Thai gamsung kuahawm sungah a awkcip te lakah akihel Myanmar gampan Aih Lu

Thai gamsung kuahawm sungah a awkcip te lakah akihel Myanmar gampan Aih Lu

Meisai khua Grace Christian Church , ka khuapih (Gawng) Pastor Go Sian Muangte’ naupang kep khat ahi, Aih Lu pen Thai gam cave kuahawm sungah awkte lak ah khat ahi hi.

A ngekcil in, Aih Lu a Nulepa in Siapate nupa ap uh in, tuni dong a Nulepa in contact kik nawn lo uh hi. Pasian it mahmah naupang Aih Lu pen thungetna, kikhopnate ah lasa music tumin thasial ngei lo, lawp den hi. Lai zong pilin a Sangah kipakta hi. Pasian in hi naupang a laptoh nop teh lamdang mahmah mai hi.

Kuahawm sungah ni tampi a kizon khitteh England tuipek siam nih in Aih Lute lawmta teng hong mu masa sese hi. England tuipekte in English tawh a hopih ciangin, Aih Lu in hoih takin dawng thei pah lian hi. “Hello! What day? We’re hungry. We’re 13 here. Where are you from? Cih bangin na hopih thei lian ahih manin, Thai gam bek lo, leitung bup ah Aih Lu pen mi khempeuh in hong theihlawhin ki it tek pah hi.

Media tampi in Aih Lu’ Sangkahna ah a thu va kan pah uh hi. Aih Lu, laipil, bawlung siam, kimawlna namkim siam, music siam khat ahih lam hong kithei khia ta hi. Aih Lu in a Sang inn panin letsong a ngahna photo pawl khat Media ten hong post khia uh hi.

Aih Lu a letsong sanna photo ah a puansilh pen Singha Corporation logo tuang khat na hi khelkhel ahih manin, tua mihau Company te in Aih Lu omna hong delh pah uh in, Aih Lu adingin, kimawlna bawlung lam leh pilna sinna zop suakna ding khempeuh a tawp dongin, sponsorships theih dingin khentat lian uh hi. Thuum mite pen I puansilh neng khat na ngawn tungtawnin Pasian in na sem lel mawk hi.

Bek tham loin, Aih Lu hong thahat man leh Russia gamah World Cup final etpih dingin mihau te in zawn ta uh hi.

Pasian a it, a thasial ngei lo naupang Aih Lu hangin Thai gambup in a nungta Pasian hong theih lawh ta uh hi. Aih Lu amai lam ding lametna lian tampi in ngak gige ta ahi hi.

Aih Lu sangin mipil zaw, mihau zaw tampi Thai gamah om ding hi mah tase leh Pasian a it Aih Lu pen hong kilamto lian hi. Kuahawm sung panin, Aih Lu in Hallelujah cici ngel ding hi.

Matthew 6:33 Pasian gam le ama dikna a zong masa naupang Aih Lu a kisapna dangte zong Kuahawm sung tawhin Pasian in pia hi.

Pasian nasepna ah I hih theih mun ciat ah thasial het loin Aih Lu naupang bangin hanciam huai hi lo hia leh ? Topa’ thupha! Khat Thang