Kum 19 aphakhin numeikhat innkuanpih te’n alawmngaih tawh awilo in thatlum

Kum 19 aphakhin numeikhat innkuanpih te’n alawmngaih tawh awilo in thatlum

“Honour Killing” cihpen innkuansung ah khatpeuh in mindaisak nadingin agamtat ciangin kamtawh akikhamzawh keileh ami thatlumziau uh a, tuapen “Honour Killing” cimawk uhhi. Innkuan mindailiang sangin sizawvet leh hoihzaw ci’n unau sanggamkhat, pata khatpeuh ki thatlumziau theimawk uhhi.

Nungkal Wednesday ni in UK gamsung ah numei kum 19 aphakhin khat ki thatlum cihi. Tua numeinu pen Celine Dookhran kici a, Southwest London, Kingston sungah “Honour Killing” tawh aki thatlum cimawk hi.

Celine Dookhran kici numeinu pen Indian Muslim hi a, Arab Muslim pasal khattawh kingai uhhi. Tuathu a innkuanpih te’n atheih uhciang in Muslim tuaktuak ahih uhhangin deihlo uhhi.

Arab Muslim tawh aki ngaihkhakna hangin a innkuanpih te’n athahlup uh kici a, athatlum pen kum 33 aphakhin Mujahid Arshid kicipa ii thahlup kici hi.

Celine Dookhran pen alawm numeikhat tawh akithuah laitak in Mujahid Arshid leh adang pasal khatin mancip “kidnap” uh a, Kingston vengsung aom inngolpi khatsung ah koihcip uhhi.

Mujahid Arshid kicipa pen Celine Dookhran tawh innkuankhat hidingin ki ummawh hi. Ahi zongin Mujahid Arshid in numeinu tegel pen zawhthawh thutawh buangawp photin tuakhit ciangin Celine Dookhran pen “Honour Killing” ci’n athahlup kici hi.

Celine Dookhran pen agawl at sak in, aluanghawm pen Freezer sungah selcip hi. Numei akhatnu pen suakta in tuanu in kumpi thunei te agenkhiat ciangin hihthu kitheikhiapan hi. Tuanu zong kidnap thuak, Rape thuak ahih manin liamma pawlkhatzong ngaha, South London Hospital khatah zato lum cihi.

Hih Kidnap leh Rape vaitawh Mujahid Arshid pen kimanpah a, alawm aki thuahpih kum 28 aphakhin Vincent Tappu akici khatzong Kidnap vaitawh kiman cih Metro UK pan kiza hi. Alawm Vincent Tappu pen abuanlak ah kihello in, amancip Kidnap lakbek ah kihel cihi. Tua akiman nihte pen August 21 ni ciangin thukhenzum ah thusitna thuakding uh cihi.

Video: What Are Honor Killings?

https://www.youtube.com/watch?v=KXFs4mrEpEc

Celine Dookhran pen aki thatlumziau mawkmawkbek hilo a, asihma in kibawlsia dikdekphot cisawnsawn hi. Kidnap, Taser, Rape, Murder ci’n aki matcip khitciangin khuaphawklo dingin bawl, tuakhitciang buan in thatlum cih himawk hi. Tuabang in abawlsia pen Mujahid Arshid hi a, tuapa pen a innkuanpih kici hi. (a sanggam pasal ahi khadiam, sanggam ci’nbel aki gelhna omlo hi) Honour Killing ci’n athatlum ahih lehzong banghang in innkuansung khat lawmlawm, buanphot sesehiam?

Related: Pakistan ah Facebook Star khat asanggampa in thatlum

HBVAN kici “Honour Based Violence Awareness Network” te pulakna ah leitung ah kumsim in Honour Killings tawh akithatlum mi 5000 vang omden cimawk uhhi. Tua aki thatlum lakah India gamsung panin mi 1000 bang ki thatlum in, Pakistan gamsung paninzong mi 1000 bang ki thatlum cihi. UK gamsung ah 12 bang ki thatlum cihi. Sawltak #zomidaily