Kuala Lumpur khuasung huihsia guahsia in nawkgawp

Kuala Lumpur khuasung huihsia guahsia in nawkgawp

Malaysia, Kuala Lumpur khuapi sungteng zanni Thursday nitaklam in huihsia guahsia in nawkgawp ahih manin inn tampi akisiat banah singkung zong tampi kipuk cih theStar pan kiza hi.

Nitaklam 10pm khitpawl akipan huihpi khauhmahmah in nunggawp hi. Kuala Lumpur Fire Operation Centre Head Zamani Ismail in agenkhiatna ah zanni nitak 10:04pm hunin cimawh dongtuak huhngetna “Distress Call” hongkisam cihi.

Wangsa Maju vengsung aom Apha Villa aom Building pikhat ii atungkhuh siktang te lengkhiagawp in, anuai a mawtaw kikoihna Parking tungah dengsuk cihi.

Wangsa Maju Fire & Rescue Station panin Fire Engine khatleh Firemen mi 7 ki paisakpah in, Minute 10 sungin aphual tungpah uhhi.

Inntungkhuh teng akiatsuk ciangin anuai ah akikoih mawtaw te tungah kiasuk ahih manin, mawtaw bekbek akigawm in 7 siacip a, Motorcycle zong 2 dengkha hi.

Fire & Rescue Team te’n tua inntungkhuh akiateng hemkhia in, nitaklam 10:44pm hunciang in hemkhiasiang zopan uhhi. Hih buaina hangin mi asi aliam kuamah omlo hi.

Kampung Segambut Luar ahzong singkungkhat kipuk in innkhat dengkha cihi. Tuamun ahzong Fire Engine khatleh Firemen mi 5 kipaisak in, innsung aom innteek te amuanhuaina munah ki tuahkhiatsak hi ci’n Kuala Lumpur Fire Operation ulianpa’n genkhia hi.

More: Kuala Lumpur khuasung aom vanmanpha zuakna Jewellery Shop ah suntangpi in damiah lut

Kuala Lumpur khuapisung vengtuamtuam ah huihpi tawlkhatsung khauhmahmah a, ahi zongin mihing asi aliam kuamah kizalo bilbel hi. Sawtlak #zomidaily