hi-a, ama nungzui, John, Peter, etc te-in Zeisu Leitungah aom nawnlohciangin Zeisupen Pasian Tapa hi’ ci in tangko uh-a, Zeisu omnawnlo ahihman in amau lungtungah thuak uhhi. Paul bang hunkhat lai-in Zeisu langpang hinapi in Zeisu ii teci hongsuahciangin annelo tuidawnlo in nithumsung bang Tuipitungah Tembaw sia-in awkcip na’ Rom galkapte in sikkhau tawhsatna, suangtawh denna, leh Rom aa thonginn ah kigawl atdong Zeisu in Topa hi ci in teci panghi.

Ignatius bang Rom milim biadingin kisawla’ keibiak anungta Zeisu hi’ ci-a anial manin Sahangkhawina inn ah kikhiasuk in Sahangin netumhi. Polycarp zong Rom milim mai-ah kundingin Ukpi te’n asawl hang utlo in nial ahihman in Zeisu nungzuihna hangin sihnathuak dingteelzaw a temtawh kisatnim in meitawh singkhuam tungah kihaltum hi.

Clement zong alokuan na-ah thungenden a Rom kumpi in atheihciangin khaktansawm mahleh khukdin sa-in nithumsung antangin thungen a mualtung’ tui-omloh namunpi ah tuisamphul in mi tulnihte in dawnkha uh a pianthak lawh uhhi. Zeisu nusia nuamlo in kumpite thunial ahihman in Tuipigei a Tembaw khihna khau (anchor) tawh agawlkhih uh a, tembaw paisak in apumpi kibalnen hi. Tua laimuntak ah kum sim in tuihual in piaunel tai2 bang susiaden kici hi.

Tuabangin Zeisu mitmahmah tawhmu upnatawh alenkip ngam nungzui/sawltak mitamlo te hangin Zeisu thu mangthanglo ahihman in hih laimun ah ihgenzawhloh Zeisu mintawh gawtna thuak tampite hangin anungta Pasian thu upna kizomto theiden hi. Atomin’ Sawltak tehun lai-in Tothum (trinity) tawh kibuai a, Zeisu in, “I and my Father are One” keileh ka Pa khat kahi uh hi (John 10:30) Pilate in nang Jewish te Kumpi nahiam acihleh Zeisu in nathu gen aman hi’ (Luke 23:3) etc…

Tua ahih man in hih thubulpi (doctrine of trinity) pen thupilo khawng ihsak khak leh anak thupi mahmah ih Gukkhiatna ngah natawh kisai leh tuhun (upna peeng upna khauh)cite tawh kizomto ditdet hi. Tothumgawm (Trinity) Laisiangtho sungah tua kammal a omloh hangin (mission) cih kammal zong kizang/omlo a ahizongin tuma kum100 lai in Emil Brunner in, “the Church exists by mission just as fire exists by burning” Pawlpi pen mission hanga nungta, apiangkhia hi. Zeisu pen Pasian ahihman in milim tungtawn in Pasian hong kilangh lo ahihteh ci-a asihdong anialte hunsung cileng kikhial loding hi.

Leitung Ukpite thuneihna

Zeisu Pasian Tapa hilo hi’ cihna in thu tampitak sukha hi. Pasian khatbek [monotheism] acite in Zeisu Pasian tawh kikimlo hi’ cih upna tawh nakpitakin kibuai a AD325 in Nicaea ah, AD 431 in Ephesus khua leh AD451 in Chalcedon te ah Tothum gawm Pasian (Trinity) kikup nalianpi nei-uh a, Christiante’ biak Pasian pen Tothum (Trinity) hi’ ci in Laisiangtho bu66 bul phuh natawh kipsak zo uhhi. Tuabangin Zeisu in Pasian Tapa hi-a mihing hihna (human nature) leh Pasian hihna (divine nature) 100% neihi cih Laisiangtho in teltak agenbangin kikipsak mah leh tuatungtawn mahin haksatna lianpi in nawkkha veve hi.

Constantine in Maxentius azawh khit akipan in Christian upna in munhong ngah a (a tom gen nicileng) ahoihlo lam (leitung thuneihna) tawh zangkha uh ahihman in, Christian sungbekbek ah kitawknawi nalian pi pianga Leitung thuneite thubek zuihding leh amau milim (statue) mai-ah kun a biakding thu akipiak ciangin Zeisu bek ci a alenkip te’ abanban in kithat ziahziah hi. Topa Zeisu in Peter kiangah nangtungah “Kapawlpi kalam ding hi” acih mahbangin Khazih pawlpi mangzo tuanlo in athah zawhloh uh mitamlo te’ hangin upna man (Laisiangtho tawh kituak) kilawh to veve hi.

