Kua a khial ngeilo om? Pasian sui kuate? ~ Pau Khat Suan

Kua a khial ngeilo om? Pasian sui kuate? ~ Pau Khat Suan

Kum 100 val sung bang Pasian’ thu lungduai tak gen a, a innkuanpihte lobuang khat beek a ngahlo, Noah in lenggah zu khamlua khamawk hi.

Pasian’ lawm cih zahdong a Pasian mahmah in a ciapteh Abraham in Pasian’ kamciam ngak zolo in, amau nupa’ lem geelna in, a Egypt sila nu tawh suan le khak neih ding geel khamawk hi.

Leitung piankhiat zawh mihing lungduai penpen ding a kiciamteh Moses in Egypt pa that kha mawk a, a mipite tuiduh a aphun luat man in suangpi nih vei na dawtkha mawk hi.

Pasian in “ka lungsim a tuak” ci a a-gen ngiat, Pasian a lungdam sak mahmah David in a galkap mangpa’ zi laksak in, a galkap mangpa mahmah sihna ding vaihawm kha mawk hi.

Zeisu in a muanpenpen Peter in aklui a khuan’ma in Zeisu thum vei na nialkha mawk hi.

Zomi mipi genloh Pasian’ nasem ( so called ), biakna siate leh evangelistte nangawn “khial kha” cih peuhmah ut deksuai lo uh a, amau’ gen tawh a kibang lo a genkha peuhmah a langpang bang in ngaihsun in, galpi thumna do ding in kithawi lianlian thei mawk uh hi.

Pasian in ama’ lim le mel tawh kibang in “ong bawl” cih nakpi tak genkawm mah in, Pasian pen a ma’ theihna, ngaihsutna leh deihna lian dandan in suisui mawk uh hi.

A khial thei lua mahmah mihingte ihi a, Pasian i theih i telna a kicing ngei deksuai lo dingte ihi hi.

Ahi zong in, i kicin’ man a Pasian in ong it, ong gum hilo a, ei’ hihna tawh kisai kilkel lopi a ong it ong gum in, upna tawh “tate cihna gamhluah za” i ngah khit ciang, i Pasian tawh nuntak khopna ah amah a telzaw semsem nuam dingte ihi hi.

Tel masak ding hilo a, up masak ding hi napi, upkhit ciang amah, Pasian’ zia le tong tel a “amah tawh mual ah a suakkhawm liailiai ding” a lunggulh ding ihi hi. Pasian’ zia le tong telnopna tawh Pasian’ thu kantelna, pilna zonna pen Pasian sung a khangcinna ding a a kisam mahmah “an” ahi hi.

Related: Zo Ngeina Khuado Pawi leh Khangthak Zomi ~ Pau Khat Suan

A khial thei mihing ihi a, a khial pahpah mihing ihi hi. Pasian ei’ deihdan in suihsawm nawnlo in, Pasian’ zia le tong i theihzawh zahzah theih sawm ding hanciam zaw le hang Zomite i “thu-um nuntakna” ah ni khat khit ni khat i picing zaw deuhdeuh diam maw… Pau Khat Suan