Kua aa ding sem, bangci sep – 2

Kua aa ding sem, bangci sep – 2

(Hih anuai aa thute khempeuh Kipawlna ii deihzia hikimlo thei aa, mimal lunggulhna pan cile’ng khiallo hi.) Malaysia gamah, lungsim puakzia tul tampi apha, panpihna kisam tul tampi a pha, thu muh zia, thutheih zia, lampi tampi, nam tampi tawh a om Zomi-te mai aa mapang ding, a panpih ding, ahih kei leh hih tul tampi ii sawltak (sawl tangzang) ding pen, a pil, a tei tampi ih omna sung pan anuai aa nasep zia (pawlkhat) a nuntak pih zo tampi tak a hikei zongin pawlkhat a omloh phamawh hi;

Mipi tawh nasep

Tuni ciangciang, Kipawlna in kaal khat sungah zum khak hun ci aa a ki ciapteh sawm ni a omzel hangin mipi tawh nasepna ahih mah bangin, a hun zui-in zum khak leh nasep tawlnga hithiat cih zong om theilo zel hi. Zum hun ci-in zong aki ciamteh hunte-ah, mipi tawh na kisem mah hizel aa, vai omzia zui-in zum hun hinawnlo cih tentan tawntung theihloh hun zong om zelzel hi.

Nasep zia ki etphat zel ding thupi

Hih atung aa dinmun khattawh nasep a kisapna gam ahi hi. Hih nasep pen kei zawhding, kei sepding ci aa lungsim ah veina a omkhit ciangin, kei mite aa ding a semding aa om hi ingh, cih lungsim vom hamtang ding hi. Tua lungsim leh ei leh ei kitheihna mahin lungsim leh pumpi sawl aa, a hun, a ni, a mun cih omlo-in, panpih theih a om khatpen paulap zon’na ding nei manlo ding hi. Paulap nei cihtak ciangin, Kipawlna ii maban khat peuhpeuh, Kipawlna ii vai kisam khat peuhpeuh hang tawh buaina ding nei cihpen paulap kici pah theilo hi.

Ahi zongin, sepding mu gigu, sepding thei gigu aa, eima mimal vai, innkuan sung vai, lawm leh gual vai, eima ukna khat peuhpeuh tawh panpih nasep ding, Kipawlna nasep ding a kipelh zelzel leh tua pen Kipawlna cidamlohna ding khaici tuh kipan kici thei hi. Mimal vai semlo ding ki citheilo hi. Mimal vai sepna ding mun leh a hun piakding zah, a hun piakding hun, a ni a ngaihsun thei, a ngaihsun siam kisam hi.

Eima phattuamna ding tak ciang

Leitung nuntak zia ih et ciang, a tamzaw pen, eima mimal vai, innkuan sung vaite ahih leh, naa kisa phadeuh, nuamna dingah kinuam phadeuhin, hanciamna dingte- ah thatang-lungsim khempeuh ki piazo, ki pia ngam hi. A tomin gen le’ng, eima pumpi leh innkuan pih, tanau vaite-ah ih veina leh ih dinmun pen a simtham ahi zong, a kilang in ahi zong ciik mahmah, kip mahmah tek hihang. Tuamah bangin, Kipawlna sung nasem khat in, hih Kipawlna pen, keima puahding leh keima daal ding hi, cih lungsim a vomzo den kisam hi. Hih munah, tuate ka panmun ii sepding hikei cih lungsim lauhuai thei zel hi.

Sepding, gamtat ding a sawlzo veina

Nisim, khasim aa buaina, lung himawhna om hetlo aa kha tampi a paizo kipawlna pen leitung ah om khollo ding hi. Kipawlna a lawhcin’ zawkdeuh hun teh, ama aituam lian bang phial aa a lungdam zo leh Kipawlna a thanem teh zong, hih pen keimah mahin ka panmun hang cih hilo in ka septheihna penpen pan laptop ding ci aa a laina velvel kisam hi.

Veina pen, mikim in atawm atamin ki neitek hi. Veina nungah seemkhia ning, gamtang khia ning, tha saan ning a ci pen tamlo thei hi. Sepding, gamtat ding zong tawlkhat sung cih hithei lo aa, ih naesp vai a zawhdong, a tawpdong sep tantan ding thupi zawlai hi. A gah limci hong gahtheihna ding ki lunggulhin, kam tawh gendan zong ki siamtek aa, a kung puahding leh tui buah tangtang ding ciang, kampau zahin sepna-in zui nuamlo thei zel hi. Hong semkhia sakzo veina kisam hi.

Thupi a kici khempeuh sepna ding mun hilo Aki piakhia aa nasem khat pen, full-time volunteer in ki ciamteh ahihna tawh kizui-in, nai (24) a om ni khat sungah, mite aa ding nai bangzah a piazo, a hihkei leh a piaksawm cih a hanciam, khentatna, kiphawkna anei tawntung kisam hi.

A beisa hun ciangciang, a seemte’ kipiak zawh zahzah hunte pen a manpha hi toto aa, nang hun tawmpiak lua teh, a kici cihdan kiza ngeilo-in, tuabang kicih theihna ding dinmun hilo zong ki cithei kawikawi hi. Hun leh thatang, theihna, siamna om zahzah a piading aa ki piakhiatna ahi hi. Tua munah, ni khat ih bei pih, nai khat ih bei pih, zingkal nitak kal aa ih buaipih pen bang hi aa, tua-in Kipawlna koiciang matut pih hiam cih zong a khinkhai tawntung ding kisam hi.

Mihing khat hihna tawh ahi zongin Malaysia aa om Zomi khat aa ding ahi zongin a tomin en le’ng, kipawlkhopna, kithuahna thupi hi, khua leh tui vai thupi hi, meltheih tanau vai thupi mahmah hi, biakna lam ki-apna leh ki piakkhiatna thupi hi, lai nasep khatpeuh zong thupi hi , thatang kipiak khiatna khatpeuh thupi hi, pau leh ham tawh sepna thupi hi, ei theihna tawh ih pattawm vai khatpeuh zong sialo hi, ei muhna tawh ih sep khat zong thupi hi, pawlkhat in hong thapiakna tawh ih vaihawm khatpeuh zong thupi hi, cih bangin a thupilo leh hici et le’ng a thusia om hetlo mah hi.

Ahi zongin, zingkal nitak kal ih buaipih nasep khat, ahih kei leh nasepte-in Kipawlna bangci phattuamna pia hiam, cih a khinkhai tawntung kisam hi. Nasep hoih khat sepna pen thupi mah aa, ahih hangin tua nasep hoih icihte-in Kipawlna phattuamna ding mah maw, mimal’ hoihsak thu tawh, ahih kei leh ukna tawh maw cih a khinkhai tawntung kisam hi. (zoplai ding) Tg. Kham [iNFO]