Upna kilaih hun (AD1550s)

Tuabangin Leitung Ukpite in Khasung thuneih natawh honglet khawptak ciangun apiang thaklo mi’ galkap ukna nuai-ah mikhempeuh Pasian hehpihna in banzo napi in thunei tuam hong omtakciangin “Upna kilaih hun” hongtunga tuapan in tu-a ih Laisiangtho zatte Leitung mikhempeuh (Israel cih omtuanlo Gentile micih kideidanlo) in simtheih dingin honglet khia uh a, William Tyndale zong Manglai tawh let ahihman in kithatpah hi. Pasian khatbia leh Zeisu zong pomna pi-in Leitung duh hopna leh vangneih nopna hangin Satan in munhong latheipah a mihingte’ kikhen naleh kihuatna te hongkhangsak hi.

Hihhun (AD400-AD1550) sungteng inzong Zeisu Leitungah avaklai mahbangin Zeisu Pasian Tapa bek um a, Leitung thuneite abia nuamlo te sihdan’ kipia ngekngek in Sawltak tebang mahin Zeisu telzaw dingmaw sihding telzawding cih athuakte in aup na-uh khauhtak nalen uh ahihman in upna Laisiangtho tawh kituak upna aneithei ihihi. Hihbang hunhaksa sung ah mihing leh mihing kikalbek hilo in gamsate leh misane (cannibal) tezong alauhuai mahmah hunsung ahihi.

Theihnathak leh muhnathak (Enlgihtenment)

Hihhun hongpian khiatna bulpite’ idea pen Rene Descarte (1596-1650) ii ngaihtsutna (philosophy) in Mikang gamleh leitung bup hongzel tahi. Descarte ii gendeuh pen, “human beings were part of machine” “Mihingte pen set bang ahihi” acihnop pen mihingte in machine (set) bangin nasemthei ta hi. William Barrett in tuabang ahihleh “Can machine think” mihing te lungsim setbang ahihleh setin thu angaihsun thei tam? Cihtawh dawng kikhi. Tuaciangin hih theihna leh muhnathak te hunsungin Julian Huxley in mihingte pen ganhing bang hi, “We are unique animals” cihi.

Descarte in mihing te khuakngaihsutna in seplah neilo hi, Pasian kisamlo in nakisem theilel cihi. Hih ngaihsutna in Western gamkhempeuh ah mihing hihtheihna’ Pasian sangin hongthupi zawktak ciangin Pasiankiangah thungetngetsangin, Laisiangtho sima thalaklak sangin leh mitungah gualtungtuan ding nuamsa zaw uh ahihman un, mikang gamleh (tun leitungbup) hun tomno sungin zelpah hi.

Hih Enlightenment hunpen kammal nga (5) tawh kigen theihi. 1) reason- banghang a lawhcing/lo, nakhat peuhpeuh ahangzonkhiatna, 2) nature – angeina, apiang ngeina te leitung pianzia leh a ma, omziatawh kituak akan’ sin. 3) happiness- lungkim na, mihing bawltawm theih lungkim/dam na gtn: nakhatpeuhpeuh abaihlam leh anuampen aa bawl/zang ding. 4) progress-khangto, kizomto, cihnopna ah nakhat peuhpeuh mainawt den hi. Gentehna nungkum in compter window10 ihzat leh tukum in window11 hiding. 5) liberty- suakta ngiatding. Khatleh khat ki-uk, kigakciplo ding.

Khatleh khat tungah kinga loding eileh ei septawh neding dawnding. Kammal dangin genni cileng nakhempeuh mihingpan kipan hi. Lasiangtho inlem nakhempeuh Pasian tawh kipansak hi. Mihing khantohna pen mihing lungsim (human mind) tawh kipan sakha uhhi. Hih mihing lungsim ngaihsutna (human mind) kilaihna philosophy Descarte in a develop ahih hangin a philosophy bulpipen French philosopher, Voltaire (1694-1778) father of Enlightenment kicipa in apatkhiat ahihi.

Tulai hunleh gamtatzia (modernism & post-modernism)

Modern science (tulai pilna) kipatkhiatna bulpi pen Oxford a mipilte in Thomas Aquinas thuhilh alehdo na pan kipanhi. Aquinas in Aristotle idea, ‘natural phenomena’ adawnkikna hangahihi. Atunga Descarte philosophy in mihing lungsim (human mind) in nakhempeuh semthei cihtawh kizom in hih modernism zong kammal dangin cileng hih leitung pen, “the world is created by a reasonable God” apianna akikan thei Pasian in bawlhi cihi. Ahizongin mipil Francis Bacon in bel leitung tangthu ah Laisiangtho lotawh ki prove(teci) theilo ding.

