Kum 2014 sung naupang galkap mi 418 ki khahkik ci

Kum 2014 sung naupang galkap mi 418 ki khahkik ci

Kawl galkap kumpi thunei te’n 2014 kumsung in kumcingnailo naupang galkapding in akep uh mi 400 val khahkhiakik uh cih United Nations in genkhia hi. Hihpen 2012 kum Tatmadaw Army leh UN (United Nations) te’n hihvai tawh kisai thukimna Agreement abawlkhitzawh ahihi.

Tulaitak hunlian in galkap sungah kumcingnailo naupang bangzah omding cih ki theicianlo a, honpikhat mah omlai veveding in ki lam en hi. Naupang tepen atamzaw zawhthawh thutawh galkap sungah akilutsak hi a, pawlkhatte vangik pipi Porter puasak uhhi. Pawlkhat leuleu ciangin gamsung lampi khawngah Mine akisiah aomkhakleh asikding in Mine Detectors in kizang cimawk hi.

Galkap kumpi leh UN thunei te’n thukimna aneihkhitzawh naupang galkap tampi ki khahkhia hi ci’n UN te’n tangkokhia uhhi.

“Galkap kumpi tawh thukimna kumkhat acinzawh ciangin naupang honpikhat Tatmadaw khutsung pan ki suaktasakzo hi. Hihpen Myanma Tatmadaw in naupangte zawhthawh thu tawh galkap tumding in akaihna te abeina hita hen” ci’n Kawlgam sung aom UN Resident Coordinator Lok-Dessallien in genkhia hi.

Naupang galkap aki khahkhiakik tepen avek un kum 18 nuaisiah vive cihzong kiza hi. Hihbang in naupangno te galkap dingin akizat pen Human Rights Group te’n encik gige uh a, zadah mahmah uhhi.

Kumpi galkap sungbek hilo in, kumpi langdo singnuaimi te sungahzong kumcinglopi galkapdng in akikem naupang honkhat omding hi ci’n UN te’n genkhia hi. Tuabang in naupang kumcinglo galkapding in azangpen Rebel Group 7 peuhmah omding cih kiza hi. ZD Sawltak #zomidaily