Kum 5 nuai naupangte Vitamin tawm neilua leh mittaw thei

Kum 5 nuai siah naupangnote Vitamin A kicing neilo te a sawtna ah a mit nangawn uh tawt lawh thei uhi. Nute in naupaai hun aakipanin Vitamin A kicing in ne kei leh a suak nau-no pen Vitamin A kisam thei hi.

Vitamin A kisapna hang a apiang mit natna pen mit keu natna kici hi. Hih natna in protein (sadat) kisam natna (protein deficiency), hunsawt vei sunghoihlohna, sensi natna vei naupangte ah mit khumuhlohna, mittawt na piangsak thei hi.

Vitamin A
Vitamin A pen sathau sungah a tuisuakthei (lipid soluble) thaza khat ahi hi. Pumpi khantohna, mit khuamuhna, huihdikna gui (respiratory tract), gil gui (GI tract), zunpaina gui (urinary tract) tea a a om sapangpuat (membranes) te thakhauhna dingiin kisam pha hi. Tua bek thamlo natna dal pumpi thakhauh sak thaza khat zong ahi hi.

Banghang in kisam thei
Nau suah tung in a luangkhia nu nawizugel piak lohna hangin nau-no vitamin A kisam sak hi. Tua nawizugel ah vitamin le thaza tuamtuam kicing in a om ahizaw hi.

Nawizu pialo in bawngnawi vui, keelnawi cihte piakna hangin zong vitamin A kisam sak tuam hi. Tua bek thamlo a annekna sungah vitamin A kicingtak in a kihel lohna hangin zong hi thei hi.

Kicingtak anei mehteh mehgah
(i) Sasin, tyui tuamtuam, nawi le nawi panin a piang nektheihte (gtn. Cheese)
(ii.) A suaktung naungek nu nawizu luangtung piakna
(iii.) Kha 6 a phak dong nu nawizu lianbek piak na
(iv.)A dangnektheih te ah a kumtawh kizui in hai gah min, nunun min, mai gah, kawlkai sungsan, a engcik mel mehteh te, sasin, tyui tuamtuam te piakna in vitamin A kicing sak hi.

Vitamin A avalluat leh
A kisam zah sangin a vallua nek na hangin Vitamin A vallua natna kivei thei hi. Ankam limloh vatna, awk suak, lung-am, lutangna, mitmang, khutlekhe khaidan nopmello cihte piangthei hi.
Nawine naungek te ah ahih leh a sip uh bawk (pawm) thei hi. Ahizongin hih pen ni tawmkhat sungah mangkik pah thei hi.

Hunsawtpi Vitamin vallua leh lutangna, sam pulh, muk puakkham, vun keu in thak, guhletang na cihte piang thei hi.

Lailet: Dr Nang Khan Lian
Zingsol
Source: Modern Journal, no. 435