Modernism pankhia te lak ah Isaac Newton zong helloh phamawh hi. Kum20 kiim in Cambriage University ah professor sem a’ amuhkhiatna khat, “The universal must be calculable” hih leitung khuasak napen kiteh/tuakthei dinghi tuapen aman ‘gravity’ ci-in mivawh aa mithang vangvanghi. Ahizongin in American Christian philosopher, Francis A. Schaeffer in Newton leh alawmte in amau theihna science te Laisiangtho ah abulhphut kei uh leh bulneilo pisuak cihi. Hih mipil masate Pasian langpang vive hisam lo in Laisiangtho alen tinten zong pawlkhat omhi.

Michael Faraday (1791-1867) in electric current (meitha hatna) mukhia pa hi a, Laisiangtho in acihleh upding hi-a acihkei leh uploh ding acingam hazel hi. Hih bang mipilte lak ah linekhat bek hilo in ahuamkim a azangthei Albert Einstein bang kizah takdeuh hi. Amah aminthan napen, ‘theory of relativity’ (nakhat leh khat kizopna omhi) hi-a laws of physics tetawh mithang hi. Francis A. Schaeffer in bel hih philosopher te’ thu ihsin ciang amau muhna’te bek thei hilo in Pasian a omlam azongzong ihihi cihi.

Kumkhat in leitung mihing 82 million khangden a tukum 2019 in 7.7 billion ahihi. Mipilte tuatna ah ihtenna leitang/tung resource pen mihing 10 billion bek kicingding cihi. Cihnopna ah mitam semsem in nate kicing zolo semsem cihna ahihi. Postmodernism hunciang leuleu in modernism tunga kilam theihna muhna ahih mahbangin mihing bawltawm theih nate tawh lungnopna, lungkimna, leh kisapkhempeuh kicingsakding cih ngaihsutna ahihi. Mimal lungnop na, innkuan leh society (itenna khua) sungah nakhempeuh haksa semsem ahihman in lungno naleh khamuan natawmsemsem hi.

Aldous Huxley in hihbang lungkhamna leitung ah mimal dahna, hehna leh lunggimna te adamsak dingin ‘drug’ khamtheih’ zangleng cidamna piazaw in alungsim sung uh-ah nuntak nuamzaw dingci hi. Huxley in “Heaven and Hell’ cih laibu na gelhhi. Ahizongin lungsim sungbek lungkim na leh lungsimpua lam kilehbulh ahihman in tua hitheilo dingcih tawh hih laibu ah khuphi. Modernism ii concept bulpi, ‘man beginning from himself’ mihing amah leh amah hithei hicih pen leitung pilna sungbek tawknawi lo-in Pasian thusung (theology) zong nasiatak in hongtawkzau hi.

Hih modernism leh postmodernism hangin theologian (Pasian thupil) te in panmun tuam tuamtawh nadawng (response) uhhi. Amin thang deuhlak ah Karl Barth in Liberalism lehdo pah hi. Tua hi-a “Church Dogmatics” vol tampi gelh in minthang lawhhi. Paul Tillich zong God-is-dead theology tawh kitheipen hi. Tuhun (postmodernism) sungin theologians pawlkhat te in olno (kol) takin Pasian thu Laisiangtho tawh kigamlasak a hong gelh/gentak ciangun mi nautang [lay people] te inzong utbangbang in Christian nuntakna hongzangta uhhi.

Hihbang suahtak na bangin hong nungzuih hiam cihleh tuhun Christian te in, electronic church (online youtube, facebook) pan Pasian thungaihna tawh kicingsa, electronic preacher (online pan thugen natawh sumleh paizonna leh minthang na in zang) in technology in tampi tak hongtawk nawita hi. Tuabek hilo in LGBTQ ci-in Christian sungah issue pikhat hongsuak hi. 2011 in Boston sangkah dingin katunga classmate, professor te atamzaw pen hidan (LGBT) vive nahi mawk hi. Alamdang zawlai kasak in, numei leh numei kitengin khatpen pasal sem in tuatawh ta nei, pasal leh pasal kiteng in khatpen numei semin tuatawh tanei hi.

Hih pen thu-umlo mite sunghileh ahithei thumah cihding hi-a, ahizongin thu-um mite vive ahihman in kakhuak in ban zo nawnlohi. Hihte pen transgender (pasal in numei vantawh laih, numei in pasal vantawh laih) hi a, alauhuai leh Christian innkuan sung hongsusia thei laikhat ah nupa kitengin ki-it mahmah a ahizongin ta hongneih theih lohciang un midang (mikang mivom) te’ sperm doctor tekiangah leiziau in tuatawh tanei theihi. Hihte pen Abraham+Sarah leh Hannah, cihte tawh enkak leng acidam Christian family ahidiam cihdotna lianpi om hi. Tu in anuai ah hih thupi khennga (5) dawn kikna ihnei ding uhhi.

Thukhupna leh khennga (5) te dawn kikna

Tulai Tapidaw (Christian) te-in mimal, innkuan sung leh kipawlna (pawlpi) sungah vaihamsa khatleh issue khatpeuh hongom ciangin ih dawnkikna te in thusai mahmah hi. Gentehna in taanglai (apostolic fathers) te in Rom khuapi a milimte nabiak kei-uhleh ci-a thunei te asawl ciangun keibiak Zeisu bekhi ci-in thal nial ngam uhhi. Tuabang mah in kumzalom 2-4 sungteng zong Pasian khatbek omhi vs Pasian tampi omhi leh Pasian pen Tothum hicih tawh Nicaea (325), Ephesus (431) leh Chalcedon (451) ah nasiatakin kikupna nei uh a kum za asim nabuai pih ngam uhhi.

Tua khit leuleu ciangin Constantine in gal hongzawhciangin Rom gampan in leitungbup ukding hanciam uh a, Rom milian te’ lim (statue) biakding leh paidingin thu napia leuleu uhhi. Ahizongin tua mihing tethupiak sangin Pasian thupiak alauzaw te in Rom milim te biaknuam lo in sihdong mah nanial ngam uh ahihman in upna kilaihna hongpiang a tu in Enlightenment leh modernism postmodernism sungah zong upna laigil (apostolic faith) tawh kileh bulh vive lamah mihingte taizaw nuam hi-ahangpen nuamzaw leh olzaw ahihman ahihi.

Thukhupna nihna

Kum 2000 sung Christian nuntakna khennga (5) sungin akibanglo hunte ah akibanglo haksatna liante Christian te in nathuak hi. Ahizongin hih thuakna in ngimna khatbek nei-a tua pen Laisiangtho tawh kituak upna ataih (attack) ahih lam ihtheih ding thupi mahmah hi. Tuhun ciangin apostolic faith (Paul, Peter te upna) ah kingahsangin feeling (lawppak na, cidam na, nalamdang bawlna, lam a lungnop suahtak pakna) te tawh ihhaksak nate phisinna (solution) dingin ihzat man in thugen evangelist/pastor/ cihte akipan Khristian hihna pen ihneihsa piak khiatna leh nuntakna nangawn supna sangin Khristina hihna hangin ngahna lam bekbek ah la zaw ihih man in Laisiangtho sung a pupa te’ upna tawh kileh bulh mahmah hi.

Gentehna in Ignatius mihau mahmah pan in Pasian upna tawh aneihsa leh innsung nuam omkim lai haksat na thuakzaw in Pasian (Khristian hihna) zui hi. Polycarp zong milim biakding sangin Zeisu sihpih ngamzaw ahihman in meitawh kihaltum hi. Clement zong tuabang mahin Zeisu kianga thungetna khawlnuam lo a Tembaw khitna (anchor) tawh agawlkikhihsa in tuipi tungah kikhah hi. Ihtuah khakthu te tawh kizui in modernism te’ pilna zong siksanleh letpi in neikei ni. Enlightenment te muhzia zong kicinglo a, thunei emperor te ukna sunga tezong kicinglo in Laisiang kigelhlai a apostolic faith te mah enkikkik a hih postmodernism haksatna te ih phisin theih nadingin Laisiangtho bek omhi.

Laisiangtho pen Pasian kammal ahihi. Christian sung mipil misaim tampitak inzong Christian upna alangpan’ Buddhism leh Hinduism cihte lak ah Zeisu bekcihding sangin Buddha zong, Krishna zong lampi khatmah hi cihpih in Zeisu bek cileng Kawlte in hongmudah ding cihna tawh kilem ding (peaceful coexistence) cihbangin hem genta hi. Judson inzong Kawl kumpi pa mai ah, “There is only one eternal Being” naci ngam hi. Zomi thu-um tampi tak in Pasian thusungah ahangsan leh Zeisu bek acingam mipil tampi ihkisam lai uhhi. Pau Do Lian., D.Min, (Ph.D)